PO'ULE' INGULIT 18 - KITAB NU TUMPU ALLA LELE MA'IMAI'

Bagi nu to ima-imam

¹ “Iwi-iwi' na tulunan nu bansa Lewi binee'anmo kalaja timbali imam, kalana aijo' madi' timbali mohumpak pombagian tano' i Israel. Pontumuu' nu aha aijo'mo palasombahan-palasombahan ka' anu okolobanakon sangga'at anu obee' hi Tumpu.

² Aha madi' timbali ko tano' susumo tulunan nu bansa sangga'at kalana Tumpumo na bagian nu aha susumo anu jinanji'mo nu Tumpu hi aha.

³ De daagi' ko mian monsombahkon koloban sapi' kabai domba saba' pa'anyo anu sasu saha'annyo, ajenyo ka' kompongnyo nu potuu'on aijo' tionyo ahi' obee' hi to ima-imam da bau bagi nu aha.

⁴ Gandum anu momona o padak, anggur, lanya' nu zaitun ka' bulu nu domba aijo' suele baumo bagi nu aha.

⁵ Iwi-iwi' na tulunan nu bansa Israel ola tulunan nu bansa Lewi na pinile'an nu Tumpu Allah nu belemiu da timbali imam sampe toka sidu-sidutu'.

⁶ De daagi' ko mian nu Lewi anu nolengkat mae pa' i kota apaa anu daagi' i Israel tokamo mae i tampat anu pinile'anmo nu Tumpu ka' mongka'oho'mo jojoong ikiijo',

⁷ ia timbali mokalaja mombau apaa na anu pinalentahkonmo nu Tumpu Allah-nyo salaku imam susumo to mia-mian nu Lewi sangga'at anu binee'anmo kalaja i tampat aijo'.

⁸ Ia tionyo ahi' mohumpak anu okaan pokakana na konjoo'nyo susumo to ima-imam sangga'at; apaa na anu ihumpaknyomo hi to utu-utusnyo suele anunyomo.”

Anu opoliwa' na obau

⁹ “De belemiu ninsoopmo i lipu' anu binee'mo nu Tumpu Allah nu belemiu hi belemiu, boli montiho' bauon anu toto ma'i-ma'idek na nubau nu to bansa-bansa ikiijo'.

¹⁰ Atina' hi belemiu boli ko anu monsombahkon to ana-anaknyo salaku bau koloban anu opotunu. Ka' mau pe'e ola samian boli timbali mian anu lewa' montahi'i molio tanda pa' apaa na jadi, mompake ajimat-ajimat, kabai

¹¹ pangatahuan, kabai lewa' mohondawit i santu' nu mian anu sinilakamo.

¹² Mian anu mombau bauon anu toto ma'i-ma'idek haha aijo' nuka'ideki nu Tumpu Allah nu belemiu ka' aijo'mo na sababnyo sahingga bansa haha aijo' i laa'-Nyomo nompala'i belemiu.

¹³ Jadi tionyo ahi' belemiu mohongo-hongo Tumpu Allah nu belemiu nu kinyonyoa anu totu-totu'u.”

Tumpu Allah nonjanji'mo monsai mae samian na nabi

¹⁴ Lapas aijo' i Musa notataemo, “Bansa haha aijo' i lipu' anu o jojoongije miu aijo' nontulutimo to poki-pokinde' nu mian anu lewa' montahi'i ka' molio tanda pa' apaa na jadi. Panyo Tumpu Allah nu belemiu madi' mompobee' belemiu mombau anu susumo aijo'.

¹⁵ Panyo ola mule' ahi' anu aiya hi posi bansanto na monsai samian na nabi mamba hi belemiu susumo aku aiya ka' tionyo ahi' tulu-tulutan na belemiu hi Ia.

¹⁶ I sinaa kasihukanmo nu belemiu aijo' i Bungkutnyo nu Sinai, belemiu nongkakasemo da belemiu bolimo mohongo Tumpu Allah nu belemiu motatae ka' bolimo montoa Ia toka i uno nu apu anu moak kalana belemiu mabuhuk dumo silaka.

¹⁷ Kalana aijo' Tumpu notataemo hi belengku, ‘Pande hondo na aha nompoita aijo'.

¹⁸ Anu aijo' i posi bansa nu aha na Ku sai mamba hi aha aijo'mo samian na nabi susumo beleyum. Ku poto'ije hi ia apaa na anu tionyo ahi' nu poto'i lantas nu poto'ije i bansa aijo' iwi-iwi' na anu Ku palentahkonmo.

¹⁹ Ia motatae kalana sanggong-Ku, ka' Aku mohukum mau mule' pa' ihe na anu madi' mongka'oho' mohongo ia.

²⁰ Panyo de samian na nabi baani na mompoto'i apa-apaa na potuunon kalana sanggong-Ku, padahan Aku madi' nompokau ia mombau sumo aijo', ia tionyo ahi' mate; sumo aitu mule' batu-batu nabi anu motatae de kalana sanggo nu to pilo-pilogot sangga'at tionyo ahi' mate.’

²¹ Ugat belemiu motatae i uno nu kinyonyoa, ‘Mosia na kami monsumbu' potuunon nu samian na nabi aijo' nolengkat mae hi Tumpu kabai misa'?’

²² De samian na nabi motatae kalana sanggo nu Tumpu, panyo anu nu taloakon aijo' madi' jadi, saba' anu tinahi'annyo aijo' nyata' misa' anu nolengkat mae hi Tumpu. Nabi aijo' motatae posi pongka'oho'nyo, jadi boli okabuhuk na ia.”