NYANYIAN ANU TALASANGGO 5 - KITAB NU TUMPU ALLA LELE MA'IMAI'

Mo'ane

¹ Aku tinokamo i ale'ku, sindua'anku pangantinku. Ilimu'kumo na mur tiba lampa-lampangku potik tiba juu' nu uani'ku kinaankumo inginumkumo na susu tiba uee nu anggurku. Pongkaanmo ka ponginumo to sanga-sangalungku. Inummo sampe nu osaimo na sindua'anku.

To bou-boune Nyanyian ko opatnyo Boune

² Aku i hoyotmo panyo kinyonyoangku madi' hoyot. Hongo pe'e, sindua'anku nongkutetekmo tumban. Tuhea'akonmo mae na tumban langkoyang sindua'anku, malapati'ku anu saja' o inau' nu kinyonyoangku; Ubaku nohomemo nu dondu'ok, bulu nu ubaku kahomo jinujuhan nu dondu'ok pihi-pihi.

Mo'ane Boune

³ Baju'ku ingukatakonkumo; pa' daagi' ahi' po ule' ku pusok? Tengkengku binaso'ankumo pa' daagi ahi' po ule' ku pohumimi'?

⁴ I lantutukanmo na kinyonyoangku, kalana sindua'anku nontoongimo pontoongian kunsi nu tumban.

⁵ Sahingga no bulamo na aku, kahanda' po ule' montuhea'akon tumban da minsoop mae na sindua'anku. Mur jinumujumo lengkat aiya ilimangku tiba i kangkam nu limangku, nohumpisimo pontoongian supat nu tumban.

⁶ Tinuhea'akon-kumo na tumban da minsoop mae sindua'anku, panyo ia nobalikmo ka'nambamo. Talalo hondo ku indi na potataenyo; iliongku na ia panyo madi' kino hasinnyo. I lagangku na sanggonyo; panyo ia madi' mae nontaami.

⁷ Aku siningkabotanmo nu anu monjagai kota'; binobotanmo mae nu aha ka' nombelaimo mae aku, salendang ku pinakisamo ingala nu aha.

⁸ Balajanji'mo na belemiu to lalangkoyang nu Yerusalem, poto'i hi ia saba' aku talalomo nongka'ima'i ia.

To bou-boune

⁹ Pa' sindua'an nu beleyum na molingkudui sindua'an nu sangga'at, o langkoyang anu talalo ahi' tingkai'on? Pa' sindua'an nu beleyum na molingkudui sindua nu sangga'at, sahingga beleyum nonsaimo kami balajanji'?

Boune

¹⁰ Sindua'anku handa ka' tingkaion, lebe molingkudui aha anu sampulu' na madala na mian.

¹¹ Ubaknyo mimbalu-balu' susumo mosoni', mosoni' anu madai' kogalo'nyo, bulu nu ubaknyo kudengkeng ka' mule' mo itom, ko itomnyo mimbalu-balu' susumo papaa'.

¹² Matanyo mimbalu-balu' malapati' aita' mae i mata nu uee, malapati' nindi'mo nu susu suha-suhang i biwi nu kolam.

¹³ Gagisingnyo sumomo ale' nu lampa anu to noho-nohong, biwinyo sumomo bunga bakung anu monjujuhakon mur anu madi' ko galo'nyo.

¹⁴ Limanyo ma'ima' hondo ko sinsingnyo mosoni' ka' ko matanyo, butongnyo mimbalu-balu' bese' nu gaja binunga-bungaan nu batu nilam.

¹⁵ Tengkenyo sumomo ohi' mar-mar anu mopute', anu ilatasan nu mosoni' anu madi' ko galo'nyo. Tambong nu butongnyo sumomo ko ima'nyo nu bungkutnyo nu Libanon, ka ko hosonnyo sumomo kau' aras.

¹⁶ De ia motatae sanang hondo na mohongo, iwi-iwi' na anu aijo' i butongnyo oka'ima'i. Somo aijo'mo na sindua'anku ka' mule' anu mompahakona tiba aku, o to lalangkoyang nu Yerusalem!