PO'ULE' INGULIT 29 - KITAB NU TUMPU ALLA LELE MA'IMAI'

¹ Aiyamo na anu pinoto'i i uno nu palajanjian, ka' anu pinalentahkonmo nu Tumpu, ka' binaumo i Musa hi bansa Israel tempo'nyo kiijo' mae i tano' nu Moab. Palajanjian aijo' salaku bau pontuangi palajanjian anu binaumo nu Tumpu tiba aha i Bungkutnyo nu Sinai.

Po'ule' mule' nonginau' kanonongan nu Tumpu ka' palajanjian-Nyo

² I Musa nompokaumo aha Mian nu Israel iwi-iwi' da sihuk, lantas notataemo hi aha, “Pinosi toamo nu belemiu apaa na anu binaumo nu Tumpu hi tomundo nu aha Mesir, batu-batu anu ko pangkatnyo ka' songko-songko na lipu'nyo.

³ Belemiu suele nontoamo iwi-iwi' na balaa' anu okabuhuk, anu ma'isa toho' binau nu mian ka' anu okabangangi anu binaumo nu Tumpu.

⁴ Panyo sampe sinaa aiya Ia ma'isa nompobee' belemiu da monsumbu' iwi-iwi' apaa na anu ingoa'anmo miu aijo'.

⁵ Patompulu' na taun na kopinnyo Tumpu nolaya'mo belemiu nontulu padang bola, panyo baju' ka' sandaan miu madi' naluso'.

⁶ Belemiu madi'mo kino roti anu okaan, anggur kabai anu moko palangu na o inum, panyo Tumpu nombee'imo iwi-iwi' apaa na anu opalalui nu belemiu da osumbu' nu belemiu saba' Iamo na Tumpu Allah nu belemiu.

⁷ Ka' salatan kita tinokamo i tampat aiya, Tomundo nu Sihon anu lengkat mae i Hesybon ka' Tomundo nu Og anu lengkat mae i Basan tinokamo nompahampateakonmo kita. Panyo i hungku'antomo na aha.

⁸ Tano' nu aha ingalantomo ka' binee'tomo bau bagi nu aha tulunan nu bansa Ruben, Gad ka' sambahagian anu nu tulunan nu bansa Manasye.

⁹ Jadi tionyo ahi' belemiu saja' montuluti ka' mombau iwi-iwi' na palajanjian aijo' da apaa na anu obau nu belemiu iwi-iwi' mingkaliangan.

¹⁰ Sinaa aiya belemiu iwi-iwi' tuminjo i ahop nu Tumpu Allah nu belemiu, iwi-iwi' na kapala nu tulunan nu bansa, to tu'a-tu'anyo, to kapa-kapala nu suludadu, to momo'ane iwi-iwi',

¹¹ boune, to ana-anak ka' iwi-iwi' na mian anu lengkat mae i salipu'an anu jinojoongmo atina' hi belemiu ka' nontulungimo belemiu nongalapimo kau' anu oposuun ka' nongasuimo uee.

¹² Tumpu Allah nu belemiu nonjanji'mo hi belemiu ka' belemiu iwi-iwi' sinihukmo i aiya da montoongi palajanjian aijo' ka' mule' nongalamo palentah anu tionyo ahi' obau.

¹³ Tiba palajanjian aijo' Tumpu sinaa aiya nohangkatmo ka' nombalakatimo belemiu da timbali bansa-Nyo, ka' Iamo na Tumpu Allah nu belemiu susumo anu jinanji'nyomo hi belemiu ka' hi mompolee' nu belemiu i Abraham, i Ishak ka' i Yakub.

¹⁴ Palajanjian aijo' ka' iwi-iwi' na palentah anu tionyo obau aijo'; binau nu Tumpu misa' ola kona hi belemiu,

¹⁵ panyo kona hi toto samian anu sinaa aiya tinuminjomo i aiya, i ahop nu Tumpu Allah-nto, ka' suele tiba lee'to anu aiya mae i ahop.”

Okutukimo de madi' tulu-tulutan hi Tumpu

¹⁶ “Belemiu daagi' monginau' mosia na sisi'to anu ingoa'antomo kiijo' mae i Mesir ka' mosia na kita i lumajangmo nontulu lipu' nu to bansa-bansa sangga'at.

¹⁷ Tinoamo nu belemiu na to pato-patong nu pilogot nu aha anu monsaduakon da mahumimi' te kau', batu, salaka, ka' mosoni' na binau.

¹⁸ Jadi obala'ingati boli sampe daagi' ko samian atina' hi belemiu mo'ane kabai boune, Utus miu kabai tulunan nu bansa anu tinuminjo i aiya, tolo sule'mo mohikumo Tumpu Allah-nto ka' monsombahmo to pilo-pilogot nu bansa sangga'at. Palabuatan aijo' sumomo bakat anu tumuu' timbalimo kau' mapakat ka' kolasungnyo.

¹⁹ Atina' hi belemiu anu nohongomo palentah anu maboat susumo aijo' boli ko anu bapikin tukoonyo sisi'nyo saja'mo na'ima' mau ia sabole-bole ahi' mombatuki posi pongka'oho'nyo. Han aijo' mongideimo belemiu iwi-iwi', to mia-mian anu ma'idek ka' mule' anu ma'ima'.

²⁰ Tumpu madi' mongampuni mian anu susumo aijo'. Panyo ola ahi' mohumpakmo tambuha' nu Tumpu anu taha-tahahumo, ka' iwi-iwi' na balaa' anu tinulismo i kitab aiya mongkonamo ia, sahingga ia nupateimo nu Tumpu.

²¹ Tumpu mompotimbalimo ia da bau sa'angu' na sonto' kona hi iwi-iwi' na tulunan nu bansa Israel ka' mohukum ia nu kutuk anu sinanggomo i uno nu palajanjian anu tinulismo i kitab aiya, kitab nu Atulan nu Tumpu.

²² I mihinyo mae, lee' nu belemiu ka' mian anu lengkat mae i salipu'an majo'on montoamo balaa' haha aijo', kasansala'an-kasansala'an anu nupotoka mae nu Tumpu i lipu' nu belemiu.

²³ Ale' miu iwi-iwi' madi'mo ma'omuk ka' nutumuu'imo nu padang ka' tabuhonmo nu belelang ka' timuson. Tano'nyo madi'mo timbali posu'anan ka' hemput madi'mo mongka'oho' tumuu' ikiijo'. Lipu' nu belemiu sumomo to kota-kota nu Sodom ka' Gomora, Adma ka' Zeboim anu ingideanmo nu Tumpu tempo'nyo Ia talalomo hondo notambuha'.

²⁴ Sahingga iwi-iwi' na dunia mompokilawamo, ‘Kadaka' Tumpu nombaumo susumo aijo' i lipu' nu aha? Apaa na sababnyo Ia talalomo hondo pinusa susumo aijo'?’

²⁵ Ka' taamnyo nu aijo', ‘Kalana aha nombaleko'imo palajanjian nu Tumpu, Tumpu Allah nu mompolee' nu aha; palajanjian anu binau-Nyo tiba aha tempo'nyo Ia nomboamo aha nosabat lengkat mae i Mesir.

²⁶ Aha nompalesayamo to pilo-pilogot sangga'at anu madi' nusumbu' nu aha, padahan Tumpu nontewa'mo aha monsombah pilogot haha aijo'.

²⁷ Mokonyo aijo' Tumpu pinusamo hi mian anu pinalesayamo hi Ia ka' nompotokamo i lipu' nu aha balaa' iwi-iwi' anu tinulismo i kitab aiya.

²⁸ Pusa nu Tumpu hi aha i lubatakon-Nyomo hondo-hondo ka' pusa-Nyo anu taha-tahahumo aijo' Ia nonsabatakonmo bansa Israel da mompala'imo tano' nu aha ka' nongalinmo aha namba i lipu' nu mian anu i salipu'an sahingga aha kiijo'mo mae.’

²⁹ Daagi' ko to pia-piangkuka na han na anu pinohowini nu Tumpu Allah-nto, panyo atulan-Nyo pinoto'i-Nyomo hi kita, ka' kita tiba lee'to tionyo ahi' montuluti sampe toka sidu-sidutu'.”