NYANYIAN ANU TALASANGGO 3 - KITAB NU TUMPU ALLA LELE MA'IMAI'

¹ Pihi-pihi ikoingku, aku nongipi au'aitu aku noliomo sindua'anku; iliongku na ia panyo madi' kino hasinnyo.

² Aku kahanda'mo nobula ka' ilumajang sinongko na kota' nolajangi iwi-iwi' na jalan daka' tiba jalan anu toto ise-ise'. Aku noliomo anu ku una' i uno nu kinyonyoangku; iliongku panyo madi' kino hasinnyo.

³ Aku siningkabotan nu anu moronda kota' ka' pinokilawangkumo; “Pa' belemiu nontoa anu ku una' ikinyonyoangku?”

⁴ Salaje pinala'ianku na aha, ku singkaboti na anu ku una' i uno nu kinyonyoangku Ia tinoongankumo ka' madi'mo ilapasakonku; sampe binoangkumo ilaigan nu tinangku, no kiijo' isalipi' nu mian anu nompohampe aku.

⁵ Balajanji'mo na belemiu to lalangkoyang nu Yerusalem; tiba to jonga-jonga ka' to kija-kijang i padang, saba' belemiu madi'mo mongganggu basindua'an sampe ia ma osamo.

Nyanyian kototolu'nyo Boune

⁶ Pa' aijo' anu tinoka lengkat i padang anu mateges; susumo tibuk nu apu anu butolu? Nohongnyo sumomo mur ka' kamangian, tiba iwi-iwi' na bada' anu manohong lengkat mae hi mian anu badagang.

⁷ Toa aijo' na kasuhangan i Salomo; tinikuban nu mian aha anompulu' anu to babaani, mian haha aijo' anu to babaani i hi aha Israel,

⁸ anu monsumbu'mo mosia na mahampate. Aha iwi-iwi' nontakosmo bajak, sasadiamo mongahopi mian anu montumbuhi mae de maluannyo pihi.

⁹ I Salomo nokibaumo sa'angu' na kasuhangan anu biasa olemban, Kau' anu mahoson na pinoki baunyo ka' angga'nyo mahan.

¹⁰ Tengke'nyo salaka na tinutuk; ka' patisehannyo mosoni' na tinutuk. Kasuhangannyo buhitnyo mingkamumu' ka' atas kasanangan nu kinyonyoa nu aha to lalangkoyang nu Yerusalem na nonsuji.

¹¹ Posabatmo mae na belemiu to lalangkoyang nu Sion, tonto'i na i Tomundo' Salomo nomposongko'mo makota' anu pinosongko'mo nu tinanyo isinaa pinonika'an ia isinaa ia ilame'mo.