PO'ULE' INGULIT 20 - KITAB NU TUMPU ALLA LELE MA'IMAI'

Atulan nu mahampate

¹ “De belemiu mambamo mahampate mongewamo sampobali' nu belemiu, boli mabuhuk na montoa kareta anu nupake mae nu aha mahampate ka' ajahan nu aha manjoo' ka' suludadu nu aha anu konjoo'nyo molingkuduimo konjoo'nyo nu belemiu. Tumpu Allah nu belemiu anu nompobebasmo belemiu lengkat mae i Mesir, na montulungi belemiu.

² Ma'isa pe'e mahampate, samian na imam tionyo ahi' mamba mae ka' motatae hi beleyum sumo uuka,

³ ‘To utu-utus soba potombihing mae! Sinaa aiya belemiu mambamo mahampate. Boli mabuhuk kabai hente na kinyonyoa kabai bata-bata!

⁴ Nusangaluije nu Tumpu Allah na belemiu ka' montulungi belemiu, ka' nu bee'je hi belemiu na ka'untungan de mahampate.’

⁵ Lapas aijo' to kapa-kapala nu suludadu tionyo ahi' mompoto'i potatae aiya hi belemiu, ‘Pa' daagi' ko mian anu aiya hi belemiu anu sala'je nompotinjo laigan, panyo ma'isa nombau adatnyo nomposawe'i? De daagi', pinsusule' pe'e na ia. Kalana de ia osilakaimo i uno nu pahampatean, mian sangga'atmo na monjojoongi laigannyo.

⁶ Pa' daagi' ko mian anu aiya hi belemiu anu sala'je nonsu'an anggur i ale'nyo ka' ma'isa ingalanyo na bua' nu anggurnyo? De daagi', pinsusule' pe'e na ia. Kalana de osilakaimo i uno nu pahampatean mian sangga'atmo na monginum anggurnyo.

⁷ Pa' daagi' ko mian anu aiya hi belemiu nodohoimo ka' kahanda'mo mo'osoa? De daagi', pinsusule' pe'e na ia. Kalana de ia osilakaimo i uno nu pahampatean mian sangga'atmo na mongosoai dohoinyo.’

⁸ To kapa-kapala nu suludadu suele tionyo ahi' mompoto'i aiya hi belemiu, ‘Pa' daagi' ko mian anu aiya hi belemiu madi' moko ala mahampate ka' mabuhuk? De daagi', pinsusule' pe'e na ia da boli ia na mongidei kabaanian nu mian sangga'at.’

⁹ Moko lapas na to kapa-kapala nu suludadu motatae hi suludadu, lantas o hangkatmo ahi' na anu mongkapalai toto sa'angu' na gombuannyo nu suludadu.

¹⁰ De belemiu mambamo montumbuhi sa'angu' na kota bee'i pe'e tempo' na mian anu jojoong ikiijo' pa' aha madi' mongewa.

¹¹ De aha montuhea'akonmo tumban nu sabatan daka' nu kota ka' madi'mo mongewa, aha iwi-iwi' tionyo ahi' opotimbalimo posaihon nu belemiu ka' mombau kalaja anu opakisakon nu belemiu.

¹² Panyo de anu jojoong i kota aijo' ka'oho' ahi' mongewa ka' lebe mongka'ima'i da mahampatemo, belemiu tionyo ahi' montumbuhimo kota aijo'.

¹³ Lapas aijo' de Tumpu Allah nu belemiu monsitujuimo da o alamo nu belemiu na kota aijo', tionyo ahi' opatei nu belemiu iwi-iwi' na to momo'anenyo anu jojoong i kota aijo'.

¹⁴ Panyo belemiu timbali mongala to bou-boune, to ana-anak, potuu'on ka' maumo apaa na anu daagi' i kota aijo'. Iwi-iwi' na halata' nu sampobali' miu aijo' timbali opake nu belemiu. Tumpu Allah nu belemiu nombee'mo aijo' hi belemiu.

¹⁵ Tionyo ahi' sumo aijo' na belemiu mombau kota-kota anu majo'on i lipu' kajojoongan nu belemiu.

¹⁶ Panyo de kota aijo' i uno nu da'erah anu binee'mo nu Tumpu Allah nu belemiu hi belemiu, iwi-iwi' na anu jojoong ikiijo' tionyo ahi' opatei.

¹⁷ Susumo anu pinalentahkon nu Tumpu Allah nu belemiu, belemiu tionyo ahi mompatei aha mian nu Het, Amori, Kana'an, Feris, Hewi ka' Yebus.

¹⁸ Opatei na aha da aha madi' monsaduakon belemiu baladosa' hi Tumpu Allah nu belemiu, kalana aha mompogulu'mo belemiu mombau kalakuan anu ma'idek hi pilogot nu aha.

¹⁹ De belemiu mompahampateakonmo sa'angu' na kota ka' nontumbuhimo, panyo pin ohungku'ije boli mompahanta'akon kau' ikiijo' anu bua'nyo okaan. Okaan na bua'nyo haha aijo' panyo boli o idei na kau'nyo, kalana kau' haha aijo' misa' sampobali' nu belemiu.

²⁰ To kau-kau' sangga'at timbali opahanta'akonmo nu belemiu da bau pompagan ka' bau polibaan pontumbuhian miu aha sampe kota aijo' mahungku'mo.”