PO'ULE' INGULIT 34 - KITAB NU TUMPU ALLA LELE MA'IMAI'

I Musa sinilakamo

¹ Lantas i Musa nompala'imo hatanyo nu Moab ka' nindakomo i Bungkutnyo nu Nebo, aita' i bawonyo nu Pisga sasu kabete'an lipu nu Yerikho. Ikiijo' mae Tumpu nompotoamo hi ia iwi-iwi' na lipu' aijo', aijo'mo: Da'erah Gilead sasu utara kojo'onnyo toka-toka i kota Dan;

² iwi-iwi' na da'erah i Naftali; da'erah i Efraim, ka' i Manasye, da'erah i Yehuda sasu kinsoban kojo'onnyo toka-toka i Ambai anu i Totonga'nyo;

³ sasu Selatan Yehuda ka' hatanyo lengkat mae i Zoar toka-toka i Yerikho, kota anu manjoo' hondo na kurma.

⁴ Lantas Tumpu notataemo hi Musa, “Aijo'mo na lipu' anu jinanji-Kumo hi Abraham, hi Ishak ka' hi Yakub da baumo anu nu lee' nu aha. Ku potoa hi beleyum Musa, panyo madi'mo ku pobee' na beleyum mamba mokiijo'.”

⁵ Lantas sinilakamo na i Musa posaihon nu Tumpu i tano' nu Moab, susumo anu pinoto'imo nu Tumpu momonanyo.

⁶ Tumpu nolamunmo ia, i sa'angu' na bangka'nyo nu Moab i santoa nu kota Bet-Peor, panyo sampe sinaa uuka aiya madi' ko samian pe'e na monsumbu' hondo-hondo pa' iya mae na kubulannyo.

⁷ I Musa sinilaka umunnyo sa'atumo ka' uampulu' na taun. Kahosonannyo madi' naga'a ka' matanyo daagi ahi' montoa-toa.

⁸ I Hatanyo nu Moab bansa Israel nohangimo i Musa ka' nontoongimo toonyo tinolumpulu' na sinaa na kopinnyo.

⁹ Tumpu nombee'imo kapandean hi Yosua anak i Nun, kalana ia i hangkatmo i Musa mombolosi ia. Bansa Israel tulu-tulutan hondo hi Yosua ka' nombaumo iwi-iwi' na anu pinalentahkonnyomo, anu binee'mo nu Tumpu hi Musa lantas pinotokakonnyomo hi aha.

¹⁰ Hi aha bansa Israel madi'mo ko nabi anu susumo i Musa timbali motatae mompaha ahop ka' mompaha tonto' tiba Tumpu.

¹¹ Madi'mo ko anu moko ala mombau anu okabangangi ka' madi' ko anu opoko ala nubau nu mian susumo anu binaumo i Musa i lipu' Mesir, tomundo'nyo ka' iwi-iwi' na anu ko pangkatnyo susumo anu pinalentahkonmo nu Tumpu.

¹² Madi' ko anu moko ala mombau anu opalias ka' anu okabuhuk susumo anu binaumo i Musa i ahop nu bansa Israel iwi-iwi'. 1