NOSABATMO 36 - KITAB NU TUMPU ALLA LELE MA'IMAI'

¹ I Bezaleel, i Aholiab ka' iwi-iwi' na anu monsumbu' mombau apa-apaa, anu nohumpakmo kapandean lengkat mae hi Tumpu, nonsumbu'mo mosia na mombau Kemah nu Tumpu. Aha mombau iwi-iwi' aijo' tionyo ahi' susumo anu pinalentahkonmo nu Tumpu.”

Manjoo' hondo na anu i limu'mo nu bansa Israel

² I Musa nolagamo i Bezaleel, i Aholiab ka' iwi-iwi' na mian anu nohumpakmo kapandean lengkat mae hi Tumpu tiba anu sinanangmo na kinyonyoa montulungi, lantas nompokaumo aha da montampu'unimo mokalaja.

³ I Musa nombee'mo hi aha iwi-iwi' na anu i limu'mo nu aha mian Israel anu opake mokalaja mombau Kemah nu Tumpu. Panyo aha bansa Israel daagi' saja' sabole-bole momboa anu osombahkon hi Musa sansina-sinaa daagi' subu.

⁴ Lantas iwi-iwi' na anu monsumbu' mombau apa-apaa anu aijo' hau-haunyo mombau pakalaja'an aijo'

⁵ nonsisikmo hi Musa, “Bala-balang anu i limu' nu mian haha aijo' nolabiimo anu opalalui i pakalaja'an anu pinalentahkonmo nu Tumpu.”

⁶ Sahingga i Musa nombebakonmo hi songko-songko na Kemah tukoonyo sinukupmo na anu i limu' pombau Kemah nu Tumpu; sahingga mian haha aijo' madi'mo daagi' nomboa apa-apaa.

⁷ Bala-balang anu i limu'mo nu aha nolabiimo anu opalalui mompotimbali iwi-iwi' na pakalaja'an haha aijo'.

To mia-mian anu monsumbu' mombau apa-apaa nombaumo Kemah nu Tumpu

⁸ Lapas aijo' mian anu lebe hondo monsumbu' mombau apa-apaa anu molingkudui aha sangga'at nombaumo sampulu' na kolongan nu hude lenan anu ma'ima' hondo, anu tinonun tiba laken mobilu', mingkamumu' ka' momea', lantas sinuji'anmo nu gambalan susumo malaekat.

⁹ Toto sangkolong sukatannyo pokakana; ko mantannyo sampulu' ka' ohua' na meten, ka' ko bolanyo ohua' na meten.

¹⁰ Olima' na kolongannyo nu hude na opogantum timbalimo sa'angu' na hude bola-bola, ka' olima' na kolongannyo nu hude sangga'at obau sumo aijo' suele.

¹¹ I pani'nyo nu ohu-ohua' na hude bola-bola aijo' opokonai bibitnyo hude mobilu' na obau,

¹² sa'angu' na hude bola-bola aijo' opokonai limampulu' na bibitnyo, sahingga timbalimo susumo sa'angu' na takeannyo.

¹³ Lantas limampulu' na kaitnyo mosoni' na obau da timbali momposa'angu' ohu-ohua' na hude bola-bola aijo'.

¹⁴ De nupoko baumo nu aha na atop nu Kemah aijo' anu sampulu' ka' sa'angu' na kolongannyo na hude bulu nu mee' na obau.

¹⁵ Toto sangkolong pokakana na sukatannyo ko mantannyo sampulu' ka' totolu' na meten, ka' ko bolanyo ohua' na meten.

¹⁶ Olima' na kolongannyo opogantum timbali sa'angu' na hude bola-bola, ka' anom na kolongannyo sangga'at sumo aijo' suele na mombau.

¹⁷ Limampulu' na bibitnyo opokona i pani'nyo nu hude bola-bola anu momona ka' suele limampulu' na bibitnyo i pani'nyo nu hude bola-bola anu ko ohua'nyo.

¹⁸ Lantas limampulu' na kaitnyo tambaga na obau da momposa'angu' ohu-ohua' na hude bola-bola aijo' timbali bau atop nu Kemah.

¹⁹ Lapas aijo' obau mule' ohua' bau pongkukubi Kemah sa'angu' kilit nu domba lakinyo anu obuhiti momea' ka' sangga'at mule' kilit anu ma'ima' hondo.

²⁰ Lapas aijo' aha mombaumo ohi' nu Kemah ka' opotinjomo hodi-hodi', anu oposadia kau' akasia.

²¹ Toto sa'angu' na ohi'nyo opat na meten na ko tangkasnyo ka' ko bolanyo anompulu' ka' anom na sentimeten.

²² Toto sangkau na ohi'nyo opokonai ohua' na totokolonnyo anu opo ohua', sahingga ohi'nyo haha aijo' timbali opo sumpak na sa'angu' tiba sangga'at.

²³ I sasu selatan nu Kemah opokonai uampulu' na ohi'nyo,

²⁴ ka' patompulu' na bau katinjoannyo salaka na obau, toto sangkau na ohi'nyo opokonai ohua' na katinjoannyo toto ohua' na totokolonnyo.

²⁵ I sasu utara nu Kemah obau uampulu' na ohi'nyo,

²⁶ ka' patompulu' na katinjoannyo salaka na obau, ohua' na katinjoannyo sangkau na ohi'nyo.

²⁷ Padutnyo nu Kemah sasu kinsoban obau anom na ohi'nyo,

²⁸ ka' ohua' na ohi'nyo opokona i pasu'nyo.

²⁹ Ohi'nyo nu pasu'nyo haha aijo' oposumpak i tengkenyo toka-toka i buannyo. Ohu-ohua' na ohi'nyo anu binau pasu'nyo sumo aijo' na mombau.

³⁰ Jadi iwi-iwi'mo ualu' na ohi'nyo ka' sampulu' ka' anom na katinjoannyo salaka na obau, toto sangkau na ohi'nyo ohua' na akaong i aluknyo.

³¹ Lantas aha nombaumo sampulu' ka' olima' na balatannyo kau' akasia, sansulapa' na Kemah olima' na ohi'nyo,

³² olima' i sulapa'nyo sangga'at ka' olima' mule' i padut nu Kemah sasu kinsoban.

³³ Kau' anu opobalatan i ohi'nyo ko tangkasnyo i pohintonga'annyo nu ohi'nyo, ohi'nyo obagi ohua' na ohi', lengkat i puusnyo toka-toka i puusnyo nu Kemah aijo'.

³⁴ Ohi' nu Kemah tiba kau' haha aijo' anu opobalatan olapisi nu mosoni', lantas opokonai pasinsingnyo mosoni' bau pomposoopan kau' haha aijo'.

³⁵ Aha nombau suele lalanse' nu sabatan hude lenan anu ma'ima' hondo na kina'ut anu tinonun tiba laken mobilu', mingkamumu' ka' momea', lantas sinujian susumo malaekat.

³⁶ Bau pompokaitan hude haha aijo' obau opat na ohi'nyo kau' akasia anu olapisi nu mosoni' tiba kaitnyo mosoni' ka' opokona aita' i opat na anu ko katinjoannyo salaka.

³⁷ Lantas sabatan nu Kemah opokonai lalanse'nyo hude lenan anu ma'ima' hondo na obau anu tinonun tiba laken mobilu', mingkamumu' ka' momea' ka' mule' osuji' bau pombunga-bungai.

³⁸ Lalanse' nu sabatan aijo' o ohi'i olima' anu nupogantum nu kait haha aijo'. Puusnyo poti-potingkolong tiba bau pompogantum oli-olima' na ohi' haha aijo' olapisi nu mosoni', panyo anu oli-olima' katinjoannyo tambaga na obau.