PO'ULE' INGULIT 32 - KITAB NU TUMPU ALLA LELE MA'IMAI'

¹ “Potombihing mae langit, aku kahanda'mo motatae; o tano' potombihing mae.

² O amalakon da pangajalan-Ku tudun mae susumo ujan, ka' potataengku jumuju mae susumo dondu'ok ka' mule' susumo dohidi' tudun i to hempu-hemput, ka' ujan daka' tudun i sosu'anon.

³ Aku mompuji'mo sanggo nu Tumpu, Bebakonmo na katalasanggoan nu Tumpu Allah-nto!

⁴ Tumpu anu baani hondo na Monsangaja'i belemiu, apaa na anu binau-Nyomo na'ima'mo hondo, ka' iwi-iwi' na atulannyo adin hondo. Tumpu Allah nu belemiu madi' baleko' ka' madi' geguan na Ia, Ia saja' mombau anu ma'ima' ka' madi' toho' sala'.

⁵ Panyo belemiu bansa anu madi' mohongo-hongo, ka' madi'mo pantas timbali mian anu pinalesayamo hi Ia, bansa anu saja'mo gineguan ka' saja' mombau dosa'.

⁶ Te sumo aijo' na belemiu mombalosi kanonongan nu Tumpu, o to mia-mian anu pinonga'mo ka' madi'mo ko utoknyo? Te misa' Iamo aijo' na Tuuma nu belemiu, anu Nompotimbalimo belemiu, anu nompojadimo belemiu sa'angu' na bansa?

⁷ O inau' na tempo' naipuan mae, palahatikan na tulunan nu aha anu u'utu mae, Pokilawa hi to tu'a-tu'anyo nu belemiu, da nupoto'i nu aha hi belemiu.

⁸ Salatan Anu Daka' hondo na Kuasanyo nombagimo tano', toto sa'angu' na bansa pinotiju'akonmo na da'erahnyo ka' anu kinuasanmo nu pilogot.

⁹ Panyo lee' mae i Yakub aiya na pinile'anmo nu Tumpu ingala-Nyomo bau bagi-Nyo.

¹⁰ Tinokan-Nyo na aha hau-haunyo jojoong i tampat anu ling hondo ka' ewa, ka' ola saja' padang. Lantas Ia nonjagaimo ka' nompotuu'mo aha ka' jinagaannyo na aha salakumo ia na tumpu-Nyo.

¹¹ Susumo bonyia' anu mompotingaan soma'nyo lumahap nu hakop i tambenyo ka' nu sombung aita' i polipiknyo.

¹² Sumo aijo'mo na Tumpu molaya' mian anu pinalesayamo hi Ia, madi' ko pilogot anu lengkat mae i salipu'an na monsangalui Ia.

¹³ Ia nompotimbalimo aha mongkuasai iwi-iwi' na bungkutnyo; aha mongkaan isi nu ale' ka' monginum juu' nu uani' anu ola i bungkutnyo nu batu. Aha nohumpak lanya' nu kau' zaitun anu tumuu' i tano' anu ko batunyo.

¹⁴ Sapi' ka' mee' ka' domba nu aha pohumpakanmo susu manjoo'; potuu'on nu aha to ima-ima' hondo, gandum ka' anggur nu aha ma'ima' hondo.

¹⁵ Mian anu pinalesayamo hi Tumpu kayamo, panyo saja' moto'idek, aha to lompo-lompo', nobosumo nu kaanon. Lantas aha nompala'imo Tumpu Allah, anu Nompotimbalimo aha ka' madi'mo nongala anu nomposalamatmo aha anu daka' hondo na kuasanyo.

¹⁶ Aha nonsombahmo pilogot, sahingga Tumpu notambuha'mo, kalana aha nongka'ima'imo pilogot Ia notambuha'mo kalana aha nombaumo anu ma'idek aijo'.

¹⁷ Aha nonsombahkon koloban hi tomi-tominuat anu ma'idek anu misa' Tumpu Allah, hi to pilo-pilogot anu madi' nusumbu' nu aha, to pilo-pilogot anu sala'je sinumbu' nu aha, anu madi' nu akui nu mompolee' nu aha.

¹⁸ Aha madi'mo nontapali anu Nomposalamat aha anu daka' hondo na kuasanyo, nongkolilimimo Tumpu Allah nu aha anu nombee'imo kantumuu'an.

¹⁹ Montoa anu sumo aijo', Tumpu notambuha'mo ka' madi'mo mongkalesang to ana-anaknyo.

²⁰ Ia notatae, ‘Aku madi'mo montulungi aha; pojohok Ku toaje pa' mosia na ka ahenannyo mae na aha. Kalana bansa aijo' talalo hondo panggaga ka' madi' hondo mohongo-hongo.

²¹ Aha nonsaduakon aku da nontambuha'i anu misa' Tumpu Allah, ka' nontambuha'imo patong nu bapilogotan nu aha. Sahingga Ku potimbalimo na mian anu pinalesayamo hi beleng-Ku da mongka'idekimo anu misa' bansa, ka' montambuha'i bansa anu ponga'.

²² Aku motambuha' sumomo apu na ko moaknyo anu montoyo'i toka-toka i dunia tampat nu mian anu natemo. Apu aijo' montoyo'imo dunia iwi-iwi' ka' isinyo, ka' to bungku-bungkutnyo toka-toka i bakatnyo.

²³ Sabole-bole saja'mo Ku potoka na balaa' pana'-Ku iwi-iwi' Ku peletakonmo hi aha.

²⁴ Aha matemo kalana nusihabimo nu sakit ka' mo'ohopmo, ka' kalana panyakit anu okabuhuk. Ku pojohokmo na aha da nusa'umo nu binatang anu mahangas, ka' nubahe' nu ulo anu ko bisa'nyo.

²⁵ Pahampatean monsaduakonmo kapatean i iwi-iwi' na jalan; hahan anu okabuhuk mongkonamo to mia-mian anu i laigan. To oli-olitau ka' to lalangkoyang anu tumimpasje opateimo, ka' suele bungamea' ka' mian anu langkai'mo ka' bengkele'mo.

²⁶ Aku kahanda'mo mompatei aha iwi-iwi', da aha madi'mo lewa' o inau'.

²⁷ Panyo aku madi' mongka'oho' sampobali' nu aha Israel kobubuunmo; boli-boli aha sala' na monsangka ka' notatae tukoonyo nu aha, ahamo na nohungku'i mian anu pinalesayamo hi beleng-Ku,’ padahan Aku ahi' na nombaumo han aijo'.”

²⁸ Israel sa'angu' na bansa anu madi' ko pikilan; aha madi' monsumbu' mongalati'i.

²⁹ De aha pande, aha mangalati'mo, ka' mompopikilakonmo apaa na anu saidi' mae jadi i mihinyo hi aha.

³⁰ Mosia na samian moko ala mololoi' samadala na mian, ka' ua'aha na mian monsaduakonmo sampulu' na madala na mian malai? Tumpu, Tumpu Allah nu aha, nompobalukmo aha; aha pinala'ianmo nu Tumpu Allah anu baani ka' daka' na kuasanyo.

³¹ Sampobali' nu aha Israel nonsumbu'mo taalu' anu monjagai aha madi' susumo Tumpu Allah anu monjagai Israel.

³² Kalana kalakuan nu aha ma'idek susumo Sodom ka' Gomora, sumomo kau' anggur anu napakatmo na bua'nyo kalana kino lasungnyomo.

³³ Anggur nu aha kino lasungnyomo nu ulo anu ko bisa'nyo.

³⁴ Nu inau' nu Tumpu apaa na anu binaumo nu sampobali' nu mian anu pinalesayamo hi Ia ka' mohukummo aha de tokamo i tempo'nyo.

³⁵ Tumpuje na mombalosakon ka' mohukum aha, madi'mo pin aha osilakaimo; aha osilakai madi'mo pin na tempo'nyo.

³⁶ Tumpu momposalamatmo mian anu pinalesayamo hi Ia ka' mongkalibosimo to posa-posaihon-Nyo, de Nu toamo na aha madi'mo moko ala mombau apa-apaa ka' madi'mo ko kahosonan.

³⁷ Sahingga nupokilawamo nu Tumpu hi mian anu pinalesayamo hi Ia ‘Iyamo mae na to pilo-pilogot anu mahoson anu talalo hondo otaha'imani nu belemiu?’

³⁸ Aha mongkaan lompo'nyo nu binatang anu sinombahkonmo nu belemiu, ka' monginum anggur anu kinolobanakonmo nu belemiu, Pokau na aha da toka mae montulungi belemiu, da ahaje na timbali montulungi belemiu.

³⁹ Soba toa, olamo Aku sa'a-sa'angu'nyo na Tumpu Allah, madi' ko Tumpu Allah sangga'at, olamo ahi' Aku. Aku mompatei ka' mompotumuu', mombelai ka' mompa'alin. De aku mombaumo apaa na anu ku kahanda'i, madi' ko samian pe'e na anu moko ala mongewa.

⁴⁰ Olamo posi pongka'oho'-Ku, Tumpu Allah anu tumuu', Ku tangkakon na limang-Ku ka' basumpa':

⁴¹ Ku boitmo na bajak-Ku anu jongki-jongkilaban, ka' mompojalanmo hukuman. Ku balosakon na sampobali'-Ku iwi-iwi' ka' Ku hukummo iwi-iwi' na anu mongka'ideki mae Aku.

⁴² Pana'-Ku iwi-iwi' baso'onmo nu baso' nu aha; iwi-iwi' na anu mongewa Aku, Ku pateimo nu bajak-Ku. Madi' Ku pojohok mau mule' pa' ihe na anu mongewa mae Aku; mian anu tinalungku' ka' mian anu binelaonmo suele tionyo ahi' mate.

⁴³ O bansa iwi-iwi', puji' na mian anu pinalesayamo hi Tumpu, kalana Tumpu mohukum iwi-iwi' na anu mompatei aha. Ia na mombalosakon hi sampobali' nu aha panyo mongampuni dosa' nu mian anu pinalesayamo hi Ia.”

⁴⁴ I Musa ka' i Yosua anak i Nun nombasa'mo nyanyian aijo' sahingga iwi-iwi' na bansa Israel nohongomo.

Puusnyomo nu pokinde' i Musa

⁴⁵ Salatan i lapasmo na nompoto'i iwi-iwi' na pangajalan nu Tumpu hi bansa Israel,

⁴⁶ i Musa notataemo, “Palahatikan na palentah iwi-iwi' anu binee'kumo hi belemiu sinaa aiya. Opotingan hi to ana-anak nu belemiu, da aha sabole-bole mombau iwi-iwi' na atulan nu Tumpu.

⁴⁷ Pangajalan aijo' misa' ola potatae anu madi' ko batunyo, panyo bau kantumuu'an nu belemiu. Sabole-bole otuluti na palentah aijo' iwi-iwi' da mantan na umun nu belemiu i lipu' anu madi'mo daagi' pin kajojoonganmo nu belemiu i santoanyo Kaunyo nu Yordan.”

⁴⁸ I sinaamo aijo' suele na Tumpu notatae hi Musa,

⁴⁹ “Lako'mo mokiita' i Bungkutnyo nu Abarim i lipu' nu Moab i santoanyo nu kota Yerikho. Ka' pindakomo i Bungkutnyo nu Nebo ka' tanggalakon mokiijo' na tano' nu Kana'an anu madi'mo daagi' pin Ku bee'mo hi bansa Israel.

⁵⁰ Beleyum silakamo aita' i Bungkutnyo aijo', susumo i Harun utus nu beleyum sinilakamo i Bungkutnyo nu Hor.

⁵¹ Belemiu ohu-ohua' madi' mohongo-hongo Aku ka' madi' mongadati Aku, i ahop nu bansa Israel, tempo'nyo belemiu kiijo' mae i mata nu uee Meriba, koko kota Kades, i padang bola Zin.

⁵² Kalana aijo' belemiu madi'mo timbali minsoop mokiijo' i lipu' anu Ku bee'mo hi bansa Israel; beleyum ola timbali montanggalakon aijo' mae jo'o-jo'on.”