PO'ULE' INGULIT 13 - KITAB NU TUMPU ALLA LELE MA'IMAI'

¹ De ko samian na nabi kabai anu monsumbu' mongahat ipion monnyanyimo sa'angu' na anu okabangangi kabai anu okahelani,

² kalana ko kahanda' da belemiu monsombah ka' palesaya hi to pilo-pilogot anu madi' osumbu-sumbu' nu belemiu, mau mule' apaa na anu jinanji'nyomo aijo' totu-totu'u jadi,

³ boli montapali mian aijo'. Tumpu Allah nu belemiu mompake mian aijo' kahanda' da monsobai belemiu kalana ko kahanda' montoa pa' totu-totu'u na belemiu mongkalibosi Tumpu totu-totu'u kabai madi'.

^4-5 Mian anu susumo aijo' hukumannyo tionyo ahi' opatei, kalana kahanda'mo momposangkalinga belemiu da boli montuluti, jalan a nu pinalentahkonmo nu Tumpu Allah nu belemiu hi belemiu. Ia mian anu ma'idek kalana mompokaumo belemiu da motomuhuk hi Tumpu Allah nu belemiu anu nompobebasmo belemiu nompala'imo mae Mesir, tampat nu belemiu binotuanan. Jadi ia tionyo ahi' opatei, da anu ma'idek aijo' madi'mo saja' obau. Panyo belemiu tionyo ahi' mombatuki Tumpu Allah nu belemiu ka' mongadati Ia, otuluti na Ia, ka' obau na palentah-Nyo iwi-iwi'. Sabole-bole saja' otuluti ka' opalesaya na Ia.

^6-7 De utus nu belemiu kabai anak nu belemiu mo'ane kabai boune, kabai bengkele' nu belemiu anu okalibosi nu belemiu kabai sangalu anu mompahakona hondo belemiu madi' osumbu-sumbu' taalu' nonsale'imo belemiu da monsombah to pilo-pilogot sangga'at nu to bansa-bansa anu jojoong ohani kabai majo'on,

⁸ boli o hongo na ia ka' boli opobee' na butong nu belemiu nupagala nusale'i nu aha. Boli mule' mongkalibosi kabai monsangaja'i mian aijo'.

^9-10 Ia tionyo ahi' opahambunu'akon nu batu sampe mate. Beleyum na tionyo ahi' momona mombunu' ia, lapas aijo' nubatukije nu mian da'isan. Mian anu ko sala'nyo aijo' tionyo ahi' opatei, kalana ia ko kahanda' mompojo'on belemiu hi Tumpu Allah nu belemiu anu nompobebasmo kita tempo'nyo binau botuan i Mesir.

¹¹ Sahingga iwi-iwi' na bansa Israel mabuhukmo kalana nohongomo lele nompatei aijo' sahingga madi'mo daagi' ko samian na anu mombau kalakuan anu ma'idek sumo aijo'.

¹² De saidi' mae belemiu jojoongmo i kota haha kiijo' anu nubee' nu Tumpu Allah nu belemiu hi belemiu, tantu togilelemo na sisik,

¹³ daagi' ko to pia-piangkuka na mian anu ma'idek itina' i bansa nu belemiu anu nonsaduakonmo da pinonga' na mian nu kota binapikin sahingga nonsombahmo to pilo-pilogot anu madi' osumbu' nu belemiu.

¹⁴ De o hongo na sisik anu susumo aijo' opinasa pe'e totu-totu'u.

¹⁵ De anu ma'idek aijo' totu-totu'u jinadimo, saba' iwi-iwi' na anu jojoong i kota aijo' tibamo potuu'on nu aha tionyo ahi' opateimo. Kota aijo' tionyo ahi' o ideimo bolimo ko anu opotuha'.

¹⁶ Iwi-iwi' na halata' nu anu jojoong i kota aijo' tionyo ahi' otoluki ka' opotambun i tanalapang, lantas iwi-iwi' na halata'nyo tionyo ahi' opapui salaku koloban anu osombahkon hi Tumpu Allah nu belemiu. Lapas aijo' opala'imo nu belemiu da timbalimo tampat salaku bau tanda pinompapuan ka' madi'mo timbali daagi' po'ule' opotinjo.

¹⁷ Pakakas haha aijo' anu kinutukanmo madi'mo timbali opo'una' da bau pakakas miu, panyo tionyo ahi' o ideimo hondo totu-totu'u. Da madi'mo Tumpu motambuha' ka' Ia mongkalibosimo belemiu. Ia mongkanonongimo belemiu ka' mompotimbalimo belemiu bansa anu daka' susumo anu jinanji'-Nyomo hi mompolee' nu belemiu,

¹⁸ asan belemiu montuluti totu-totu'u iwi-iwi' na palentah-Nyo anu pinotokakonkumo hi belemiu sinaa aiya, ka' mombau iwi-iwi' apaa na anu Nu ka'ima'i.”