PO'ULE' INGULIT 7 - KITAB NU TUMPU ALLA LELE MA'IMAI'

Mian anu pinile'anmo nu Tumpu Allah

¹ “Tumpu Allah nu belemiu momboamo belemiu mamba i lipu' anu saidi' mae ojojoongimo miu, ka' manjoo' na bansa anu Nu laa' mosabat ikiijo'. I ahop nu mata nu belemiu popitu' na bansa Nu laa' anu lebe daka' ka' lebe mahoson molingkudui belemiu, aijo'mo aha mian nu Het, Girgasi, Amori, Kana'an, Feris, Hewi ka' Yebus.

² De Tumpu Allah nu belemiu mombee'mo bansa haha aijo' da okuasaimo miu ka' opatundu'mo nu belemiu na aha, pateimo na aha iwi-iwi'. Boli mongkalibosi aha kabai mojanji' tiba aha.

³ Belemiu madi' timbali mongosoai aha, ka' boli mompobee' to ana-anak miu mo'osoa ka' aha,

⁴ da boli nupojo'on nu aha na to ana-anak nu belemiu hi Tumpu ka' monsombahmo to pilo-pilogot sangga'at. De belemiu monsombahmo to pilo-pilogot sangga'at nutambuha'imo nu Tumpu ka' belemiu Nu pateimo.

⁵ Kalana aijo', hobo'akon na mezbah nu bansa haha aijo' anu nupalesaya nu aha ko balakatnyo, tua'akon na anu bau pontandai Asyera, ka' opapui na to pato-patong bapilogotan anu nusombah nu aha.

⁶ Bau na iwi-iwi' aijo' kalana belemiu anumo nu Tumpu Allah nu belemiu. Iwi-iwi' na bansa anu i dunia aiya belemiumo na anu pinile'anmo nu Tumpu Allah nu belemiu da timbalimo mian anu palesayamo ka' talasanggo.

⁷ Belemiu nu kanonongi ka' pinile'anmo nu Tumpu, misa' kalana belemiu lebe manjoo' molingkudui bansa-bansa sangga'at; memang belemiu bansa anu sangkiding hondo i dunia aiya.

⁸ Panyo Tumpu nompile'imo belemiu kalana Ia nongkalibosimo belemiu ka' kahanda'mo momponyata' janji'-Nyo anu binau-Nyomo tiba mompolee' nu belemiu. Mokonyo aijo' Ia momposalamatmo belemiu nu kuasa-Nyo anu daka' hondo, ka' mompobebasmo belemiu temponyo binoatuanan i tomundo Mesir.

⁹ Otutugi ahi' saba' Tumpu Allah nu belemiu ola sa'a-sa'angu'nyomo Ia na Tumpu Allah, ka' Iamo na Tumpu Allah anu talalo manonong. Tumpu mongganapimo apaa na anu jinanji'-Nyomo ka' nompotoamo kalibosan-Nyo sidu-sidutu' sampe samadala na lapisan nu lee'nyo nu aha mian anu mongkanonongi Ia ka' tulu-tulutan hi iwi-iwi' na palentah-Nyo.

¹⁰ Panyo madi' ko madi'nyo Ia sabole-bole mohukum aha anu mongka'ideki Ia.

¹¹ Jadi, otuluti na atulan iwi-iwi' anu pinoto'ingkumo hi belemiu sinaa aiya.”

Balakat kona hi mian anu tulu-tulutan

¹² “De o intomakon nu belemiu na palentah haha aijo' ka' obau ma'i-ma'ima' saba' Tumpu Allah nu belemiu suele sabole-bole momponyata' palajanjian-Nyo anu binau-Nyomo tiba belemiu. Nu potoaje na kalibosan-Nyo anu saja' Nu bau hi belemiu susumo anu jinanji'Nyomo hi mompolee' nu belemiu.

¹³ Nu kalibosije ka' Nu balakatije na belemiu, sahingga anak nu belemiu manjoo'mo ka' konjoo'nyo mompaka pintuangmo. Nu balakatije na ale' nu belemiu iwi-iwi' sahingga mohasinakonmo gandum, anggur ka' lanya' nu zaitun. Nu balakatije na belemiu sahingga manjoo'mo na sapi' ka' mee' ka' domba nu belemiu. Iwi-iwi' na balakat aijo' ohumpakje nu belemiu i lipu' anu nubee'mo nu Tumpu hi belemiu, susumo anu jinanji'-Nyomo hi mompolee' nu belemiu.

¹⁴ Iwi-iwi' na bansa i dunia aiya, madi' ko sa'angu' pe'e na nohumpak balakat susumo aijo' na konjoo'nyo sumo anu i humpak nu belemiu. Belemiu iwi-iwi' ka' iwi-iwi' na potu'on nu belemiu sa'angu' pe'e madi' ko anu bu'a.

¹⁵ Belemiu nujagai nu Tumpu da boli nukona nu panyakit ka' iwi-iwi' na balaa' nupojo'on nu Tumpu susumo anu tinoamo nu belemiu i Mesir, panyo balaa' haha aijo' nu pokona hi to mia-mian anu mompaha bali' tiba belemiu.

¹⁶ Batu-batu bansa anu nubee'mo nu Tumpu Allah nu belemiu da okuasaimo nu belemiu tionyo ahi' opateimo nu belemiu; boli mompotoa kalibosan hi aha. Boli monsombah to pilo-pilogot nu aha, kalana kalakuan anu sumo aijo' mompotoka mae balaa' hi belemiu.

¹⁷ Ihe na monsumbu' belemiu montutugi bansa haha aijo' lebe manjoo' sahingga belemiu madi' moko ala molaa' aha.

¹⁸ Panyo boli okabuhuk na aha; o' inau' apaa na anu binaumo nu Tumpu Allah nu belemiu hi tomundo nu Mesir ka' hi iwi-iwi' na layatnyo.

¹⁹ O' inau' na to bala-balaa' anu okabuhuk hondo anu pinosi sakisianmo nu belemiu, batu-batu anu okabangangi, ka' kakuasa'an anu daka' na binaumo nu Tumpu Allah nu belemiu, kalana kahanda' mompobebas belemiu. Sumo aijo' suele na Tumpu Allah mombau iwi-iwi' na bansa anu okabuhuk miu.

²⁰ Ka' mule' Tumpu Allah nu belemiu mompotimbali da mabuhuk na aha sahingga to mia-mian anu moko ala mopalai ka' matisuluk suele opoko ala opatei.

²¹ Jadi boli mabuhuk hi bansa haha aijo'. Tumpu Allah nu belemiu na monjagai belemiu. Ia Tumpu Allah anu talasanggo ka' okabuhuk.

²² Bansa haha aijo' batukmo Nu laa' da mompala'imo belemiu. Komiu madi' timbali sampa mohopu'i aha, da to bina-binatang anu mahangas boli ko pintu-pintuangnyo mae ka' baumo sohoban nu belemiu.

²³ Sumo aijo' na Tumpu Allah nu belemiu mombee' iwi-iwi' na sampobali' miu hi belemiu. Ia momposubalimo aha sampe aha silakamo.

²⁴ Ia mombee'mo tomundo nu aha haha aijo' hi belemiu. Opateimo nu belemiu na aha, ka' sanggo nu aha okolilimimo nu belemiu. Samian pe'e madi' moko ala mongewa mongahopi belemiu,

²⁵ Opapui na to pato-patong nu pilogot anu nusombah nu aha. Boli mongkamilui salaka kabai mosoni' anu kona-kona hi aha ka' boli mongala bau kapalaluan nu posi butong miu. De olanggai miu na palentah aijo' belemiu suele silakamo, kalana Tumpu Allah nu belemiu mongka'ideki de monsombah patong nu pilogot.

²⁶ Boli mompo'una' sa'angu' na patong nu pilogot i uno nu laigan miu, da kutuk anu mongkona ia boli suele mongkona belemiu. Han aijo' tionyo ahi' oka'ideki miu ka' otoa salaku anu madi' ko angga'nyo kalana nukutuki nu Tumpu.”