PO'ULE' INGULIT 30 - KITAB NU TUMPU ALLA LELE MA'IMAI'

Balakat nu Tumpu kona hi mian anu pinalesayamo hi Ia ka' hi anu madi'mo mombau dosa'

¹ “Uuka aiya belemiu mompile'imo pa' balakat kabai kutuk susumo anu tinutuhakonmo hi belemiu. De belemiu nongoa'imo kasansala'an aijo' iwi-iwi' ka' tinumuu'mo hi bansa-bansa anu i salipu'an i tampat nu belemiu pinongga'a-ga'atakonan nu Tumpu Allah nu belemiu, belemiu tonginau'mo i apaa na anu pinoki pile'ankumo hi belemiu.

² De belemiu ka' lee' nu belemiu mongka'oho'mo minsusule' hi Tumpu Allah nu belemiu ka' totu-totu'u na kinyonyoa nu belemiu montulutimo palentah-Nyo iwi-iwi' anu binee'kumo hi belemiu sinaa aiya,

³ saba' Tumpu Allah nu belemiu mongkalibosimo belemiu. Belemiu po'ule'mo osule'akon mompala'i bansa-bansa anu pinongga'a-ga'atakonan-Nyomo belemiu, ka' po'ule'mo mongoa'i kasanangan.

⁴ Mau mule' belemiu noga'a-ga'atmo iyaya mae i dunia aiya, Tumpu Allah nu belemiu po'ule'mo momposihuk belemiu ka' po'ule'mo monsule'akon belemiu.

⁵ Sahingga belemiu po'ule' mule' mongala tano' anu naipuan mae kinajojoonganmo nu mompolee' miu. Ka' belemiu lebemo mongoa'i kasanangan, ka' konjoo'nyo nu belemiu lebemo mintuang molingkuduimo mompolee' nu belemiu.

⁶ Belemiu ka' lee' nu belemiu obee'imo kinyonyoa anu mohongo-hongo sahingga belemiu mongkanonongimo Tumpu Allah nu belemiu totu-totu'u i uno nu kinyonyoa nu belemiu ka' sainjojoongmo i lipu' aijo'.

⁷ Iwi-iwi' na kutuknyo aijo' nu pokonamo hi sampobali' nu belemiu iwi-iwi' anu mongkaddeki ka' monsansalaimo belemiu.

⁸ Belemiu po'ule'mo montuluti Tumpu ka' mombaumo palentah-Nyo iwi-iwi' anu binee'kumo hi belemiu sinaa aiya.

⁹ Tumpu Allah nu belemiu mompotimbalimo iwi-iwi' na anu obau miu ko hasinnyomo; belemiu mohumpakmo anak manjoo' ka' potuu'on manjoo'mo; ale' nu belemiu iwi-iwi' ko hasinnyomo manjoo' hondo. Sanangmo na kinyonyoa nu Tumpu mompotimbalimo belemiu da mongoa'imo kasanangan susumo Ia sinanangmo na nombee'imo kantumuu'an sanang hi mompolee' nu belemiu.

¹⁰ Panyo belemiu tionyo ahi' tulu-tulutan hi Tumpu Allah nu belemiu ka' montuluti atulan-Nyo iwi-iwi' anu tinulismo i kitab aiya, i kitab atulan nu Tumpu. Belemiu tionyo ahi' po'ule' minsusule' hi Ia ka' kinyonyoa nu belemiu totu-totu'umo ahi'.

¹¹ Palentah anu ku bee' hi belemiu madi' talalo mahan na obau nu belemiu ka' madi' mule' talalo majo'on.

¹² Tampatnyo misa' i langit sahingga opokilawamo nu belemiu, ‘Ihe na timbali moliba' mokiita' da o alantomo mae, da timbali ohongonto ka' otulutinto?’

¹³ Tampatnyo misa' mule' i santoanyo nu ambai, sahingga opokilawamo nu belemiu, ‘Ihe na timbali mokiijo' i santoanyo nu ambai da o alantomo mae, da timbali ohongonto ka' otulutinto?’

¹⁴ Boli mompokilawa susumo aijo', kalana palentah aijo' ohanimo hondo hi belemiu. Sinumbu'mo nu belemiu ka' timbalimo otaloakon mau madi'mo pilenje o basa', jadi memo samata-mata mombau.

¹⁵ Sinaa aiya belemiu timbalimo mompile'i anu ma'ima' kabai anu ma'idek, tumuu' kabai silaka.

¹⁶ Sinaa aiya ku palentahmo na belemiu da mongkanonongimo Tumpu Allah nu belemiu ka' tulu-tulutanmo hi Ia ka' mule' mombaumo apaa na koonyo nu atulan-Nyo iwi-iwi' ka' palentah-Nyo da mongoa'imo kasanangan ka' timbalimo bansa anu daka'. Tumpu Allah nu belemiu mombalakatimo belemiu i lipu' anu madi'mo daagi' pin baumo kajojoongan nu belemiu.

¹⁷ Panyo de belemiu madi' tulu-tulutan, ka' madi' mongka'oho' mombau anu pinalentahkon-Nyomo ka' mompojohokmo butong nu belemiu da timbalimo ponga' kalana monsombahmo to pilo-pilogot sangga'at,

¹⁸ tantu belemiu osilakaimo ka' umun nu belemiu kodo'mo i lipu' anu madi'mo daagi' pin kajojoonganmo nu belemiu. O inau'! Kalana han aijo' pinoto'ingkumo hi belemiu sinaa aiya.

¹⁹ Uuka aiya opile'imo miu pa' tumuu' kabai silaka, pa' balakat nu Tumpu kabai kutuk-Nyo. Langit ka' tano' ku lagamo da bau sakisi apaa na anu tinaloakonkumo. Pile'i na kantumuu'an.

²⁰ Kanonongi na Tumpu Allah nu belemiu, otuluti na Ia ka' obau apaa na anu pinoto'i-Nyomo. Sahingga belemiu ka' lee' nu belemiu mantan na umun i lipu' anu jinanji'mo nu Tumpu hi mompolee' nu belemiu, hi Abraham, hi Ishak ka' hi Yakub.”