NYANYIAN ANU TALASANGGO 4 - KITAB NU TUMPU ALLA LELE MA'IMAI'

Mo'ane

¹ Beleyum handa hondo ku ka'ima'i, totu-totu'u beleyum handa hondo o sintaku, Mata nu beleyum isambiha' nu hude pinongkukumbungi sumomo malapati', Ubak nu beleyum hambahannyo sumomo mee' sanggombu anu nintatau'mo mae lengkat i bungkutnyo nu Gilead.

² Bese' nu beleyum mopute' sumomo domba sanggombu, anu sala'je kinismo na ubaknyo ka' pinindi'mo na lakinyo tiba behenyo mojajalan susumo to ana-anak nu domba anu hapi' mau sa'angu' madi' ko anu nolapus.

³ Biwi nu beleyum mimbalu-balu' sahamba na pita momea' ka'nganga' nu beleyum ma'ima' hondo. Gagising nu beleyum sumomo bua' nu dalima anu biniha'mo, sulu-suluk isambiha' nu kukumbung nu beleyum.

⁴ Gogohong nu beleyum mimbalu-balu' laigan tangka-tangkas anu binau i Daud bau pontanggalakonan mian ka' ponguna'an sanjata. Olo' nu beleyum sumomo samadala na kanta, ka' amangkun toongon nu to sulu-suludadu iwi-iwi'.

⁵ Susu nu beleyum sumomo ohua' na anak nu jonga, anak nu kijang, anu hapi'. Anu hau-haunyo mongotot hemput i olot nu bunga-bunga bakung.

⁶ Kahanda' na aku mamba i bungkutnyo nu mur, ka' i bungkutnyo kamangian, sampe ko baleba'nyomo daagi subu-subu anu mola'akonmo pintung de malomo.

⁷ Beleyum handa hondo, sintangku, madi' ko anu opisala'i hi beleyum.

⁸ Imbo' da kita mintatau'mo lengkat mae i Libanon pangantenku; imbo'mo da kita mintatau' lengkat mae i Libanon. Pintatau'mo lengkat mae aita i bawo nu bungkutnyo nu Amana, lengkat mae aita' i bawo nu bungkutnyo senir, tiba Hermon kajojoongan nu macan tutul tiba singa.

⁹ Beleyum nonggodamo mae kinyonyoangku sintangku, pangantinku, Beleyum nonggodamo mae nu mata nu beleyum nonon tonto'imo mae tiba mainan anu ma'ima' hondo atina' i olo' nu beleyum.

¹⁰ Talalo hondo ma'ima' na ponsinta nu beleyum, sintangku, pangantinku, molingkuduimo tami'nyo nu anggur. Minya-minya' nu beleyum sinimpogahanmo na nohongnyo, molingkuduimo sinin na ngahan nu lampa.

¹¹ Matami' hondo napotatae nu beleyum pangantinku, sumomo juu' nu uani' anu madi' ko galo'nyo ka' mule' sumomo susu. Pakean nu beleyum sumomo nohong nu Bangkutnyo nu Libanon.

¹² Sindua'anku sumomo ale' anu ko pagannyo mesen, ale' anu ko pagannyo mesen, mata nu uee anu ginunsingmo.

¹³ Ikiijo' mae tinumuu'mo na to kau-kau' dalima, ka' bua'nyo anu toto tami-tami' hondo. Bunga pacar tiba narwastu.

¹⁴ Narwastu, kunyit, kayu manis tiba tumba' tiba ngangahan nu kau' kamangian, Mur tiba gaharu, tiba ngangahan nu lampa anu pinile'anmo.

¹⁵ Mata nu uee i ale'ku molubatakon uee kantumuu'an anu mo ilii mae lengkat i Libanon!

Boune

¹⁶ Pobulamo o mombun nu utara, tokamo mae o mombun nu salatan! Tobuungmo mae toka i ale'ku; da nohongnyo simpogahanmo. Ku taha'imani da sindua'anku toka i ale'nyo, ka' mongkaan bua'nyo anu toto tami-tami'.