NOSABATMO 35 - KITAB NU TUMPU ALLA LELE MA'IMAI'

Atulan mongkona sinaa nu Sabat

¹ I Musa nomposihukmo iwi-iwi' na aha bansa Israel notataemo hi aha, “Aiyamo na palentah nu Tumpu toka hi belemiu;

² Anom sinaa na mokalaja, panyo sinaa ko ipitunnyo aijo' sinaamo pilawean, sinaa daka' anu ponsombanmo Tumpu. Ihe na mokalaja i sinaa nu Sabat tionyo ahi' mohumpak hukuman opatei.

³ Sinaa aijo' belemiu madi' timbali momposun apu i laigan nu belemiu.”

Anu osombahkon i Kemah nu Tumpu

⁴ I Musa notataemo hi aha iwi-iwi' bansa Israel, “Sumo uuka na palentah nu Tumpu:

⁵ Boa na anu osombahkon hi Tumpu. Ihe na ko indi, tionyo monsombahkon mosoni', salaka, ka' tambaga;

⁶ hude lenan anu ma'ima' hondo, hude laken mobilu', mingkamumu' ka' momea'; hude bulu nu mee' na tinonun;

⁷ kilit nu domba lakinyo anu binuhitan momea'; kilit anu ma'ima' hondo, kau' akasia,

⁸ lanya' anu o tutung bau sulu'; to lampa-lampa ponggalo'i lanya' anu opake monsombahkonmo apa-apaa ka' kamangian anu manohong,

⁹ mata nu mainan dalima ka' mata nu mainan sangga'at anu opaha pokona i baju' evod ka' opopusok i saha'an nu Imam Daka'.”

Pakakas anu opake i Kemah nu Tumpu

¹⁰ “Iwi-iwi' na anu pande monsumbu' mombua apa-apaa itina' hi belemiu tionyo ahi' toka mae mombau iwi-iwi' apaa na anu pinalentahkonmo nu Tumpu aijo'mo:

¹¹ Kemah, atop ka' kukupnyo, pongkaitnyo ka' olonnyo, to kau-kau' anu opake i panimbonyo, ohi' nu sabatan ka' paningkokoannyo;

¹² Peti' Palajanjian tiba kau' bau polembanan, kolopnyo ka' hude bau pongkukubi;

¹³ meja' tiba kau' bau polembanan, iwi-iwi' na talakonannyo ka' roti anu osombahkon,

¹⁴ tengke nu sulu' bau ponjingkai tibamo talakonannyo, sulu' tiba lanya'nyo;

¹⁵ mezbah tampat pompapuan kamangian tiba kau' polembanan, lanya' anu opake de monsombahkonmo apa-apaa, kamangian anu manohong, lalanse' anu opake i sabatan nu Kemah,

¹⁶ mezbah bau pontunuan anu okolobanakon tiba jalaja'nyo tambaga na binau, kau' bau polembanan tiba iwi-iwi' na talakonannyo; tampat pimbaso'an tiba paningkokonyo,

¹⁷ hude bola-bola anu opake i natannyo, ohi'nyo tiba paningkokonyo, lalanse' nu sabatan daka' i natannyo,

¹⁸ totokolonnyo ka' posadiaonnyo, kahohon bau pompuuti Kemah ka' anu opake pompuuti i natannyo;

¹⁹ baju' nu imam anu opusok de aha mokalajamo monsombahmo i Salipi' anu Susi' ka' baju' anu ola i imam Harun na mompusok, tiba to ana-anaknyo.”

Bansa Israel momboamo anu nusombahkon nu aha

²⁰ Lantas iwi-iwi' na mian nu Israel anu sinihukmo aijo' nompopolambanmo,

²¹ ka' maumo pa' ihe na anu ko kinyonyoamo, momboa anu osombahkon hi Tumpu da sukupmo na talakonan nu Kemah nu Tumpu. Aha suele momboa iwi-iwi' na anu opalalui de monsombahmo ka' anu bau baju' nu imam.

²² Maumo pa' ihe na anu mongka'oho', mo'ane kabai boune na toka mae momboa samat, mainan, anti-anting, sinsing, olo' ka' iwi-iwi' na ngahan nu mainan mosoni' da osombahkon hi Tumpu.

²³ Batu-batu mian anu ko hude lenan anu ma'ima' hondo, hude laken mobilu', mingkamumu' kabai momea', hude bulu nu mee' na binau, kilit nu domba lakinyo anu binuhitan momea', kabai kilit anu ma'ima' hondo, nonsombahkonmo balang haha aijo'.

²⁴ Batu-batu mian anu moko ala mombee' salaka kabai tambaga, nomboamo anu obee' hi Tumpu. Sumo aitu mule' suele na nubau nu to mia-mian anu ko kau' akasia anu opake i pakalaja'an aijo'.

²⁵ To bou-boune anu pande mombau banang nomboamo banang lenan anu ma'ima' hondo tiba banang laken mobilu', mingkamumu' ka' momea' anu binaumo nu aha.

²⁶ Aha mule' suele nombaumo bulu nu mee' bau banang.

²⁷ To pola-polaya' nomboa mainan mata dalima ka' mainan mata sangga'at da opokona i evod ka' anu opake i saha'an.

²⁸ Aha mule' suele nomboamo lampa-lampa ka' lanya' pongisi sulu', lanya' anu opake monsombahkon ka' kamangian anu manohong.

²⁹ Iwi-iwi' na aha mian nu Israel sanang hondo na kinyonyoa nu aha momboa anu osombahkon hi Tumpu bau kapalaluan nu pakalaja'an anu pinalentahkonmo nu Tumpu hi Musa da nubau nu aha.

To mia-mian anu pande na mombau apa-apaa aijo' na pinalentah mombau Kemah nu Tumpu

³⁰ Lapas aijo' i Musa notataemo hi aha mian nu Israel, “Tumpu nompile'imo i Bezaleel anak i Uri, makumpu i Hur lengkat mae i tulunan nu aha bansa Yehuda

³¹ ka' nombee'imo ia kuasa-Nyo. Tumpu Allah nombee'imo ia han nu pakalaja'an, ka' moko ala mombau iwi-iwi' na ngahan nu pakalaja'an anu ma'ima',

³² da montanga'i anu obau, anu mompalalui ahi' anu pande, ka' mongkalaja apa-apaa, mosoni' na obau, salaka ka' tambaga,

³³ da mongkikini batu bau mainan anu opokona ima-ima'; da mombotik kau' ka ngangahan nu pakalaja'an anu ma'ima' sangga'at.

³⁴ Hi Bezaleel ka' hi Aholiab, anak i Ahisamakh lengkat mae hi tulunan bansa Dan, Tumpu nombee'imo kapandean da mompotiju' kapandean nu aha hi mian sangga'at.

³⁵ Aha binee'anmo kapandean da monsumbu' ngangahan nu pakalaja'an anu nubau nu mian pande mompa'at, montanga'i, ka' pande na montonun hude lenan, anu ma'ima' hondo, laken mobilu', mingkamumu' ka' momea' ka' hude sangga'at. Aha anu pande na montanga'i, ka' moko ala mombau iwi-iwi' na ngahan nu pakalaja'an.