PO'ULE' INGULIT 25 - KITAB NU TUMPU ALLA LELE MA'IMAI'

¹ Bisuannyo ua'aha na mian nu Israel mamba hi mian kopian mahangkalak i palakala na aha, lantas samian pinoto'imo madi' ko sala'nyo, ka' sangga'at na ko sala'nyo.

² De anu ko sala'nyo opokonai hukuman o doke, mian kopian tionyo ahi' mompokau ia matidahapa. Pimpian na konjoo'nyo ia o doke otoaje pa' sangkuka na konjoo'nyo na anu ma'idek bibinaunyomo,

³ panyo madi' timbali molabi pimpatompulu'. De molabimo, nyata' mian aijo' o ambangimo i ahop nu mian da'isan.

⁴ Boli monsoku' nganga' nu sapi' anu hau-haunyo opake mongutut gandum.”

Apaa na anu tionyo ahi' obau hi samian na utus anu sinilakamo

⁵ “De mian anu moto utus jojoong hingga-hinggat, lantas sala'samian aijo' hi aha sinilakamo panyo madi' ko to ana-anaknyo mo'ane, saba' balunyo aijo' madi' timbali mo'osoa tiba mian sangga'at anu misa' poto utusan anu mompaha ohani mae langkai'nyo. Utusnyo nu anu sinilakamo aijo' na tionyo ahi' mongosoai balu' aijo'.

⁶ Anak mo'ane nu aha anu tumpe tionyo ahi' oposoop anak nu utusnyo anu sini-sinilakamo aijo' da ia ko lee'nyo hi bansa Israel.

⁷ De mian aijo' madi' mongka'oho' mongosoai bengkele' nu utusnyo, boune iajo' tionyo ahi' mangadap hi to pola-polaya' nu kota ka' mompoto'i, ‘Dawok ku madi' mongka'oho' montuluti palentah da utusnyo mohumpak samian na lee'nyo hi bansa Israel.’

⁸ Lantas to pola-polaya' nu kota tionyo ahi' molaga mian aijo' ka' mompoto'i hi ia. De ia tataap madi' mongala,

⁹ bengkele' nu utusnyo aijo' tionyo ahi' mongohani ia i ahop nu to pola-polaya' nu kota, lantas mongukat sandaan nu mian aijo' montupe'i ohupnyo ka' motatae, ‘Sumo aiya na tionyo ahi' pombau mian anu madi' mongka'oho' mombee'i lee' hi utusnyo.’

¹⁰ Auwan nu mian aijo' tolelemo hi aha mian Israel salaku ‘Auwan nu mian anu ingukat na sandaannyo.’ ”

Atulan sangga'at

¹¹ “De ua'aha na mo'ane hau-haunyo mahantuda' ka' bengkele'nyo nu samian, lako'mo montulungi langkai'nyo ka' monjokonmo ka'ambangan nu mo'ane anu mahantuda' tiba langkai'nyo,

¹² patagakon na lima nu boune aijo' boli mongkalibosi ia.

^13-14 Boli mompake timbangan anu mongakali ka' montakan madi' totu'u.

¹⁵ Pake ahi' na timbangan ka' montakan anu tantu da mantan na umun nu belemiu i lipu' anu binee'mo nu Tumpu Allah nu belemiu hi belemiu.

¹⁶ Tumpu Allah nu belemiu mongka'ideki mian anu mongka'ima'i saja' mongakali.”

Palentah da opatei na mian nu Amalek

¹⁷ “O inau' mosia na mian nu Amalek nonsala-sala'imo belemiu tempo'nyo belemiu i lumajang nosabatmo mae lengkat i Mesir.

¹⁸ Aha madi' nabuhuk hi Tumpu Allah ka' nontumbuhimo mae belemiu aitu mae i mihi, salatan belemiu nalawemo ka' madi'mo ko kahosonan, lantas nompateimo iwi-iwi' na mian sangalu miu anu madi'mo noko ala i lumajang aitu mae i mihi.

¹⁹ Mokonyo aijo' de Tumpu Allah nu belemiu mombee'mo lipu' aijo' hi belemiu ka' iwi-iwi' na sampobali' nu belemiu anu kiijo' mae montikubi belemiu madi'mo mompoposia belemiu iwi-iwi' na mian nu Amalek aijo' tionyo ahi' opatei miu sahingga aha madi'mo lewa' o inau'. Boli okolilimi!”