PO'ULE' INGULIT 15 - KITAB NU TUMPU ALLA LELE MA'IMAI'

Taun ko popitu'nyo

¹ “De kapupusannyomo nu taun anu ko popitu'nyomo belemiu tionyo ahi' mohapusmo samaya' nu belemiu.

² Sumo uuka na mongatun. Batu-batu mian nu aha Israel anu momposabon doi hi aha mian sangko bansanyo, tionyo ahi' mohapusmo samaya'nyo aijo', kalana Tumpu nompoto'imo samaya' aijo' i hapusmo jadi madi'mo daagi' timbali opoita.

³ Belemiu timbali mompoita doi anu pinosabonmo miu hi mian anu lengkat mae i salipu'an, panyo madi'mo timbali po'ule' mompoita doi anu pinosabonmo miu hi mian anu bubu' bansa nu belemiu.

⁴ Nubalakatije nu Tumpu Allah nu belemiu na belemiu i lipu' anu binee'-Nyomo hi belemiu. Sahingga atina' hi bansa miu madi' ko anu kasiasi,

⁵ asan belemiu tulu-tulutan hi Tumpu Allah nu belemiu ka' pagala ahi' o intomakon na mombau iwi-iwi' anu pinalentahkon-kumo hi belemiu sinaa aiya.

⁶ Nubalakatije nu Tumpu Allah nu belemiu na belemiu susumo anu jinanji'-Nyomo. Belemiu momposabon doi hi to bansa-bansa panyo belemiu na madi' ahi monsabon; okuasaimo miu na to bansa-bansa panyo aha madi' mongkuasai belemiu.

⁷ De saidi' mae belemiu jojoongmo i lipu' anu binee'mo nu Tumpu Allah nu belemiu hi belemiu, lantas i sala'sa'angu' na kota nu belemiu daagi' ko mian anu sangko bansa nu belemiu kasusa'anmo, boli mosi tutugi kapentingan nu belemiu, ka' madi' mongka'oho' montulungi ia.

⁸ Ola ahi' belemiu tionyo ahi' mongkanonongi ka' monsaboli mian aijo' konjoo'nyo yayamo anu nupalalui nu mian aijo'.

⁹ Sabole-bole oposaboni na ia, ka' boli bau sabab tukooyum taun anu ponghapusanmo samaya' ohanimo. Boli obau na pikilan anu ma'idek susumo aijo' minsoop i kinyonyoa nu belemiu. De madi' mongka'oho' momposabon, mian aijo' motataemo hi Tumpu mongkalak belemiu, sahingga belemiu opoto'i sinala'mo.

¹⁰ Tiba kinyonyoa anu sanang ka' halala' na mombee' hi ia, sahingga Tumpu Allah nu belemiu mombalakatije iwi-iwi' na anu obau miu.

¹¹ Hi aha mian nu Israel saja' ko mian to pia-piangkuka anu kasiasi ka' kasusa'an. Kalana aijo' Ku palentahkon hi belemiu da manonong hi aha.”

Mosia na mompalentah to posa-posaihon

¹² “De samian na mo'ane kabai boune anu itina' hi bansa nu belemiu mompobaluk butongnyo da timbali posaihon nu belemiu, ia tionyo ahi' mokalaja mombau anu opoto'i miu anom na taun na kopinnyo. I taun anu ko popitu'nyomo ia tionyo ahi' opobebasmo.

¹³ Posaihon anu pinobebasmo aijo' madi' timbali ola opojohok mamba ola lima sampulu'.

¹⁴ Obee'i na ia apaa na anu binee'mo nu Tumpu Allah nu belemiu hi belemiu, ka' sanang ahi' na kinyonyoa mombee'i mee' ka' domba, gandum ka' anggur.

¹⁵ O inau' ahi' na belemiu naipuan mae binau botuan i Mesir lantas pinobebasmo nu Tumpu Allah nu belemiu; mokonyo aijo' Aku mombee'i palentah aiya hi belemiu.

¹⁶ De posaihon aijo' madi'mo mongka'oho' mamba kalana kina'ima'annyomo na belemiu ka' to ana-anak miu sanang, na ia jojoong hi belemiu,

¹⁷ boa na ia i sabatan nu laigan miu ka' susuk na bihingnyo, jadi ia timbalimo posaihon nu belemiu sidu-sidutu'. Sumomo aijo' suele na belemiu mongatun posaihon miu boune.

¹⁸ De belemiu mompobebasmo samian na posaihon, boli mompele-pele', kalana anom na taun na kopinnyo ia nokalajamo hi belemiu padahan tambo nu samian na posaihon ola mintonga' na bagian na i humpaknyo. Bau na palentah aijo' sahingga nubalakatije nu Tumpu Allah nu belemiu iwi-iwi' na anu obau nu belemiu.”

Anak nu sapi' mee' ka' domba anu momona pino'anaknyo

¹⁹ “Anak nu sapi', mee' ka' domba lakinyo anu momona pino'anaknyo tionyo ahi' osombahkon hi Tumpu Allah nu belemiu. Sapi' aijo madi'mo timbali bau pohela' pajeko, ka' domba aijo' madi'mo timbali o kis.

²⁰ Sataun toka sataun belemiu salaigan tionyo ahi' mongkaan antoknyo i ahop nu Tumpu Allah nu belemiu i tampat anu pinile'anmo nu Tumpu.

²¹ Panyo de potuu'an aijo' ko panyakitnyo, maluannyo pengko' kabai mapisok kabai ko panyakitnyo sangga'at anu tahahumo, belemiu madi'mo timbali monsombahkon binatang aijo' hi Tumpu Allah nu belemiu.

²² Batu-batu mian anu belesi' kabai anu mahumimi' timbali mongkaan aijo' i laigannyo, susumo mongkaan antok nu jonga kabai antoknyo nu kijang.

²³ Baso'nyo madi' timbali okaan, panyo tionyo ahi' obubusakon i tano' susumo uee.”