NOSABATMO 31 - KITAB NU TUMPU ALLA LELE MA'IMAI'

Tumpu Allah nompile'imo to mia-mian da mombau Kemah ka' posadiaonnyo

¹ Tumpu notatae hi Musa,

² “Aku nompile'imo i Bezaleel anak i Uri, makumpu i Hur lengkat mae i bansa tulunan i Yehuda,

³ ka' nombee'imo ia kuasang'Ku. Ia Ku potiju'je da monsumbu', pande ka' moko ala mombau iwi-iwi' na ngahan nu pakalaja'an;

⁴ da pande na mompopikilakon ka' moko ala mombau mosoni', salaka' ka' tambaga,

⁵ da mombau batu mainan anu opokopiani ima-ima' da momboti-botiki kau' ka' ngahanan nu pakalaja'an mongukin sangga'at.

⁶ I Oholiab, anak i Ahisamakh lengkat mae i bansa tulunan i Dan, pinile'an-Kumo suele da montulungi ia. Ku bee'i suele kapandean anu talalo hondo hi to tuka-tukang anu pande, da aha moko ala mombau mau mule' pa' apaa na anu Ku palentahkon:

⁷ Kemang-Ku, Peti' Palajanjian ka' kolopnyo ka' iwi-iwi' na pakakas nu Kemah,

⁸ aijo'mo meja' ka' posadiaonnyo, tengke nu sulu' mosoni' madi' ko galo'nyo na binau ka' posadiaonnyo, mezbah pompauian kamangian,

⁹ mezbah pompotimpasan koloban anu otunui ka' iwi-iwi' na posadiaonnyo,

¹⁰ baju' i Harun de momposadiamo monsombah, tiba baju' nu to ana-anaknyo anu tionyo ahi' nu pusok nu aha de mokalajamo salaku imam,

¹¹ lanya' anu opake de mokalajamo ka' kamangian anu ponohongi Salipi' Susi'. Iwi-iwi' aijo' tionyo ahi' nubau nu aha pokakana susumo apaa na anu pinotiju'-Kumo hi aha.”

Sinaa nu Sabat pilaweanmo

¹² Tumpu nompalentahmo i Musa

¹³ da mombebakon hi bansa Israel, “Lame'akon na sinaa nu Sabat, sinaa anu tinantukan-Kumo salaku sinaa pilawean. Sampetoka sidu-sidutu' sinaa aijo' baumo pontanda'i da boli okolilimi nu belemiu na Aku, da osumbu' nu belemiu, taalu' Akumo aiya na Tumpu, ka' taalu' Akumo na mompotimbali belemiu bansang-Ku.

^14-15 Sinaa pilawean aijo' sabole-bole o adati nu belemiu, salaku sinaa anu susi'. Belemiu Ku bee' anom sinaa na mokalaja, panyo sinaa ko ipitunnyo aijo'mo na sinaa daka' anu samata-mata mombau kalaja anu osombahkon hi beleng-Ku. Ihe na anu madi' mongadati, ka' ola mule' mokalaja, i sinaa aijo' tionyo ahi' mohumpak hukuman opatei.

¹⁶ Bansa Israel tionyo ahi' molame'akon sinaa aijo' sampe molapi-lapis na lee' salaku bau pontandai palajanjian.

¹⁷ Sinaa aijo' salaku bau pontandai anu madi' toho' okolilimi nu bansa Israel ka' Aku, kalana Aku, Tumpu, nompotimbalimo langit tiba tano' inganon sinaa ka' i sinaa kino ipitunnyo, Aku madi'mo nokalaja ka' nilawemo.”

¹⁸ Noko potatae tiba i Musa aita' i Bungkutnyo nu Sinai, Tumpu Allah nombee'mo hi ia ohua' na kobakan nu batu anu tinulisanmo nu Tumpu Allah iwi-iwi' na palentah-Nyo.