NYANYIAN ANU TALASANGGO 2 - KITAB NU TUMPU ALLA LELE MA'IMAI'

¹ Aku ola susumo bunga mawar lengkat mae i Saron, bunga-bunga bakung anu tumuu' isin na bangka'nyo.

Mo'ane

² Susumo bunga bakung tinumuu'mo itotonga' nu hemput anu ko hii'nyo. Sumo aijo' na sindua'anku aijo' hi aha to lalangkoyang.

Boune

³ Sumomo kau' apel itotonga' nu to kau-kau' nu alas, sumo aitumo na sindua'anku itotonga' nu to momo'ane. Sanang hondo na aku mingkong i patuunyo, bua'nyo inyamitkumo matami' hondo.

⁴ Binoamo na aku itampat anu mombau bau-bauon. Ia nontoa mae aku, daka-daka' hondo nakinyonyoanyo mongka' ka'ima'i.

⁵ Pohosonakon mae na aku nu bua' nu anggur anu matami'. Posanang mae na aku nu bua' nu apel, kalana aku masakit monginau' sindua'an.

⁶ Limanyo kowi monsalangku' ubaku, limanyo koanan montanggogoli aku.

⁷ Panyanyimo na belemiu to lalangkoyang nu Yerusalem, kona hi to jonga-jonga tiba to kija-kijang i padang, saba' belemiu madi'mo montewa basindua' sampe ia ma'osamo.

Nyanyian ko ohua'nyo Boune

^8-9 Hongo pe'e sindua'anku tinokamo! Ia sumomo anak nu jonga kabai kijang. Maha lumpatan aita isinin na bungkutnyo, maha lende'an isinan na puge'nyo. Toa, tinuminjomo isambiha' nu pagan mesen, tiba matanyo na bau pomposilele'nyo, monsiligi itolongan.

¹⁰ Hongo pe'e mae, sindua'anku notataemo mae hi belengku! Tokamo mae sindua'anku anu ku ka'ima'i!

Mo'ane

¹¹ Toa, tempo' nu bakin tinomboliumo, tempo' nu ujan noko lapasmo.

¹² I ale' nu to bunga-bunga singkapmo nimbunga; tempo'nyomo nu pontutu'ian honnyo; onyi' nu tomonsi' sapatau aiya ilipu'to.

¹³ Kau' ara montampu'unimo mimbua'; kau' anggur nanohongmo na bunganyo, Tokamo mae na sindua'anku, imbo'mo sintaku.

¹⁴ O malapati'ku anu i olo-olot nu batu, patisulukannyo ikeles anu matungebe, de timbali da aku montoa ohup nu beleyum, ka' mohongo potatae nu beleyum, kalana ohup nu beleyum handa hondo, potatae nu beleyum suele ma'ima' hondo.

¹⁵ Paha hakopakon na bau' nu alas haha aijo', bau' nu alas haha aijo' mongideimo ale' nu anggur, kalana ale' nu anggur mami hau-haunyomo timboka na bunganyo.

Boune

¹⁶ Sindua'anku akumo na tumpunyo ka' aku mule' iamo na tumpunyo. Ia molaya' dombanyo haha aijo', i olot nu bunga-bunga bakung.

¹⁷ Sampe ko mombunnyomo subu-subu, anu mola'akonmo pikat pihi-pihi. Pinsusule'mo mae osindua'anku susumo kijang, susumo anak nu jonga ibungkutnyo nu Beter.