PO'ULE' INGULIT 22 - KITAB NU TUMPU ALLA LELE MA'IMAI'

¹ De sapi' kabai domba anu nu mian sangko bansa nu belemiu anu tinalasmo ka' tinoa nu belemiu na binatang aijo' boli mojalo konutuko madi' ku sumbu', panyo boa na binatang aijo' sule'akon hi tumpunyo.

² De tumpunyo majo'on na laigannyo, kabai madi' osumbu' miu na tumpunyo, boa na binatang aijo' i laigan nu belemiu. De tumpunyo tokamo mae molio, bee'akonmo hi ia.

³ Sumo aitumo suele na belemiu de mongkabot sa'angu' na keledai, sa'angu' na baju' kabai mau mule' pa' apaa na anu nu mian sangko bansa nu belemiu.

⁴ De sa'angu' na keledai kabai sapi' anu nu mian sangko bansa nu belemiu notua'mo i jalan, boli mojalo konutuko madi' ku sumbu', panyo tulungiakon na ia po'ule 'mompotinjo binatang aijo'.

⁵ Boune madi' timbali mompusok baju' susumo mo'ane ka' mo'ane suele madi' timbali mompusok baju' susumo boune, kalana mian anu mombau susumo aijo' nuka'ideki nu Tumpu Allah nu belemiu.

⁶ De belemiu mohumpak sa'angu' na peta nu tomonsi' i kau' kabai i tano', tinanyo hau-haunyo mongokobi nggalau'nyo kabai tiba to soma-soma'nyo, boli mongala tinanyo nu tomonsi' aijo'.

⁷ Timbali o ala miu na soma'nyo nu tomonsi' haha aijo', panyo polapas na tinanyo da lumahap, da mantan na umun nu belemiu ka' kantumuu'an nu belemiu mohumpak kasanangan.

⁸ De belemiu mombaumo laigan, tionyo ahi' ojalaja'i nu belemiu na atopnyo tiku-tikup. Jadi madi' opokona hi belemiu na kasala'an anu manabu' aita' mae i atop aijo' lantas mate.

⁹ Boli monsu'an sosu'anon sangga'at i ale' nu anggur miu, panyo ola ahi' samata-mata anggur, de sabole-bole o su'an miu belemiu madi' timbali mongala hasin nu ale' aijo' maumo anggur, maumo anu sinu'an sangga'at.

¹⁰ Boli momposangalu sa'angu' na sapi' hi sa'angu' na keledai bau pohela' pajeko.

¹¹ Boli mompusok baju' anu kina'ut wol ka' lenan anu sinaintonu-tonun.

¹² Ojambu-jambui opa-opat na pani'nyo nu baju' miu.”

Atulan da mo'ane mongka'ima'imo boune

¹³ “Bisuannyo samian na mo'ane mo'osoamo tiba samian na langkoyang, ka' lapas mae madi'mo mongka'ima'i ia.

¹⁴ Ia monsangka anu madi' totu'u tukoonyo bengkele'nyo toho'mo noduhus mo'ane sangga'at ma'isa pe'e aha aijo' no'osoa.

¹⁵ Han anu sumo aijo' tu'anyo nu boune tionyo ahi' mongala hude nu panganteng anu ko baso'nyo, da bau pomponyata' saba' anak nu aha tempo'nyo aitu ma'isa toho' noduhus tiba mo'ane sangga'at. Hude aijo' tionyo ahi' nupotoa nu aha hi to pola-polaya' nu kota de o ulusmo na palakalanyo.

¹⁶ Tuuma nu boune aijo' tionyo ahi' motatae hi aha, ‘Binee'kumo na anak ku hi mian aiya da timbalimo bengkele'nyo, panyo uuka aiya ia madi'mo mongka'ima'i.

¹⁷ Ia monsangka anu madi' totu'u ka' notatae tukoonyo bengkele'nyo toho'mo noduhus tiba mo'ane sangga'at ma'isa pe'e aha aijo' no'osoa. Panyo aiya na pontoan saba' anak ku tempo'nyo aitu ma'isa toho' noduhus tiba mo'ane sangga'at. Soba toa ima-ima' na pinongkonaan nu baso' i hude nu panganten aiya!’

¹⁸ Jadi to pola-polaya' nu kota tionyo ahi' molaga mo'ane aijo' ka' mondoke ia.

¹⁹ Aha mule' tionyo ahi' mondenda ia sa'atu na doi salaka ka' mombee' doi aijo' hi moniannyo, kalana ia nombusikimo sanggo nu samian na boune nu aha Israel. Ka' mule' boune aijo' tataap bau bengkele'nyo, ka' madi' timbali oga'atakon sampe mate.

²⁰ Panyo de sangka'annyo aijo' memang totu'u, ka' madi' ko pontoan tanda saba' bengkele'nyo aijo' ma'isa toho' noduhus tiba mo'ane sangga'at ma'isa pe'e aha aijo' no'osoa,

²¹ jadi boune aijo' tionyo ahi' oboa i sabatan nu laigan nu tu'anyonyo. I tampat aijo' to momo'ane i kota aijo' tionyo ahi' mompahambunu'akon ia nu batu sampe mate. Boune aijo' nombaumo han anu moko ambang bansanto kalana noduhusmo tiba mo'ane sangga'at ma'isa pe'e no'osoa tempo'nyo ia daagi' jinojoong i laigan nu tuumanyo. Tiba jalan anu sumo aijo' belemiu nombaumo sonto' da bolimo ko anu mombau anu ma'idek susumo aijo'.

²² De samian na mo'ane o hakop hau-haunyo ia noduhusmo tiba bengkele' nu mian sangga'at ua ua'aha tionyo ahi' o hukum mate. Tiba jalan anu susumo aijo' belemiu mombaumo sonto' da bolimo ko anu mombau anu ma'idek susumo aijo'.

²³ Bisuannyo i uno nu kota samian na mo'ane i hakop hau-haunyo ia noduhusmo tiba samian na langkoyang anu ko dohoinyomo tiba mian sangga'at.

²⁴ Han aijo' aha tionyo ahi' oboa i sambiha' nu kota ka' opahambunu'akon nu batu sampe mate. Langkoyang aijo' tionyo ahi' opatei kalana ia madi' nolobo' momoita tulung, padahan aijo' binau i uno nu kota, anu timbali o hongo de ia molobo'. Ka' mo'ane aijo' tionyo ahi' opatei kalana ia noduhusmo tiba langkoyang anu ko dohoinyomo. Tiba jalan mohukum ua-ua'aha sumo aijo' belemiu nombaumo sonto' da bolimo ko anu mombau anu ma'idek susumo aijo'.

²⁵ Panyo madi' pokakana de i ale', samian na mo'ane mambamo mompakisa ka' noduhusmo tiba samian na langkoyang anu ko dohoinyomo tiba mian sangga'at. Han anu sumo aijo' ola mo'ane na tionyo ahi' o hukum mate.

²⁶ Langkoyang aijo' madi' timbali opoposia kalana ia madi' nombau han anu madi' pantas pohukuman mate. Palakala aijo' sumomo palakala nu samian anu nolambani mian sangga'at ka' nompatei.

²⁷ Nompakisa matiduhus aijo' binau i ale', ka' mau mule' boune aijo' nolobo' momoita tulung, panyo madi' ahi' ko mian anu tinoka mae nontulungi ia.

²⁸ Bisuannyo samian na mo'ane i hakop hau-haunyo ia mompakisa moduhus tiba samian na langkoyang anu ma'isa ko dohoinyo.

²⁹ Han anu sumo aijo' ia tionyo ahi' mombayan sompa'nyo hi tuuma nu langkayong aijo' anu angga'nyo sumo limampulu' na doi salaka. Langkoyang aijo' tionyo ahi' baumo bengkele'nyo kalana ia pinakisamo na noduhus, ka' sidu-sidutu' de ia daagi' tumuu' madi' timbali nu ga'atakon.

³⁰ Madi' timbali ko samian anu mongambangi tuumanyo kalana moduhusmo tiba sala'samian na bengkele' nu tuumanyo.”