PO'ULE' INGULIT 10 - KITAB NU TUMPU ALLA LELE MA'IMAI'

Kopinduannyomo na i Musa nontalima Sampulu' na Palentah nu Tumpu Allah

¹ “Lapas aijo' Tumpu notataemo hi belengku, ‘O Musa, pa'at ohua' na kobakan nu batu sumo anu momonanyo, ka' bau mule' sa'angu' na peti' kau' da ponguna'an, lantas tokamo mae hi belengKu aita' i bungkutnyo.

² I batu haha aijo' Ku tulisje na potatae anu pokakana susumo batu anu tinumpakonmo nu beleyum; lapas aijo' batu haha aijo' tionyo ahi' nu posoop i uno nu peti' aijo'.’

³ Lantas binaungkumo na peti' kau' akasia na binau ka' nompa'atmo ohua' na batu susumo anu momonanyo ka' binoamo nokiita' i bungkutnyo.

⁴ I batu aijo' Tumpu nontulisimo Sampulu' na Palentah Pokakana anu uuka mae momona, aijo'mo to pale-palentah anu binee'-Nyomo hi belemiu, tempo'nyo Ia notatae i totonga' nu apu i sinaa kinasihukanmo nu belemiu i tengke nu bungkutnyo. Lapas aijo' Tumpu nombee'mo mae batu anu tinulisanmo aijo' hi belengku

⁵ lantas aku ninsusule'mo nintatau' lengkat mae aijo' i bungkutnyo. Lantas susumo koonyo nu palentah nu Tumpu, ohu-ohua' na batu aijo' pinosoopkumo i uno nu peti' anu binaungkumo – ka' tempo'nyo pe'e aitu sampe uuka aiya ohu-ohua' na batu anu tinulisanmo aijo' daagi' ikiijo'.” (

⁶ Lapas aitu aha mian nu Israel nambamo mae lengkat i bubung haha kiijo' anu nu aha, mian nu Yaakan ka' namba mule' i Mosera. Ikiijo' mae i Harun sinilakamo ka' i lamunmo. Anaknyo i Eleazar na nombolosakon ia tinimbali imam.

⁷ Lengkat ikiijo' nambamo na aha i Gudgod, lantas nambamo nokiijo' i Yotbata, da'erah anu manjoo' na ueenyo.

⁸ I bungkutnyo aijo' pinoto'imo nu Tumpu na tulunan nu bansa Lewi da samata-mata mongkalesang Peti' Palajanjian ka' mombau anu nu palentahkon nu Tumpu, ka' mule' montaeakon balakat hi mian anu pinalesayamo hi Ia. Aijo'mo na kalaja nu aha sampe uuka aiya.

⁹ Kalana aijo' tulunan nu bansa Lewi madi'mo mohumpak tano' da bau pusaka' nu aha, susumo anu pinoto'imo nu Tumpu Allah nu belemiu hi aha.)

¹⁰ “Pinatompulu' na sinaa ka' pinatompulu' na pihi na aku jinojoong aita' i bungkutnyo susumo anu binaungkumo uuka mae momona. Daagi' ininsan na Tumpu nohongo aku ka' Ia sinetujumo madi' monsilakai belemiu.

¹¹ Lantas sinai-Nyomo na aku da mamba molaya' belemiu da timbali montumpui tano' anu jinanji'-Nyomo hi mompolee' miu.”

Poitaon nu Tumpu

¹² “Uuka aiya to Utu-utus, palahatikan apaa na anu nupoita nu Tumpu Allah nu belemiu hi belemiu: O'adati na Tumpu Allah nu belemiu ka' baumo iwi-iwi' na palentah-Nyo.

¹³ Kanonongi na Ia ka' sombah na Ia, i uno nu kantumuu'an nu beleyum totu-totu'u. Otuluti iwi-iwi' na palentah nu Tumpu sinaa aiya anu pinotokakon hi belemiu da bau ka'ima'an nu belemiu.

¹⁴ Tumpu Allah nu belemiu ko langit-Nyo matangkas; ka' ko tano'-Nyo ka' iwi-iwi' apaa na anu daagi' aijo' i tano'.

¹⁵ Panyo kalibosan anu taha-tahahumo nu Tumpu Allah hi mompolee' miu, sahingga mau manjoo' na bansa panyo belemiu na pinile'an-Nyo, ka' sampe tempo' uuka aiya belemiu mian-Nyomo anu pinile'anmo.

¹⁶ Jadi mulai uuka aiya belemiu tionyo ahi' tulu-tulutan hi Tumpu ka' bolimo daagi' panggaga.

¹⁷ Tumpu Allah nu belemiu i bawo nu iwi-iwi' na pilogot ka' molingkudui iwi-iwi' na kuasa. Ia Tumpu Allah anu talasanggo ka' daka' na kuasa-Nyo ka' anu tionyo ahi' otuluti. Ia madi' mongka'ima'i momposambiha' ka' madi' mongka'oho' da otamboi asan opo'untung i palakala.

¹⁸ Ia mongala-alapakon hak nu anak anu madi' ko tuumanyo ka' tinanyo, ka' to balu-balu da adin na mongulus palakala nu aha; Nu kalibosi na mian anu lengkat mae i salipu'an anu mo'imboa hingga-hinggat bansanto ka' mombee'i aha anu okaan ka' anu opake.

¹⁹ Jadi belemiu suele tionyo ahi' mompotoa kalibosan miu hi to mia-mian anu lengkat mae i salipu'an aijo', saba' u'utu mae belemiu suele mian anu lengkat mae i salipu'an kiijo' mae i Mesir.

²⁰ O'adati na Tumpu Allah nu belemiu, ka' ola Ia na osombah. Tionyo ahi' belemiu saja' tulu-tulutan hi Ia, ka' basumpa' ola samata-mata hi sanggo-Nyo.

²¹ Opuji' na Ia kalana Ia Tumpu Allah nu belemiu. Posi matamo nu ubak miu na nontoa palabuataan anu toto daka-daka' hondo ka' okabuhuk apaa na anu binau-Nyo hi belemiu.

²² Tempo'nyo mompolee' nu belemiu nambamo i Mesir, konjoo'nyo nu aha ola pitumpulu' na mian. Panyo Tumpu Allah nu belemiu nomponjoo'mo belemiu susumo konjoo'nyo nu mandala' haha aita' i langit.”