NOSABATMO 39 - KITAB NU TUMPU ALLA LELE MA'IMAI'

Mombau baju' nu imam

¹ I Bezaleel ka' i Aholiab nombaumo baju' anu opusok de monsombahmo laken mobilu', mingkamumu' ka' momea' anu nu aha to ima-imam, de aha mokalajamo i uno nu Salipi' Susi'. Baju' nu imam anu nupusok i Harun obau susumo anu pinalentahkonmo nu Tumpu hi Musa.

² Evod hude lenan anu ma'ima' hondo na obau, laken mobilu', mingkamumu' ka' momea' ka' banang mosoni'.

³ Aha nontutukmo mosoni' oponipismo hondo lapas aijo' okolo-kolongmo timbali banang anu monipis hondo lantas otonunmo tiba hude lenan anu ma'ima' hondo ka' laken mobilu', mingkamumu' ka' momea'.

⁴ Lapas aijo' obaumo ohua' na tombonyo anu oposegot i bikoang bau pontagang evod anu opoka'ut i pasu'nyo ohu-ohua' sasu aita'.

⁵ Pombutu'nyo hude anu tinonun ma'ima' hondo binau pokakana na balangnyo ka' pinoka'ut i evod aijo' sahingga tinimbali sa'a-sa'angu' na bagian susumo anu pinalentahkonmo nu Tumpu hi Musa.

⁶ Aha nongkikini batu dalima lantas pinokonanyomo i bingkai mosoni'. Pande hondo na aha nontulis to sanggo-sanggo nu sampulu' ka' ohua' na to ana-anak i Yakub i batu haha aijo'.

⁷ Lapas aijo' batu haha aijo' pinokonamo i tombonyo anu oposegot i bikoang pontagang evod salaku bau pontandai sampulu' ka' ohua' na tulunan nu aha bansa Israel, susumo anu pinalentahkonmo nu Tumpu hi Musa.

Mombau pongkukubi saha'an

⁸ I Bezaleel ka' i Aholiab nombaumo pongkukubi saha'an posadiaonnyo pokakana susumo evod, ka' suji'nyo suele pokakana.

⁹ Sukatannyo sulapa' opat opaku' ohua' ko bolanyo ka' ko mantannyo 22 sentimeten.

¹⁰ Pongkukubi saha'an aijo' pinokonan nu aha opat na jiji'nyo nu batu mainan. I jiji'nyo momona batu dalima, topas ka' baiduri sepah.

¹¹ I jiji'nyo ko ohua'nyo zamrud, batu nilam ka' intan.

¹² I jiji'nyo ko totolu'nyo batu lazuardi, ake' ka' batu kecubung.

¹³ I jiji'nyo ko opatnyo batu pirus, yakut ka' ratna cempaka. Sampu-sampulu' ka' ohua' na mainan haha aijo' pinuutan nu mosoni'.

¹⁴ Toto sa'angu' na mainan haha aijo' tinulis na sanggo sala'sa'angu' na to ana-anak i Yakub anu sampulu' ka' ohua' aijo' salaku bau pontandai lee' mae nu aha tulunan bansa Israel.

¹⁵ Lantas nombaumo ohua' na lante' mosoni' anu madi' ko galo'nyo, anu inganyam susumo tombo.

¹⁶ Binau suele ohua' na pasinsingnyo mosoni' anu opokona hi ohu-ohua' na pasu'nyo sasu aita' pongkukubi saha'an aijo'.

¹⁷ Lantas ohu-ohua' na lante' mosoni' aijo' oposoopmo i pasinsingnyo,

¹⁸ ka' ohu-ohua' na puusnyo sangga'at oposegotmo i bingkainyo ohu-ohua' sahingga pongkukubi saha'an aijo' timbali opogantum tiba sasu ahopnyo nu tombo anu oposegot i bikoang ka' opotagang i evod.

¹⁹ Lantas nombau mule' ohua' na pasinsingnyo mosoni' anu opokona i pongkukubi saha'an aijo', i puusnyo sasu akaong i bahagian unonyo nu evod.

²⁰ Lapas aijo' nombaumo ohua' na pasinsingnyo mosoni' anu opokona i sasu ahopnyo ka' opotagang i evod, koko pinompogantuman gio-gio' akaong i aluknyo, i buannyo mae nu pombutu' anu hude tino-tinonun ma'ima' hondo.

²¹ Susumo anu pinalentahkonmo nu Tumpu hi Musa, pasinsingnyo anu aijo' i pongkukubi saha'an opogantum tiba tombo mobilu' i pasinsingnyo nu evod, sahingga pongkukubi saha'an aijo' tataap aita' i buan nu pombutu' da boli tombuka'.

Mombau baju' sangga'at anu nu to ima-imam

²² Juba' anu opusok sasu aita' i evod, iwi-iwi' laken mobilu' na obau.

²³ Gogohongnyo nu juba' aijo' opohoson nu pita anu tinonun da madi' sampa mobeak.

^24-26 Titikub i pani'nyo sasu aluknyo obunga-bungai nu bua' dalima', hude lenan anu ma'ima' hondo ka' laken mobilu', mingkamumu' ka' momea' na obau, o olo-oloti nu manyi-manyinyo mosoni' na obau susumo anu pinalentahkonmo nu Tumpu hi Musa.

²⁷ Aha nombaumo kameja i Harun ka' hi to ana-anaknyo,

²⁸ suele suluban, singgan, saluan kodo', lenan na kina'ut

²⁹ ka' pombutu' hude lenan anu ma'ima' hondo, laken mobilu', mingkamumu' ka' momea' na obau, obunga-bungai nu suji'an susumo anu pinalentahkonmo nu Tumpu hi Musa.

³⁰ Suele obunga-bungai nu mosoni' anu madi' ko galo'nyo, pontandai saba' aha tinantukanmo mokalaja samata-mata hi Tumpu. I bunga-bunganyo haha aijo' tinulismo na potatae; “Samata-mata mokalaja hi Tumpu”.

³¹ Bunga-bunganyo aijo' opokona i sasu ahop nu suluban, susumo anu pinalentahkonmo nu Tumpu hi Musa.

Pakalaja'an aijo' i lapasmo

³² Ahennyo jinadimo iwi-iwi' na kalaja nombau Kemah nu Tumpu. Mian nu Israel nombaumo iwi-iwi' susumo anu pinalentahkonmo nu Tumpu hi Musa.

³³ Aha nomboamo Kemah hi Musa tiba iwi-iwi' na posadiaonnyo, to kai-kaitnyo, to kau-kau' balatannyo, to ohi-ohi'nyo ka' paningkokoannyo,

³⁴ pongkukubinyo kilit nu mee' lakinyo na binau ka' binuhitanmo momea', pongkukubinyo kilit anu ma'ima' hondo na binau, hude pongkukumbungi,

³⁵ Peti' Palajanjian anu ko isinyo ohua' na batu tiba kau' polembanan ka' kolopnyo,

³⁶ meja' tiba iwi-iwi' na posadiaonnyo ka' roti anu osombahkon,

³⁷ tengke nu sulu' mosoni' anu madi' ko galo'nyo na binau, to sulu-sulu'nyo tiba iwi-iwi' na posadiaonnyo, lanya' anu opake i sulu',

³⁸ mezbah mosoni', kamangian anu manohong, lalanse' nu sabatan nu Kemah,

³⁹ mezbah tambaga na binau, tiba kawat anu inganyamo tambaga na binau, kau' polembanan ka' iwi-iwi' na posadiaonnyo; tampat pimbaso'an tiba paningkokoannyo,

⁴⁰ hude anu to bola-bola' anu opake i natan ka' to ohi-ohi'nyo tiba paningkokoannyo, lalanse' nu sabatan daka', i natan tiba to kaho-kahohonnyo toto-totokolonnyo nu Kemah; iwi-iwi' na pakakasnyo anu opake i uno nu Kemah,

⁴¹ ka' baju' anu opake de monsombahmo na to ima-imam salatan aha mokalajamo i Salipi' Susi' ka' baju' anu samata-mata ola i Harun na mompusok ka' to ana-anaknyo.

⁴² Iwi-iwi' na pakalaja'an haha aijo' binaumo nu aha mian Israel, susumo anu pinalentahkonmo nu Tumpu hi Musa.

⁴³ I Musa nompalesamo iwi-iwi' ka' tinoanyomo taalu' aha nombaumo madi' sinala' susumo anu pinalentahkonmo nu Tumpu. Lantas binalakatanmo i Musa na aha.