NYANYIAN ANU TALASANGGO 8 - KITAB NU TUMPU ALLA LELE MA'IMAI'

¹ O, de ugaat beleyum utus omput nu pusongku, anu toho' nonsusu hi tinangku, beleyum tantu ku ookimo de singkabot i jalan, madi' ko anu mongalu aku.

² Beleyum ku boamo i laigan nu tinangku, da beleyum mompogulu' mae aku, Beleyum ku po inumimo anggur anu ma'ima' hondo, tiba ueenyo nu bua' nu dalima.

³ Lima kowi nu beleyum na monsakan mae aku, lima kowi nu beleyum na montanggogoli mae aku.

⁴ Balajanji'mo na belemiu to lalangkoyang nu Yerusalem, saba' belemiu madi' monggoda sindua'anku, sampe ia ma osamo.

Nyanyian anu ko anomnyo To bou-boune

⁵ Ihe na aijo' anu tinokamo lengkat mae i padang anu mateges, natisehamo hi sindua'annyo? Ku bulaakon na beleyum male-male' i patu nu kau' apel, i tampat beleyum kinandung ka' pinohampe.

Boune

⁶ Pojadi mae na aku anu saja' nu una' ikinyonyoa nu beleyum, boli montanggogoli maumo pa' ihe, ola ahi' samata-mata aku; saba' sindua'an aijo' kohosonnyo sumo kohosonnyo nu kapatean, ka' napisu aijo' balakuasa susumo suele kapatean. Moaknyo sumomo moak nu apu, anu kinonyela-nyelakmo daka' hondo.

⁷ Uee mau manjoo' madi' moko ala mompopoho' sintaku, ka' mule' iaba' madi' moko ala monganjuhakon. De daagi ko samian mombee' iwi-iwi' na halata'nyo, da bau ponsulang sinta, tantu ola ahi' ia mohumpak pompopo' ambang.

To utu-utus mo'ane ka' boune

⁸ Kami daagi ko samian na boune utus ise', anu daagi ise' na susunyo, Apaa na anu obau mami hi ia, de ko samian anu tokamo mae monduta ia?

⁹ De bisuanyo ia sa'angu' na pagan mesen, kami mompotinjomo menara salaka aita i buannyo. De bisuanyo ia sa'angu' na sabatan daka' kau'mo lontio' na bau ponsupati mami.

Boune

¹⁰ Aku aiya sumomo sa'angu' na pagan mesen, ka' susungku na baumo menaranyo, Sindua'anku nonsumbu'mo saba' hi iamo na aku mohumpak kabilahian.

Mo'ane

¹¹ I Salomo ko ale' nu anggur kiijo' i Baal-Homon; ale aijo' binee'nyomo hi anu lewa' nonjagai. Toto samian mombayan samadala na takeannyo nu doi salaka salaku bau hasinnyo,

¹² ka' mohumpak ua' atu bau tambo nu lawenyo. Bakasmo na doi aijo' baumo bagi nu beleyum Salomo, ka' mule baumo bagi nu anu lewa' monjagai ale' nu beleyum nabahagian sangga'at Panyo ale' nu anggurku na aku ahi' na tumpunyo, aiya i ahopku.

¹³ O, anu jojoong i ale' to sanga-sangalu kahanda'mo mohongo potatae nu beleyum, pohongoakon mae na aijo' hi belengku!

Boune

¹⁴ Sindua'anku tokamo mae susumo kijang, Sumomo anak nu jonga i bungkutnyo nu Beter.