PO'ULE' INGULIT 26 - KITAB NU TUMPU ALLA LELE MA'IMAI'

Palasombahan de mongalamo isi nu ale'

¹ “De belemiu kiijo'mo mae i lipu' anu binee'mo nu Tumpu Allah nu belemiu hi belemiu ka' jinojoongmo ikiijo',

² saba' isinyo momona nu ale' miu tionyo ahi' olimu' miu ka' o isi i basung, ka' oboa miu i tampat anu pinile'anmo nu Tumpu Allah nu belemiu.

³ Mamba hi imam anu mokalaja sinaa aijo' ka' poto'i hi ia, ‘Ku ponyata'mo hi Tumpu Allah nu belento na aku ninsoopmo i lipu' anu jinanji'-Nyomo hi mompolee'to da obee'mo hi kita.’

⁴ Imam mongala basung aijo' i lima nu belemiu ka' mompotimpas i ahop nu mezbah nu Tumpu Allah nu belemiu.

⁵ Lapas aijo' i ahop nu Tumpu Allah nu belemiu, belemiu tionyo ahi' montaloakon sumo uuka: ‘O Tumpu, mompolee'ku mian nu Aram anu namba noyaya. Ia nomboamo auwannyo i Mesir da jojoongmo kiijo' mae salaku mian anu mompalaihakon butong. Tempo'nyo aha nokiijo' konjoo'nyo nu aha ola sangkiding, panyo aha tinimbalimo bansa anu daka' ka' mahoson.

⁶ Mian nu Mesir nongkabisa'imo hondo kami ka' lewa'mo pinakisa na kami mokalaja susumo botuan.

⁷ Lantas kami nongkakasemo da otulungi mae nu belento Tumpu, Tumpu Allah nu mompolee' mami. Belento nohongomo anu kinakase mami, ka' nontoamo anu ingoa'anmo mami, kasusa'an tiba kasansala'an mami.

⁸ Kalana kuasa ka' kahosonan anu daka' hondo, Belento nompobebasmo kami lengkat mae i Mesir. Belento nombaumo anu okabangangi ka' anu ma'isa toho' tinimbali, ka' hahan anu nompopobuhukmo sampobali' nu aha.

⁹ Lapas aijo' belento nomboamo mae kami i aiya ka' nombee'mo tano anu kaya ka' ma'omuk aiya hi kami.

¹⁰ Kalana aijo', o Tumpu, ku sombahkonmo i aiya na isi momona nu ale' anu binee'mo nu belento na tano' hi belengku.’ Lantas potimpasmo na basung aijo' i ahop nu Tumpu Allah nu belemiu ka' sombah na Ia.

¹¹ Montalima kaseh hi Tumpu Allah nu belemiu, kalana nombee'imo anu okaan hi belemiu ka' to ana-anak nu belemiu. O'ende na aha mian nu Lewi ka' mian anu lengkat mae i salipu'an anu jojoong atina' hi belemiu da suele molame'akon susumo aijo'.

¹² De tokamo na taun kototolu'nyo, belemiu tionyo ahi' mombee'mo palasombahan, aijo'mo sambagian anu o ala i sampulu' na bagian na isi nu ale' nu belemiu ka' obee' hi mian nu Lewi, mian anu lengkat mae i salipu'an, to ana-anak anu madi'mo ko tuuma ka' tinanyo tiba anu balu, sahingga i kota-kota nu belemiu mohumpak kaanon anu nupalalui nu aha. De lapasmo,

¹³ motataemo hi Tumpu Allah nu belemiu, ‘Sambagian anu o ala i sampulu' na bagian na isi nu ale', na anu tionyo ahi' osombahkon hi belento, Tumpu, madi'mo ko anu kiijo' i laiganku mau pe'e ola sangkiding; iwi-iwi' binee'kumo hi aha mian nu Lewi, mian anu lengkat mae i salipu'an, anak anu madi'mo ko tuuma ka' tinanyo, ka' anu binalumo susumo anu pinalentahkonmo nu Tumpu Allah-ngku hi belengku. Palentah nu Tumpu mongkona palasombahan, sambagian o ala i sampulu' na bagian, madi' ko anu madi' binaungku.

¹⁴ Palasombahan aijo' mau ola sangkiding madi' ko anu kinaanku mau tempo'nyo aku susa' kalana ko anu sinilaka, kabai binoangku i sambiha'nyo nu laigan tempo'nyo aku hau-haunyo nahumimi'mo kabai binee'kumo salaku kaanon hi mian anu sinilakamo. Aku tinulu-tulutanmo hi belento o Tumpu; iwi-iwi' na anu pinalentahkonmo nu belento, binaungkumo.

¹⁵ I tampat nu belento anu susi' i suluga' sanangmo pe'e mae ahi' na kinyonyoa nu belento montoa ka' mombalakati mae mian nu Israel anu pinalesayamo hi bebelento; balakatiakon mae suele na lipu' anu kaya ka' ma'omuk anu binee'mo nu belento hi kami susumo anu jinanji'mo nu belento hi mompolee' mami.’ ”

Mian anu pinile'anmo nu Tumpu

¹⁶ “Sinaa aiya Tumpu Allah nu belemiu nompalentahmo belemiu da palentah aijo' iwi-iwi' obau; bau ima-ima' na aijo' ka' okinyonyoai ahi' totu-totu'u.

¹⁷ Sinaa aiya belemiu mongakuimo Tumpu salaku Tumpu Allah nu belemiu. Belemiu nonjanji'mo da tulu-tulutan hi Ia, ka' mombau iwi-iwi' na atulan-Nyo tiba palentah-Nyo.

¹⁸ Sinaa aiya, Tumpu nontalimamo belemiu ka' tinimbalimo mian anu pinalesayamo hi Ia susumo anu jinanji'-Nyomo hi belemiu, ka' Ia nompalentahmo belemiu da mombau iwi-iwi' palentah-Nyo.

¹⁹ Tumpu nompotimbalimo belemiu lebe daka' molingkudui iwi-iwi' bansa sangga'at anu pinotimbali-Nyomo, ka' belemiu opuji'mo ka' o adatimo. Belemiu tinimbalimo mian anu pinalesayamo hi Tumpu Allah nu belemiu susumo anu jinanji'Nyomo.”