PO'ULE' INGULIT 23 - KITAB NU TUMPU ALLA LELE MA'IMAI'

To mia-mian anu madi'mo timbali mian anu pinalesayamo hi Tumpu

¹ “Mian anu tinokui'mo kabai anu ginuntumanmo na kamo'aneannyo madi'mo timbali minsoop mian anu pinalesayamo hi Tumpu.

² Mian anu i hampeakon, panyo tuuma ka' tinanyo madi' i nika' iwi-iwi' na lee'nyo sampe lapisannyo anu ko sampulu'nyomo madi'mo timbali minsoop mian anu pinalesayamo hi Tumpu.

³ Mian nu Amon ka' Moab tiba lee'nyo nu aha sampe lapisannyo anu ko sampulu'nyomo madi'mo timbali minsoop mian anu pinalesayamo hi Tumpu,

⁴ kalana aha madi' mongka'oho' mombee'i belemiu anu okaan ka' uee tempo'nyo belemiu i lumajang nosabat mae i Mesir. Ka' mule' aha nontamboimo i Bileam anak i Beor anu lengkat mae i kota Petor kiijo' mae i Mesopotamia, da mongkutuki belemiu.

⁵ Panyo Tumpu Allah nu belemiu madi' nompajuli i Bileam. Ka' mule' Ia nombali'imo kutuk aijo' timbali balakat, kalana Ia mongkalibosi belemiu.

⁶ I uno nu kantumuu'an nu belemiu ka' sampe toka sidu-sidutu', boli montulungi bansa haha aijo' kabai mompotimbali aha da sanang na kantumuu'an nu aha.

⁷ Boli monte aha mian nu Edom madi' talakana' kalana aha aijo' utus nu belemiu. Boli suele montee mian nu Mesir madi talakana' kalana belemiu toho'mo jinojoong i lipu' nu aha.

⁸ Lengkat pe'e i lee' nu aha lapisannyo anu ko totolu'nyo ka' sampe toka sidu-sidutu' na lee' nu aha timbali minsoop mian anu pinalesayamo hi Tumpu.”

Kemah kajojoongan nu suludadu madi' timbali mahumimi'

⁹ “De belemiu mahampatemo, tionyo ahi' opimpali nu belemiu na iwi-iwi' anu monsaduakon belemiu sahingga mahumimi'.

¹⁰ De samian mahumimi'mo kalana nonsabatakonmo anu timbali anak tempo'nyo ia hoyo-hoyot, ia tionyo ahi' mompala'imo kemahnyo ka' jojoongmo i sambiha'nyo.

¹¹ Salatan ohanimo malom ia tionyo ahi' mindi'mo ka' de sinaa makakinsapmo, ia timbalimo minsusule' i kemahnyo.

¹² Belemiu tionyo ahi' montoukai tampat i sambiha'nyo nu kemah da bau tololambanan.

¹³ De mongka'oho'mo mokiijo', oboa na anu palalu opake pombaso'i ka' kau' sangkolong bau pongkeke tano' pimbodo'an ka' bau pontabuhi.

¹⁴ Tumpu nu belemiu na montoa belemiu i kemah miu ka' monjagai belemiu ka' mombee'i belemiu ka'untungan de mahampatemo tiba sampobali' nu belemiu. Jadi sabole-bole o inau' da kemah miu tataap belesi'. Boli sampe daagi' ko apa-apaa anu madi' singkosok atina' hi belemiu, da belemiu boli nupala'i nu Tumpu.”

Atulan sangga'at

¹⁵ “De samian na posaihon malaimo, mompala'imo tuannyo lantas tokamo hi belemiu momoita da otoakon na ia, boli osai na ia minsusule'.

¹⁶ Ia timbali jojoong i sala'sa'angu' na kota nu belemiu iya na anu pinile'annyomo, ka' belemiu boli mompokau ia talalomo osigohi.

¹⁷ Aha mian Israel, mo'ane kabai boune madi' timbali mian anu masala' i tampat-tampat ponsomban pilogot.

¹⁸ Ka' mule' suele doi anu o humpak nu aha kalana masala' aijo' madi' timbali oboa i laigan nu Tumpu Allah nu belemiu bau pombayan anu i niatakonmo, kalana Tumpu Allah nu belemiu mongka'ideki anu masala' i tampat-tampat ponsomban pilogot ka' tambonyo nu aha anu nasala'mo.

^19-20 De belemiu momposabon doi hi mian anu lengkat mae i salipu'an belemiu timbali mompoita ueenyo. Panyo de belemiu momposabon doi kabai kaanon kabai langke' sangga'at hi mian sangko bansa nu belemiu, anu oposabon aijo' timbali obee' panyo madi' timbali ko ueenyo. Otuluti totu-totu'u na palentah aijo' da nubalakati nu Tumpu Allah nu belemiu iwi-iwi' na anu obau miu i lipu' kajojoongan nu belemiu.

²¹ De belemiu nonjanji'mo apa-apaa anu obee' hi Tumpu Allah nu belemiu, boli ola saja' konutuko uukaje mae na obee' apaa na anu jinanji'mo aijo', kalana Tumpu Allah nu belemiu saja' sabole-bole momoita, ka' belemiu baladosa'mo de madi' mombee'.

²² Belemiu madi' baladosa' de belemiu madi' nonjanji'mo hi Tumpu.

²³ Panyo de belemiu sinanangmo na nonjanji' hi Tumpu Allah nu belemiu, belemiu tionyo ahi' sabole-bole mombee'.

²⁴ De belemiu hau-haunyo lumajang montului ale' nu anggur nu mian sangga'at, belemiu timbali mongkaan bua' nu anggur sainsukup anu opalalui nu belemiu na konjoo'nyo, panyo madi' timbali mongisi i kalanjang.

²⁵ De belemiu hau-haunyo lumajang montului ale' nu gandum nu mian sangga'at, timbali okaan nu belemiu na gandum anu o tipu miu nu lima panyo madi' timbali o sabit.”