PO'ULE' INGULIT 3 - KITAB NU TUMPU ALLA LELE MA'IMAI'

Israel nompatundu'mo i Tomundo Og

¹ “Lapas aijo' kita nambamo i sasu utara da'erah nu aha Basan. I Og tomundo nu aha Basan nambamo mae tiba iwi-iwi' na suludadunyo nompahampateakonmo kita koko kota Edrei.

² Panyo Tumpu notataemo hi belengku, ‘Boli mabuhuk Musa hi ia. Ku bee'mo na ia, suludadunyo ka' songko-songko na da'erahnyo hi belemiu. Bau na ia susumo anu pinombaumo nu belemiu Sihon, tomundo nu aha Amori anu nompalentah Hesybon.’

³ Jadi Tumpu Allah-nto suele nombee'mo i Tomundo Og tiba layatnyo hi kita ka' aha iwi-iwi' opatundu'tomo.

⁴ Tempo'nyo aitu ingalantomo iwi-iwi' na kota nu aha, madi' ko sa'angu' pe'e na madi' ingala. Iwi-iwi' anompulu' na kota na ingalanto i songko-songko na da'erah Argob anu nu palentah i Tomundo Og anu lengkat mae i Basan.

⁵ Iwi-iwi' na kota aijo' anu mompohoson aijo'mo pagan mesen anu toto tangka-tangkas, sabatan toto daka-daka' ka' ponsupatnyo de o tumbanmo na sabatan toto daka-daka' haha aijo'. Ka' mule' sangga'at manjoo' na kota anu madi' ko pagannyo mesen titikub.

⁶ Iwi-iwi' na kota haha aijo' ingideantomo, ka' iwi-iwi' na mo'ane, boune ka' to ana-anak nu aha pinateantomo, susumo anu binauntomo i kota-kota i Tomundo Sihon anu lengkat mae i Hesybon.

⁷ Potuu'on nu aha ingalantomo ka' kota haha aijo' pinahuhuantomo.

⁸ Tempo'nyo aijo' ingalantomo ohua' na da'erah hi aha ohua' na tomundo Amori aijo' da'erah sasu kabete'an Kaunyo nu Yordan tiba Kaunyo nu Arnon toka-toka i Bungkutnyo nu Hermon. (

⁹ Bungkutnyo nu Hermon nu sanggohi nu aha mian Sidon Siryon, ka' mian nu Amori monsanggohi Senir.)

¹⁰ Ingalantomo iwi-iwi' na da'erah i Tomundo Og anu lengkat mae i Basan mokiijo' lau-laus i sasu kabete'an kojo'onnyo toka-toka i kota Salka tiba Edrei.” (

¹¹ I tomundo Og me sausa'nyo ia, na mian nu aha Refaim. Peti' pinongisian ia sinilaka batu na pina'at ko mantanyo opat na meten ka' ko bolanyo ohanimo ohua' na meten na sukatannyo anu tinantukan. Sampe tempo' uuka aiya daagi' timbali otoa kiijo' i Raba kota nu aha mian Amon.)

To tulu-tulunan nu bansa anu monjojoongi da'erah sasu kabete'an Kaunyo nu Yordan

¹² “Salatan tano' aijo' tinimbalimo anunto binee'-Kumo hi tulunan nu bansa Ruben ka' Gad na da'erah sasu utara kota Aroër koko Kaunyo nu Arnon, ka' sambagian i da'erah bungkutnyo nu Gilead, tibamo kota'nyo iwi-iwi'.

¹³ Obagi ohua' na tulunan nu bansa Manasye sambagian binee'anku labinyo nu da'erah Gilead, ka' mule' da'erah Basan anu toho' pinalentah i tomundo Og, aijo'mo songko-songko na da'erah Argob.” (Basan talasanggo salaku lipu' nu aha mian Refaim.

¹⁴ I Yair tulunan mae nu tulunan bansa Manasye nongalamo songko-songko na da'erah Argob, aijo'mo lengkat mae i Argob toka-toka mokiijo' i potempasan nu Gesur tiba Maakha. Ia nonsanggohi kampung haha aijo' binatukakonnyo i sanggonyo, ka' sampe tempo' uuka aiya daagi' talasanggo salaku kampu-kampung i Yair.)

¹⁵ “Da'erah Gilead binee'kumo hi aha sambonua mae i Makhir anu lengkat mae hi tulunan nu bansa Manasye.

¹⁶ Ka' hi to tulu-tulunan mae nu bansa Ruben ka' hi Gad binee'kumo na da'erah olotnyo nu Gilead tiba Kaunyo nu Arnon. Totonga'nyo nu kaunyo aijo' na salaku bau potempasan nu aha i sasu selatan, panyo sasu utara potempasan nu aha Kaunyo nu Yabok, ka' sambahagiannyo salakumo potempasan tiba lipu' nu aha Amon.

¹⁷ I sasu kinsoban da'erah nu aha nokiita' toka-toka i Kaunyo nu Yordan, lengkat mae i Dowiwi Galilea sasu utara toka-toka i Ambai Mate sasu selatan, lau-laus i tengke nu Bungkutnyo Pisga sasu kabete'an.

¹⁸ Tempo'nyo aitu binee'kumo na palentah aiya hi aha: Tumpu Allah nu belemiu nombee'mo hi belemiu da'erah sasu kabete'an Kaunyo nu Yordan da bau kajojoongan nu belemiu. Panyo to sulu-suludadu miu tionyo ahi' momboa toongon ka' motaap i Kaunyo nu Yordan ka' mamba momona mau ma'isa pe'e na to tulu-tulunan nu aha Israel sangga'at mamba.

¹⁹ Ola to ana-anak tiba bengkele' nu belemiu tiba potuu'on nu belemiu anu manjoo' aijo' na o una' pe'e i kota haha aijo' anu binee'kumo hi belemiu.

²⁰ Tulungi na to mia-mian bubuu' bansa miu sahingga aha monjojoongimo tano' anu nubee'je nu Tumpu Allah miu hi aha, i sasu kinsoban Kaunyo nu Yordan, ka' sahingga Tumpu nonsitujuimo aha tinumuu' ka' na'ima'mo kiijo' mae, susumo anu binau-Nyomo hi belemiu i aiya. Lapasje aitu ka' belemiu timbali minsusule' i tano' nu belemiu anu binee'kumo hi belemiu.

²¹ Lantas aku notataemo hi Yosua: Beleyum nontoamo iwi-iwi' apaa na anu binaumo nu Tumpu Allah miu hi Sihon ka' hi Og, ohu-ohu'a na tomundo aijo'. Sumo aijo'mo na Ia mombau toto samian na tomundo anu kahanda'mo nu ala nu beleyum na tano'nyo.

²² Boli okabuhuk na aha, kalana Tumpu Allah nu beleyum na mahampate monsangaja'i belemiu.”

I Musa madi' pinobee' minsoop i tano' Kana'an

²³ “Tempo'nyo aitu pinoitangkumo hi Tumpu:

²⁴ O Tumpu Anu Matangkas na kuasanto, ku sumbu na anu pinotoamo nu belento hi belengku aiya sala'je tampu'unannyo nu palabuatan anu daka' ka' anu okabangangi apaa na anu saidi' mae obau nu Belento. Madi' ko pilogot sangga'at aita' i langit kabai aiya i dunia anu sumo Belento timbali moko ala mombau hahan anu daka'.

²⁵ Pobee' mae na aku motaap i Kaunyo nu Yordan o Tumpu da montoa lipu' anu ma'omuk kiijo' mae i santoanyo nu da'erah nu Bungkutnyo anu ma'ima' ka' Bungkutnyo nu Libanon.

²⁶ Panyo belemiu nonsaduakonmo Tumpu da pinusa hi belengku sahingga Ia madi'mo nombee' mae apaa na anu pinoitangkumo. Ola mule' ahi' Tumpu notatae, ‘Injahamo Musa, bolimo daagi' nu sanggo na han atina'!

²⁷ Pindakomo i bawo nu Bungkutnyo Pisga ka' tanggalakon mokiijo' i sasu utara ka' selatan, mokiijo' i sasu kabete'an ka' kinsoban. Toa ima-ima' apaa na anu nu toa aijo' mae kalana beleyum madi'mo motaap i Kaunyo nu Yordan.

²⁸ Pokinde'i ima-ima' na i Yosua, posanang na kinyonyoa, kalana iamo na molaya' bansa aijo' mokiijo' i santoanyo da monjojoongi lipu' anu tinoamo nu beleyum aijo'.’

²⁹ Sahingga jinojoongmo na kita i bangka'nyo i santoanyo nu kota Bet-Peor.”