NOSABATMO 29 - KITAB NU TUMPU ALLA LELE MA'IMAI'

Atulan mosia na i Harun obalakati tiba to ana-anaknyo salaku imam

¹ “Sumo uuka na bau-baunyo mombalakati i Harun ka' to ana-anaknyo da aha timbali mombau anu Ku palentahkon salaku imam. Ala na sapi' lakinyo sa'angu' anu daagi' bata'nyo ka' ohua' na domba lakinyo anu madi' ko panyakitnyo.

² Ala na labu anu ma'ima' hondo, ka' okompo-kompon anu madi' o una'i ragi. Sambahagian na kompolan haha aijo' tionyo ahi' obau roti anu ogalo'i lanya' nu zaitun, sambagian mule' madi' ogalo'i lanya', ka' labinyo obau kukis anu osauti nu lanya'.

³ Po'isi i kalanjang ka' osombahkon mae hi beleng-Ku hingga-hinggat tiba sapi' lakinyo anu okolobanakonmo ka' ohua' na domba lakinyo.

⁴ Pokau na i Harun tiba to ana-anaknyo toka mae i sabatan nu Kemah-Ku ka' mompolesi butong.

⁵ Popusok na baju' nu imam hi Harun; kemeja, evod, juba' anu mongkukubi evod, anu opa-opake i saha'an, tiba pombutu'.

⁶ Posongko' na suluban i ubaknyo ka' posomat i suluban aijo' na mainan mosoni' anu tinulisanmo 'Mokalaja samata-mata hi Tumpu'.

⁷ Lantas ala na lanya' anu opake, de mombalakatimo, dudu'akon aita' i ubaknyo ka' sapuimo nu lanya' na ia.

⁸ Lapas aijo', pokau na to ana-anaknyo toka mae ka' popusoki kameja' ka' pombutu' hi aha,

⁹ lantas posongko'mo na suluban hi ubak nu aha. Sumo aijo' na bau-baunyo mombalakati i Harun ka' to ana-anaknyo. Aha ka' lee' nu aha tionyo ahi' mombau apaa na anu Ku palentahkon hi aha salaku imam sampe toka sidu-sidutu'.

¹⁰ Lapas aijo' sapi' lakinyo aijo' tionyo ahi' nuboamo i ahop nu Kemah-Ku. I Harun ka' to ana-anaknyo tionyo ahi' mompotik lima nu aha i ubak nu binatang aijo'.

¹¹ Kolot na sapi' lakinyo aijo' i ahop-Ku, i sabatan nu Kemah.

¹² Ala sambagian na baso' nu sapi' aijo' ka' sapuakon nu kangkam nu beleyum i tanduk haha aijo' i mezbah. Tuha'nyo nu baso' aijo' bubusakonmo akaong i aluk nu mezbah.

¹³ Lapas aijo' ala na tohitisnyo iwi-iwi', anu ma'ima' hondo ka' atenyo anu ma'ima' hondo, ka' ohu-ohua' na dampilannyo tiba lompo'nyo ka' potimpas iwi-iwi' aijo' i mezbah ka' tunuimo ka' osombahkonmo mae hi beleng-Ku.

¹⁴ Antoknyo, kilitnyo, kompong ninisnyo nu sapi' lakinyo aijo' tionyo ahi' opapui i sambiha'nyo nu Kemah. Aijo'mo na anu sosombahkon bau pongampuni dosa' nu to ima-imam.

¹⁵ Lapas aijo' ala sala'sa'angu' na domba lakinyo aijo'. I Harun ka' to ana-anaknyo tionyo ahi' mompotik lima nu aha i ubak nu binatang aijo'.

¹⁶ Lantas kolotmo na binatang aijo' ka' ala na baso'nyo ka' dudu'akon i sulapa'nyo opa-opat aijo' i mezbah.

¹⁷ Domba lakinyo aijo' tionyo ahi' opado-padot. Olonnyo nu kompongnyo ka' pa'anyo tionyo ahi' obaso'i ka' opotimpas i ubaknyo ka' anu pinadotmo haha aijo' sangga'at.

¹⁸ Osombahkon iwi-iwi' na domba lakinyo aijo' i mezbah, salaku koloban anu otunui. Hongohisnyo aijo' momposanangmo kinyonyoang-Ku.

¹⁹ Ala mule' na domba lakinyo sa'angu' aijo'mo domba anu opake mombalakati. Pokau na i Harun ka' to ana-anaknyo mompotiik lima nu aha i ubak nu binatang aijo'.

²⁰ Lantas kolotmo na domba lakinyo aijo', ala sangkiding na baso'nyo ka' sapuakon i bihing anu i aluknyo sasu koanannyo i Harun ka' hi to ana-anaknyo, hi kanumpu nu lima nu aha koanan ka' hi kanumpu nu tengke koanan nu aha. Labinyo nu baso' aijo' tionyo ahi' nududu'akon i sulapa' opa-opat aijo' i mezbah.

²¹ Ala sangkiding na baso' anu aita' i mezbah ka' sangkiding na lanya' anu opake de mombalakati, lantas pipi' na i Harun ka' to ana-anaknyo tiba baju' nu aha. Tiba jalan anu sumo aijo' i Harun tiba to ana-anaknyo tiba baju' nu aha opakemo mokalaja samata-mata hi beleng-Ku.

²² Ala na lompo'nyo nu domba lakinyo aijo', ikunyo anu ko lompo'nyo, tohitisnyo anu nolapisi kompongnyo, atenyo anu ma'ima' hondo, ohu-ohua' na dampilannyo tiba lompo'nyo, ka' pa'anyo koanan.

²³ Anu ingisi i kalanjang na roti anu sinombahkonmo hi beleng-Ku, toto sa'angu' na ngahannyo ala sa'angu' na roti; sa'angu' anu binau ginalo'an nu lanya' zaitun, sa'angu' na anu madi' ginalo'an nu lanya' ka' sa'angu' na kukis.

²⁴ Potimpas iwi-iwi' na kaanon haha aijo' i lima i Harun ka' to ana-anaknyo ka' pokau na aha monsimpalaakon mae hi beleng-Ku salaku anu sinimpalakon na nonsombahkon.

²⁵ Lantas ala na roti aijo' hi aha ka' potunu i mezbah, potudu aita i koloban anu otunui aijo'. Hongohisnyo nu koloban haha aijo' momposanangmo kinyonyoang-Ku.

²⁶ Ala na saha'annyo nu domba lakinyo aijo' ka' osombahkon salaku anu osimpalakon hi beleng-Ku. Ka' aijo'mo na bau bahagian nu belemiu.

²⁷ De mombalakatimo imam, saha'an ka' pa'a nu domba lakinyo anu opake nombalakati aijo' tionyo ahi' osombahkon salaku anu osimpalakon hi beleng-Ku ka' boli opogalum hi anu nu to ima-imam.

²⁸ Aiyamo na anu tinantukan-Kumo anu madi' timbali obabali'i; De tokamo na mian anu pinalesayamo hi beleng-Ku monsombahkonmo koloban bau pompodame, saha'an ka' pa'a nu potuu'on aijo' bau bahagian nu to ima-imam. Aijo'mo na anu osombahkon nu mian anu pinalesayamo hi beleng-Ku da bau baging-Ku.

²⁹ Baju' anu nupake i Harun de monsombahmo baumo buden nu to ana-anaknyo, da timbali nupusok nu aha de aha obalakatimo.

³⁰ Anak i Harun anu timbali imam mombolosakon tuumanyo ka' minsoop i Kemah-Ku de monsombahmo i Salipi' Susi', tionyo ahi' mompusok baju' aijo' pitun sinaa na kopinnyo.

³¹ Ala na antok nu domba lakinyo anu opake mombalakati i Harun ka' to ana-anaknyo ka' o unjang na antoknyo aijo' i tampat anu susi'.

³² Antoknyo aijo' okaan nu aha tionyo ahi' i sabatan nu Kemah-Ku tiba labinyo nu roti anu daagi' kiijo' i kalanjang.

³³ Tionyo ahi' nukaan nu aha na kaanon anu kinolobanakonmo bau pongampuni dosa' tempo'nyo nombalakati. Ola imam na timbali mongkaan kaanon anu binee'mo samata-mata bau baging-Ku aijo'.

³⁴ De toka dodop daagi' subu antoknyo kabai roti aijo' daagi' ko labinyo, saba' labinyo aijo' tionyo ahi' opapui sampe mingkot ka' madi' timbali okaan, kalana binee'mo samata-mata hi Tumpu.

³⁵ Mombalakati i Harun ka' to ana-anaknyo tionyo ahi' obau pitung sinaa na kopinnyo, susumo anu pinalentahkon-Kumo hi belemiu.

³⁶ Sansina-sinaa tionyo ahi' monsombahkon sa'angu' na sapi' lakinyo bau pongampuni dosa'. Kalana koloban aijo' sahingga mezbah aijo' pinosusi'mo. Lantas mezbah aijo' tionyo ahi' osapui nu beleyum nu lanya' zaitun da samata-mata ola opake bau kapalaluan-Ku.

³⁷ Bau na aijo' sansina-sinaa pitun sinaa na kopinnyo. Sahingga mezbah aijo' timbalimo susi'; maumo pa' apaa na anu jinadimo bahagian nu mezbah aijo' tionyo ahi' obee'mo hi Tumpu, ka' maumo ihe na soo' mompadis, mohumpak bahaya kalana mahoson hondo na kasusi'annyo.”

Anu okolobanakon sansina-sinaa

³⁸ “Sansina-sinaa sampetoka sidu-sidutu' aijo' mezbah tionyo ahi' saja' okolobanakon ohua' na domba anu umunnyo sataunmo.

³⁹ Sa'angu' osombahkon daagi' subu ka' sangga'at mule' osombahkon de mamalomo.

⁴⁰ Anu suele osombahkon tiba anak nu domba daagi' subu tionyo ahi' okolobanakon suele sa'angu' na kilogram na labu anu ma'ima' hondo ogalo'i lanya' nu zaitun anu madi' ko galo'nyo sa'angu' na liter. Ka' mule' ogalo'i anggur sa'angu' na liter.

⁴¹ Anak nu domba anu osombahkon de mamalomo tionyo ahi' okolobanakon susumo anu okolobanakon daagi' subu, ogalo'i nu labu, lanya' nu zaitun ka' anggur. Hongohisnyo nu koloban anu opotunu aijo' momposanangmo kinyonyoang-Ku.

⁴² Ka' mule' iwi-iwi' na tempo' anu aiya mae i ahop koloban anu opotunu aijo' tionyo ahi' osombahkon i ahop-Ku i sabatan nu Kemah-Ku. Ikiijo' Aku singkabotmo tiba mian anu pinalesayamo hi beleng-Ku ka' motataemo hi beleyum.

⁴³ Ikiijo' Aku singkabotmo tiba bansa Israel, ka' jingkang-Ku kalana Aku tokamo mae mompojadimo tampat aijo' susi'mo.

⁴⁴ Ku potimbalimo na Kemah tiba mezbah aijo' susi'mo. I Harun tiba to ana-anaknyo Ku potimbalimo anu samata-mata mokalaja hi beleng-Ku madi' pokakana sumo sangga'at da aha mombau anu Ku palentahkon salaku imam.

⁴⁵ Aku jojoongmo hi aha bansa Israel ka' timbalimo Tumpu Allah nu aha.

⁴⁶ Nusumbu'je nu aha taalu' Aku aiya Tumpu Allah nu aha anu nomboamo mae aha nosabat lengkat mae i Mesir da Aku jojoongmo aijo' hi aha. Akumo na Tumpu Allah nu aha.”