NOSABATMO 37 - KITAB NU TUMPU ALLA LELE MA'IMAI'

Mombau Peti' Palajanjian

¹ I Bezaleel nombaumo Peti' Palajanjian kau' akasia na binau, ko mantannyo 110 sentimeten, ko bolanyo ka' ko tangkasnyo pokakana 66 sentimeten.

² Sasu unonyo ka' sambiha'nyo i lapisan nu mosoni' anu madi' ko galo'nyo, lantas pinokonanmo bingkainyo mosoni' duhu-duhuknyo.

³ Lapas aijo' binaunyo opat na pasinsingnyo mosoni' pomposoopan kau' polembanan anu pinokonanyo i opa-opat na tengke nu peti' aijo. Ohua' na pasinsingnyo i sambiha' ka' sambiha'nyo.

⁴ Binaunyo mule' na polembanan kau' akasia, ka' i lapisannyo nu mosoni',

⁵ lantas kau' polembanan aijo' pinosoopnyomo i pasinsingnyo sambiha' ka' sambiha' nu peti' aijo'.

⁶ Lapas aijo' ia nombaumo kolopnyo mosoni' anu madi' ko galo'nyo, ko mantannyo 110 sentimeten ka' ko bolanyo 66 sentimeten.

⁷ Binaunyo mule' ohua' na anu susumo malaekat mosoni' na tinutuk,

⁸ toto sa'angu' opokona i puusnyo nu kolopnyo aijo'. Ohu-ohua' na anu susumo malaekat aijo' binaumo sa'a-sa'angu' tiba kolopnyo,

⁹ ka' binau mompaha ahop, ka' polipiknyo boka-boka mongkukubi kolop nu peti' aijo'.

Mombau meja' pompotimpasan roti anu osombahkon

¹⁰ I Bezaleel nombaumo meja' kau' akasia na binau, ko mantannyo 88 sentimeten.

¹¹ Meja' aijo' ilapisannyo nu mosoni' anu madi' ko galo'nyo ka' duhu-duhuknyo pinokonannyo bingkainyo mosoni'.

¹² Lantas binaunyo na duhu-duhuknyo ko bolanyo 7,5 sentimeten. Duhu-duhuknyo aijo' pinokonannyo bingkainyo mosoni' titikub.

¹³ Binaunyo opat na pasinsingnyo pomposoopan kau' polembanan ka' pinokonannyo i pasu'nyo opa-opat i tengke nu meja' aijo'.

¹⁴ Pasinsingnyo bau pomposoopan kau' polembanan pinokona koko sohipi' nu meja' aijo'.

¹⁵ Polembanan aijo' kau' akasia na binau ka' ilapisan nu mosoni'.

¹⁶ Ia mule' nombau to lea-lean, ka' to pato-patongko, ka' to sele-selekan, ka' to mangko-mangko' anu opake pongisian anggur anu osombahkon. Iwi-iwi' na posadiaon nu meja' aijo' mosoni' anu madi' ko galo'nyo na binau.

Mombau tengke nu sulu'

¹⁷ I Bezaleel nombaumo tengke nu sulu' mosoni' anu madi' ko galo'nyo na binau. Pompokokoan ka' pontongian binau mosoni' na tinutuk. Pinombunga-bungai, sumo bunga anu malia'mo timboka ka' kuyakubnyo binaumo sa'a-sa'angu' tiba pontongiannyo.

¹⁸ Aijo' i pontongiannyo binau anom na panga'nyo, totolu' na panga'nyo i sambiha' ka' i sambiha'nyo mompaha timbang.

¹⁹ Toto sa'angu' na panga'nyo obaui bunga-bunganyo totolu' na bunga badam. Sumo bunga anu malia'mo timboka ka' kuyakubnyo.

²⁰ Aijo' i pontongian obaui bunga-bunganyo opat na bunga badam sumo bunga anu malia'mo timboka ka' kuyakubnyo.

²¹ Akaong i popanga'annyo obaui sa'angu' na bunga anu malia'mo timboka.

²² Songko-songko na tengke nu sulu' aijo' tiba bunga-bunganyo anu sumo malia'mo timboka ka' to panga-panga'nyo, anu obau sangkolong na mosoni' anu otutuk madi' ko galo'nyo.

²³ I tengke nu sulu' aijo' obaui popitu' na sulu'nyo tibamo pakakasnyo bau pombolosi sumbu nu sulu'nyo ka' pomposulannyo, mosoni' anu madi' ko galo'nyo na obau.

²⁴ Mombau tengke nu sulu' ka' talakonannyo opalalui 35 na kilogram. Mosoni' anu madi' ko galo'nyo.

Mombau mezbah pompapuan kamangian

²⁵ I Bezaleel nombaumo sa'angu' na mezbah kau' akasia na binau da bau pompapuan kamangian. Mezbah aijo' binau sulapa', ko mantannyo ka' ko bolanyo pokakana 45 na sentimeten, ka' ko tangkasnyo 90 na sentimeten. Pasu'nyo opa-opat obaui tanduk anu sa'a-sa'angu'mo tiba mezbah aijo'.

²⁶ Aita' i buannyo opa-opat na pasu'nyo ka' to tandu-tanduknyo haha aijo' olapisi nu mosoni' anu madi' ko galo'nyo ka' duhu-duhuknyo opokonai bingkainyo mosoni'.

²⁷ Suele binauan ohua' na pasinsingnyo i aluk nu bingkainyo mosoni', poti-potimbiha' bau pomposoopan kau' polembanan mezbah aijo'.

²⁸ Polembannyo aijo' kau' akasia na obau ka' olapisi nu mosoni'.

Mombau lanya' anu opake monsombah Tumpu tiba kamangian

²⁹ I Bezaleel suele nombaumo lanya' anu opake monsombah Tumpu tiba kamangian anu madi' ko galo'nyo ka' manohong hondo opogalo' sumo lanya' anu manohong hondo.