PO'ULE' INGULIT 28 - KITAB NU TUMPU ALLA LELE MA'IMAI'

Balakat kona hi mian anu tulu-tulutan

¹ “De belemiu montuluti Tumpu Allah nu belemiu ka' saja' obau ima-ima' na palentah iwi-iwi' anu ku bee' hi belemiu sinaa aiya saba' ia mompotimbalije belemiu bansa anu talalo hondo talasanggo i dunia.

² Tuluti na Tumpu Allah nu belemiu, sahingga iwi-iwi' na balakat aiya obee' hi belemiu:

³ Obalakatimo na kota-kota ka' iwi-iwi' na ale' nu belemiu.

⁴ Obalakatimo na belemiu sahingga to ana-anak nu belemiu manjoo', isi nu ale 'miu molabi-labimo, ka' sapi' tiba mee', ka' domba nu belemiu mompaka pintuangmo.

⁵ Obalakatimo na gandum nu belemiu anu pinadakmo ka' mule' kaanon anu gandum na binau.

⁶ Obalakatimo iwi-iwi' apaa na anu obau nu belemiu.

⁷ De belemiu otumbuhimo, Tumpuje na mohungku'i sampobali' nu belemiu. Mau tangatunmo ka' mahosonmo na aha montumbuhi mae, panyo aha malai ka' mosubali.

⁸ Tumpu Allah nu belemiu mombalakatije apaa na anu obau nu belemiu ka' mongisije alang miu iwi-iwi' nu gandum. Ia mombalakatije belemiu i lipu' anu binee'-Nyomo hi belemiu.

⁹ De belemiu montulutimo Tumpu Allah nu belemiu, ka' mombaumo palentah-Nyo iwi-iwi', belemiu opotimbalimo mian-Nyo anu pinalesayamo hi Ia, susumo anu jinanji'-Nyomo.

¹⁰ Sahingga iwi-iwi' na bansa anu i dunia aiya montoamo taalu' belemiu bansa anu pinile'anmo nu Tumpu ka' aha mongkabuhukmo belemiu.

¹¹ Belemiu obalakatije da mohumpak anak manjoo'. Potuu'on nu belemiu timbalimo manjoo' ka' isi nu ale'miu molabi-labimo i lipu' anu jinanji'mo nu Tumpu hi mompolee' nu belemiu anu binee'mo hi belemiu.

¹² Tumpu montudunakonje ujan de tokamo na lonunyo lengkat mae itampat pinompo'una'an-Nyo anu mabohos hondo aita'mae i langit. Ia mombalakatije iwi-iwi' apaa na anu obau nu belemiu, sahingga belemiu momposabonakonmo hi to bansa-bansa, panyo belemiu madi'mo palalu monsabon.

¹³ Tumpu Allah nu belemiu mompotimbalije belemiu polaya' nu to bansa-bansa, ka' misa anu ola opalentah. De belemiu mombau ima-ima' palentah nu Tumpu iwi-iwi' anu binee'kumo hi belemiu sinaa aiya, belemiu mompaka sanangmo na kantumuu'an ka' madi'mo toho' kakulangan.

¹⁴ Panyo boli hondo-hondo mongkolilimi palentah haha aijo' mau mule' pa' mosiamo. Ka' boli mule' monsombah ka' mompalesaya to pilo-pilogot sangga'at.”

Okutukimo de madi' montuluti

¹⁵ “Panyo de belemiu madi' montuluti Tumpu Allah nu belemiu, ka' madi' mombau ima-ima' palentah iwi-iwi' ka' atulan-Nyo anu ku bee'mo hi belemiu sinaa aiya, saba' iwi-iwi' na kutuk aiya opokonamo hi belemiu:

¹⁶ Okutukimo na kota-kota ka' ale' nu belemiu iwi-iwi'.

¹⁷ Okutukimo na gandum nu belemiu anu pinadakmo ka' anu okaan gandum na anu binau miu aijo'.

¹⁸ Okutukimo na belemiu, sahingga ola sangkiding na anak nu belemiu, isi nu ale' miu, tiba sapi' ka' mee' ka' domba nu belemiu.

¹⁹ Okutukimo apaa na anu obau miu iwi-iwi'.

²⁰ De belemiu mombaumo anu ma'idek, ka' madi'mo mompajuli Tumpu, Nu potokamo saidi' mae na balaa', kahengge'an, kasusa'an i han iwi-iwi' apaa na anu obau nu belemiu, sahingga i uno nu tempo' anu madi' pin, belemiu opateimo iwi-iwi'.

²¹ Panyakit mobolo-bolosmo na mongkona belemiu, ahennyo samian pe'e madi'mo daagi' ko anu jojoong atina' i lipu' nu belemiu.

²² Tumpu mohukumo belemiu iwi-iwi' nu panyakit anu molele, singkaap bangkak ka' monsihabi. Nu potokamo mae na posinaa daka' ka' mombun anu montoyo'i, sahingga anu opadak nu belemiu ma'idekmo. Balaa' haha aijo' saja'mo mongkona belemiu sampe belemiu silaka.

²³ Ujan madi'mo tudun ka' tano' nu belemiu bengkengmo susumo besak.

²⁴ Tumpu madi'mo montudunakon mae ujan, panyo ujanmo abu' ka' bone' sampe belemiu silakamo iwi-iwi'.

²⁵ De belemiu madi'mo montuluti Tumpu Allah nu belemiu, Nu potimbalimo na belemiu da nuhungku'imo nu sampobali' miu iwi-iwi'. Belemiu montoukaimo ahi' totu-totu'u montumbuhi panyo ola ahi' malai ka' mosungkehet. Iwi-iwi' na bansa i dunia aiya mabuhukmo na montoa belemiu anu sinusa'mo susumo aijo'.

²⁶ De belemiu silakamo bangke' nu belemiu timbalimo kaanon nu to tomo-tomonsi' ka' to bina-binatang anu mahangas, ka' madi' ko anu molaa' binatang haha aijo'.

²⁷ Tumpu mohukumo belemiu nu to bisu-bisun susumo anu binau-Nyomo hi aha mian nu Mesir. Butong nu belemiu nukonamo nu sagala anu saja' minana' ka' kumahut anu mombalasi, panyo madi' ko pakuli'nyo.

²⁸ Tumpu mompotimbalimo belemiu da ulawon, mapisokmo ka' madi'mo ko anu opisumbu-sumbu'.

²⁹ Sonsu'un na sinaa belemiu me lewa' mahakanyangan susumo mian anu napisokmo, panyo madi' mohumpak jalan. Iwi-iwi' na anu obau nu belemiu madi'mo ko anu timbali. Belemiu me saja' osansalai ka' obulingi, ka' madi' ko anu montulungi belemiu.

³⁰ De belemiu madi'mo montuluti Tumpu Allah nu belemiu, apaa na anu sinanggomo aiya mongkonamo butong nu belemiu: Belemiu modohoi, panyo mian sangga'at na mongosoai dohoi miu. Belemiu mompotinjomo laigan, panyo madi' ojojoongi miu. Belemiu monsu'animo ale' nu anggur, panyo madi' okaan na bua'nyo.

³¹ Sapi' nu belemiu o kolotmo i ahop nu mata miu, panyo madi' okaan nu belemiu na antoknyo. Keledai nu belemiu singkaapmo o hela' ka' oboa hau-haunyo belemiu montonto'i ia ka' madi'mo osule'akon mae. Domba miu singkaapmo obee' hi sampobali' nu belemiu iwi-iwi' ka' madi'mo ko anu montulungi.

³² I ahop nu mata miu to ana-anak nu belemiu obee'mo salaku posaihon hi mian anu lengkat mae i salipu'an. Sansina-sinaa mata nu belemiu malanitmo na molio to ana-anak nu belemiu, panyo usaha nu belemiu madi' mingkaliangan, kalana aha madi'mo mae minsusule'.

³³ Bansa anu lengkat mae i salipu'an na mongala isi nu ale' iwi-iwi' anu i humpak i lawe nu pakalaja'an miu. Panyo belemiu madi' nohumpak apa-apaa ola mule' ahi' kasansala'an anu ma'idek hondo na i humpak.

³⁴ Belemiu timbalimo ulawon kalana nusaduakonmo nu anu o'oa'i nu belemiu.

³⁵ Nupokonaimo nu Tumpu kumahut na tengke nu belemiu ka' madi'mo ko kapa'alinannyo; lengkat pe'e i tengke toka-toka mokiita' i ubak nu belemiu me saja' kumahut.

³⁶ Belemiu ka' tomundo nu belemiu nuboamo nu Tumpu i lipu' nu mian anu i salipu'an anu madi' osumbu' nu belemiu ka' suele madi' osumbu nu mompolee' miu. Ikiijo' mae belemiu mompalesayamo to pilo-pilogot anu kau' ka' batu na binau.

³⁷ Iyaya mae na lipu' pinongga'a-ga'atakonan nu Tumpu belemiu, to mia-miannyo mabuhukmo na montoa belemiu; belemiu lewa'mo o'aluu ka' nukokojoi nu aha.

³⁸ Manjoo' na bine' anu osauu nu belemiu, panyo sangkiding na bua'nyo anu o humpak nu belemiu, kalana anu osu'an nu belemiu ola ningkot nukaan nu kihi-kihi'.

³⁹ Belemiu monsu'animo iwi-iwi' na ale' nu anggur ka' mompalakai panyo madi' montipu bua' nu anggur kabai monginum anggurnyo, kalana pu'un nu anggur haha aijo' ola mingkot nukaan nu koe'.

⁴⁰ Songko-songko na lipu' nu belemiu tumuu'mo na kau' zaitun, panyo bua'nyo iwi-iwi' ola molosu, sahingga belemiu madi' mohumpak lanya'nyo.

⁴¹ Belemiu mohumpak to ana-anak mo'ane ka' to bou-boune panyo aha singkaap o hakop de mahampatemo, sahingga madi'mo ko ahanyo hi belemiu.

⁴² Iwi-iwi' na kau' ka' anu osu'an nu belemiu mingkot nukekedi nu som.

⁴³ Mian anu lengkat mae i salipu'an anu jojoong i lipu' nu belemiu lebemo mongkuasai, padahan kuasa nu belemiu na ko madi'-madi'nyomo.

⁴⁴ Aha ko doi oposabonakon hi belemiu panyo belemiu madi' ko apa-apaa anu oposabonakon hi aha. Jadi ahennyo belemiu nukuasaimo nu aha.

⁴⁵ Iwi-iwi' na balaa' aijo' montuda'imo belemiu ka' saja'mo mongkabisa'i belemiu sahingga belemiu silakamo, kalana belemiu madi'mo nontuluti Tumpu Allah nu belemiu ka' madi'mo nombau apaa na koonyo nu atulan-Nyo, anu binee'-Nyomo hi belemiu.

⁴⁶ Balaa' haha aijo', salaku tanda hukuman nu Tumpu hi belemiu ka' hi lee' nu belemiu sampe toka sidu-sidutu'.

⁴⁷ Belemiu binalakatanmo nu Tumpu Allah nu belemiu i han iwi-iwi', panyo belemiu madi' mompalesaya Ia nu kinyonyoa anu totu-totu'u ka' madi' mongoa'i sanang.

⁴⁸ Kalana aijo' belemiu tionyo ahi' ta'alukumo hi sampobali' nu belemiu anu sinaimo mae nu Tumpu mongewa belemiu. Belemiu mongoa'ije ohop, mongoa'ije megot ka' langgo' ka' iwi-iwi' na han madi'mo ko anu daagi'. Tumpu mombee'imo kasansala'an anu taha-tahahumo, sampe belemiu silakamo.

⁴⁹ Sa'angu' na bansa anu madi' osumbu' nu belemiu na sisik nu aha nupotokamo mae nu Tumpu lengkat mae i puusnyo nu tano' da mongewa belemiu. Susumo bonyia' nusabutmo nu aha na belemiu.

⁵⁰ Aha talalo hondo buhingison ka' madi'mo ko kalibosan hi to tu'a-tu'anyo kabai hi to ana-anak.

⁵¹ Nu ingkotimo nu aha na potuu'on ka' isi nu ale' miu, ka' madi'mo mompo'una'i da bau bagi nu belemiu na gandum, anggur, lanya' nu zaitun, kabai sapi' ka' mee' ka' domba nu belemiu sampe belemiu silakamo nu ohop.

⁵² Aha tokamo mae montumbuhi toto sa'angu' na kota i lipu' anu binee'mo nu Tumpu Allah nu belemiu hi belemiu sahingga iwi-iwi' na pagan mesen anu toto tangka-tangkas ka' binaumo hoso-hoson, anu otaha'imanimo nu belemiu aijo', mohobo'mo.

⁵³ Hau-haunyo iwi-iwi' na sampobali' nu belemiu montumbuhimo mae kota nu belemiu iwi-iwi', hentemo na kinyonyoa nu belemiu kalana tempo' nu ohop tinokamo sahingga to ana-anak nu belemiu okaanmo nu belemiu, to ana-anak anu binee'mo nu Tumpu Allah nu belemiu hi belemiu.

^54-55 Sadang tulunan nu mian daka' pe'e anu talasanggo ka' ma'ima' na kinyonyoanyo tempo'nyo aha otumbuhimo aijo' suele hentemo na kinyonyoa, sahingga posi to ana-anaknyo nukaanmo kalana madi'mo ko anu okaan sangga'at. Mau pe'e ola sangkiding ia madi'mo mombee'i utusnyo kabai bengkele'nyo anu nu kanonongi kabai to ana-anaknyo anu daagi' tutuu'.

^56-57 Sadang boune tulunan nu mian daka' anu talasanggo ka' ma'ima' na kinyonyoanyo ka' anu kaya hondo sahingga madi' toho' lumajang tengke, mombaumo sumo aijo' suele. Salatan sampobali' nu aha nontumbuhimo mae kota aijo', boune aijo' hentemo na kinyonyoanyo kalana mo'ohopmo, sahingga hoko-hokot kinaannyomo na anaknyo anu sala'je pinohampenyo tiba tobuni'nyo. Mau ola sangkiding madi' binee'annyo na langkai'nyo anu nu kanonongi kabai hi to ana-anaknyo.

⁵⁸ De belemiu madi' tulu-tulutan hi atulan nu Tumpu Allah nu belemiu anu iwi-iwi' tinulismo i kitab aiya ka' madi' mongadati Tumpu Allah nu belemiu, anu talasanggo hondo ka' anu okabangangi.

⁵⁹ Tumpu mompotokamo mae hi belemiu ka' hi lee' nu belemiu to panya-panyakit anu madi' opoko ala opa'alin ka' panyakit anu molele anu madi' opoko ala opakuli'i.

⁶⁰ To panya-panyakit anu okabuhuk anu tinoamo nu belemiu kiijo' mae i Mesir na mongkonamo belemiu, ka' madi'mo ma'alin na belemiu.

⁶¹ Tumpu mule' mompotokamo mae ngangahan nu panyakit ka' anu molele anu madi' sinanggo i kitab aiya, i kitab atulan nu Tumpu. Lantas belemiu osilakaimo.

⁶² Mau mule' konjoo'nyo nu belemiu sumomo mandala' aita' i langit, me sangkiding na anu atina' hi belemiu na daagi' tumuu', kalana belemiu madi' tulu-tulutan hi Tumpu Allah nu belemiu.

⁶³ Susumo Tumpu sanang na mombee'i kabilahian hi belemiu ka' montuangi da belemiu manjoo', Ia mule' sanang na monsilakai ka' mohopu'i belemiu. Belemiu po'ule' mule' osabatakon i lipu' anu madi'mo pin kajojoonganmo nu belemiu.

⁶⁴ Tumpu mongga'a-ga'atakonmo belemiu mamba hi bansa-bansa anu i songko-songko na dunia aiya. Ikiijo' mae belemiu monsombahmo to pilo-pilogot anu kau' ka' batu na binau, to pilo-pilogot anu madi' osumbu' nu belemiu ka' suele madi' nusumbu' nu mompolee' nu belemiu.

⁶⁵ Kiijo' mae hi bansa haha aijo' madi' mohumpak kasanangan nu kantumuu'an, ka' madi' ko tampat anu timbali osanggo anumo nu belemiu; Tumpu mompotimbalimo belemiu da hentemo hondo-hondo madi'mo ko anu otaha'imani.

⁶⁶ Kantumuu'an nu belemiu saja'mo mongahopi balaa' anu montokai mae. Sinaa ka' malom belemiu saja'mo mongoa'i mabuhuk silaka.

⁶⁷ Maumo pa' apaa na anu otoa nu belemiu sule nu belemiu langkakatanmo kalana mabuhukmo. Daagi' subu belemiu monggaganmo da malomo, ka' de malomo belemiu monggaganmo da subu-subumo.

⁶⁸ Tumpu po'ule'mo momboa belemiu mamba mokiijo' i Mesir sumake' kapan, mau mule' Ia toho'mo notatae tukoo-Nyo belemiu madi'mo po'ule' minsusule' mokiijo'. Ikiijo' mae belemiu mompobalukmo butong nu belemiu da timbalimo posaihon hi sampobali' nu belemiu, panyo madi' ko samian pe'e na anu mongka'oho' mongoli belemiu.”