PO'ULE' INGULIT 6 - KITAB NU TUMPU ALLA LELE MA'IMAI'

Palentah anu penting hondo

¹ “Tumpu Allah nompokaumo aku da mompogulu' iwi-iwi' na atulan aiya hi belemiu da obau nu belemiu i lipu' anu madi'mo pin o jojoongimo nu belemiu.

² Belemiu ka' lee' nu belemiu tionyo ahi' mongadati Tumpu Allah nu belemiu i uno nu kantumuu'an nu belemiu ka' montuluti iwi-iwi' na atulan-Nyo anu binee'kumo hi belemiu, da belemiu pin na tumuu' i lipu' aijo'.

³ Kalana aijo' potombihing to utu-utus, bau na aijo' ima-ima' da belemiu mohumpak ka'ima'an ka' timbali sa'angu' na bansa anu daka' i lipu' anu kaya ka' anu ma'omuk, susumo anu jinanji'mo nu Tumpu Allah nu mompolee'to.

⁴ To utu-utus, jaga mae! Ola Tumpu, ka' ola Tumpu na Tumpu Allah-nto!

⁵ Kanonongi na Tumpu Allah nu belemiu, nu kinyonyoa miu anu totu-totu'u; Opotoa i uno nu kantumuu'an nu belemiu ka' i uno nu ko langka-langkas.

⁶ Boli hondo-hondo mongkolilimi atulan haha aiya anu binee'kumo hi belemiu sinaa aiya.

⁷ Opogulu'akon hi to ana-anak nu belemiu. Belemiu tionyo ahi' mombisalakon i uno nu laigan, kabai i sambiha'nyo nu laigan, tempo'nyo milawe ka' tempo'nyo mokalaja.

⁸ Oposegot i botokon nu beleyum ka' opokona i siakan nu beleyum da saja' o inau'.

⁹ Opotulis i totokolon nu sabatan nu laigan miu ka' i sabatan daka' nu kota.”

Mompo'ingat anu madi' toho' obau

¹⁰ “Tumpu Allah nu belemiu binalajanji'mo hi mompolee' nu belemiu, i Abraham, i Ishak ka' i Yakub, tukoonyo Ia mombee'mo lipu' aijo' hi belemiu. Kota'nyo to daka-daka' hondo ka' lame', ka' misa' belemiu na nompotinjo'.

¹¹ Laigannyo iwi-iwi' nobuke'mo nu to bala-balang anu to ima-ima', ka' misa' belemiu na nongisii. Komiu montoaje to bubu-bubung ka' misa' belemiu na nongkeke. Belemiu mohumpakmo ale' nu anggur tiba zaitun ka' misa' belemiu na nonsu'ani. De nuboamo nu Tumpu na belemiu i lipu' aijo', ka' iwi-iwi' na anu okahanda'i nu belemiu okaan daagi'mo,

¹² o jaga mae ima-ima' da belemiu boli mongkolilimi Tumpu anu nompobebasmo belemiu lengkat mae i Mesir, i tampat belemiu binotuanan.

¹³ O adati na Tumpu, Tumpu Allah nu belemiu, ka' ola Ia na osombah, ka' de belemiu basumpa', aijo' obau ka' ola sanggo-Nyo na sanggo.

¹⁴ Bolimo monsombah to pilo-pilogot sangga'at anu nu sombah nu bansa-bansa anu mompaha ohani belemiu.

¹⁵ De belemiu monsombahmo to pilo-pilogot sangga'at, saba' belemiu mohumpakmo tambuha' hi Tumpu Allah nu belemiu ka' Nu pateimo iwi-iwi', kalana Tumpu Allah nu belemiu anu aiya hi belemiu madi' mongka'oho' opokakanakon tiba pa' apaa.

¹⁶ Boli monsobai Tumpu Allah nu belemiu susumo anu binaumo miu tempo'nyo i Musa.

¹⁷ Otuluti na atulan iwi-iwi' anu binee'mo nu Tumpu Allah nu belemiu hi belemiu.

¹⁸ Obau apaa anu koonyo nu Tumpu ma'ima' ka' adin, sahingga belemiu mohumpak ka'ima'an. Tano' anu ma'omuk anu jinanji'mo nu Tumpu hi mompolee' nu belemiu timbalimo anu nu belemiu,

¹⁹ ka' o laa'mo nu belemiu na anu monsampobali' belemiu susumo anu jinanji'mo nu Tumpu.

²⁰ Sinaa aiya mae i mihi to ana-anak nu belemiu mompokilawamo hi belemiu, ‘Kadaka' Tumpu Allah-nto mompokaumo kita da montuluti iwi-iwi' na palentah aijo'?’

²¹ Sahingga belemiu tionyo ahi' montaami sumo uuka, ‘Naipuan mae kita tinimbalimo botuan i tomundo Mesir, lantas Tumpu nompobebasmo kita nu kuasa-Nyo anu daka' hondo.

²² Sinakisianmo mami na Tumpu nombau anu okabangangi ka' hahan anu okabuhuk hondo jinadimo hi aha mian Mesir ka' hi tomundo nu aha ka' suele hi iwi-iwi' na anu ko pangkatnyo.

²³ Ia nompobebasmo kita lengkat mae i Mesir ka' binoa-Nyomo mae na kita i aiya ka' tano' aiya binee'-Nyomo hi kita susumo anu jinanji'-Nyomo hi mompolee'to.

²⁴ Tumpu Allah-nto nompokaumo kita da montuluti palentah aijo' iwi-iwi' ka' mongadati Ia. De kita saja' mombau sumo aijo' saba' Ia saja' mompotuu' bansanto da saja' tumuu' ma'ima'.

²⁵ De kita saja' montuluti iwi-iwi' na anu nupalentahkon nu Tumpu Allahnto, saba' Ia saja' sanang hi kita.’ ”