NOSABATMO 28 - KITAB NU TUMPU ALLA LELE MA'IMAI'

Baju' nu imam

¹ “Laga na i Harun utus tu'a nu beleyum tiba to ana-anaknyo i Nadab, i Abihu, i Eleazar ka' i Itamar, ka' poto'i hi aha da aha mokalaja samata-mata montuluti anu Ku atun salaku imam.

² Bau na baju' nu imam anu i Harun, da otoa na ia mian anu o'angga'i.

³ Laga na tukang ka'ut iwi-iwi' anu binee'an-Kumo kapandean. Pokau na aha mombaui baju' i Harun da ia mokalaja samata-mata mombau anu Ku palentahkon salaku imam.

⁴ Ka' pokau mule' na aha mombau anu opokona i saha'an, evod, juba', kameja anu osuji', suluban ka' pombutu'. Baju' nu imam aijo' tionyo ahi' nubau nu aha da nupusok i Harun utus tu'a nu beleyum ka' to ana-anaknyo da mombau anu Ku palentahkon salaku imam.

^5-6 Baju' aijo' anu nubau nu aha tionyo ahi' laken mobilu', mingkamumu' ka' momea', banangnyo mosoni' ka' lenan anu ma'ima' hondo. Ka' mule' evod osuji' na pombunga-bungai.

⁷ Ohua na segotnyo oposegot i evod aijo'mo na oposegot i bikoang tionyo ahi' opoka'ut i sasu sambiha' ka' sambiha'.

⁸ Sa'angu' na pombutu' anu tinonun ma'ima' hondo hudenyo pokakanamo sumo aijo' tionyo ahi' opoka'ut i evod aijo' da timbalimo jadi sa'angu' na bahagian.

^9-12 Ala na batu dalima ohua'. Lio na samian anu pande na montutuk mosoni' ka' pande na montulisi batu aijo' sanggo nu to ana-anak i Yakub anu sampulu' ka' ohua', otampu'uni hi utus tu'a, sa'angu' na batu anom na sanggo. Lantas ohua' na batu mainan aijo' tionyo ahi' opokona i bikoangnyo mosoni' ka' opokona i ponsegoti bikoang nu evod salaku bau pontandai sampulu' ka' ohua' na lee' mae nu tulunan Israel. Tiba jalan anu sumo aijo' i Harun momboamo sanggo nu aha i bikoangnyo, sahingga Aku, Tumpu, saja' monginau' aha.

¹³ Gampanyo suele nu bungkai mosoni' aijo',

¹⁴ tionyo ahi' suele obau ohua' na lante' mosoni' anu madi' ko galo'nyo anu obau sumo tombo oposegot i bikoangnyo nu mosoni' aijo'.”

Anu opopake i saha'an

¹⁵ “Baui na Imam Daka' anu opake i saha'an da opake de ia mongka'oho'mo mompokilawa mosia na pongka'oho' nu Tumpu Allah. Hude anu osuji' opa-opake i saha'an aijo' tionyo ahi' pokakana tiba hude anu osu-osuji' bau evod.

¹⁶ Obau sulapa' opat ka' olipat ohua', ka' ko mantannyo tiba ko bolanyo opokakanakon bubu' 22 sentimeten.

¹⁷ Opokonai opat na jiji'nyo na batu mainan anu opake i saha'an aijo'. I jiji'annyo anu momona batu delima, batu topas ka' baiduri sepah.

¹⁸ I jiji'annyo anu ko ohua'nyo batu zamrud, batu nilam ka' intan.

¹⁹ I jiji'annyo anu ko totolu'nyo batu lazuardi, batu ake', ka' batu kecubung.

²⁰ I jiji'annyo anu ko opatnyo batu pirus, yakut, ka' ratna cempaka. Sampu-sampulu' ka' ohua' na mainan aijo' tionyo ahi' opuuti nu mosoni'.

²¹ Toto sa'angu' na mainan aijo' tionyo ahi' otulisi sala'sa'angu' na sanggo nu anak i Yakub anu sampulu' ka' ohua' salaku tanda da boli okolilimi na tulunan nu bansa Israel.

²² Bau na anu opopake i saha'an aijo' ohua' na lante'nyo mosoni' anu madi' ko galo'nyo obau susumo tombo.

²³ Bau suele ohua' na pasinsingnyo mosoni' ka' pokona i susunyo ohu-ohua' sasu aita' anu opake i saha'an aijo'

²⁴ lantas posoop na lante' ohu-ohua' aijo' i pasinsingnyo haha aijo'.

²⁵ Ohu-ohua' na puusnyo mule' nu lante haha aijo' suele mule' ahi' opopuut i bingkainyo ohu-ohua', da anu opa-opake i saha'an aijo' timbali opogantum nu tombo na sasu ahop nu bikoang nu evod.

²⁶ Obau mule' na pasinsingnyo mosoni' ohua', lantas pokona i anu opa-opake i saha'an aijo', i susunyo sasu aluknyo bahagian anu mongkona evod.

²⁷ Lapas aijo' bau mule' ohua' na pasinsingnyo mosoni' ka' pokona i sasu ahop na tombo nu evod anu opo-oposegot i bikoang koko anu pino-pinogantum na nongka'ut gio-gio' i aluknyo, sasu buanyo nu pombutu'an kompong, anu tinonunmo ima-ima' hondo.

²⁸ Pasinsingnyo anu opa-opake i saha'an tionyo ahi' opogantum nu tombo mobilu' i pasinsing nu evod da anu opa-opake i saha'an aijo' sabole-bole i buannyo ka' madi' tongkakahusu'.

²⁹ De i Harun minsoopmo i uno nu tampat anu susi', ia tionyo ahi' momboa to sanggo-sanggo nu tulunan i bansa Israel anu pinotulis aijo' pina-pinake hi saha'annyo, da Aku, Tumpu, saja' monginau' mian anu pinalesayamo hi beleng-Ku.

³⁰ Pokonai Urim ka' Tumim i uno nu anu opa-opake i saha'an aijo' da nupake i Harun de ia mangadapmo mae hi beleng-Ku. De tempo'nyomo susumo aijo' tionyo ahi' saja' mompake anu opa-opake i saha'an, da nusumbu' pa' mosia na pongka'oho'-Ku kona hi aha mian nu Israel.”

Baju' sangga'at anu nupake nu imam

³¹ “Juba' anu opusok i bawo nu evod, tionyo ahi' iwi-iwi' laken mobilu' na obau.

³² Gogohongnyo opohoson nu pita' anu otonun da madi' sampa mobeak.

^33-34 I duhu-duhuk nu lamalinsingnyo anu i aluknyo tionyo ahi' obaui bunga-bunganyo susumo bua' nu dalima laken mobilu' na obau, mingkamumu' ka' momea', o olo-oloti nu dio-dionyo mosoni' na obau.

³⁵ Juba' aijo' tionyo ahi' nupake i Harun de kalajanyo salaku imam nu baumo. De ia tokamo mangadap hi beleng-Ku i Salipi Susi', kabai mompala'imo tampat aijo', ohongomo na onyi' nu dio-dio aijo', da boli ia silaka.

³⁶ Bau na mainan mosoni' anu madi' ko galo'nyo, ka' otulisi potatae, 'Mokalaja samata-mata hi Tumpu.

³⁷ Popuut na aijo' i suluban nu tombonyo anu mobilu'.

³⁸ Bunga-bunganyo mosoni' aijo' tionyo ahi' nupusok i Harun i siakannyo da Aku, Tumpu, montalima iwi-iwi' na anu osombahkon, anu nuboa mae nu mian Israel hi beleng-Ku, mau mule' aha anu momboa mae anu osombahkon aijo' nombaumo kasala'an.

³⁹ Kameja i Harun tionyo ahi' otonunakon lenan anu ma'ima' hondo na obau. Bau suele sa'angu' na suluban lenan anu ma'ima' hondo na obau, ka' pombutu'nyo o suji'.

⁴⁰ Bau na kameja, pombutu' ka' suluban anu nupake nu to ana-anak i Harun da aha otoa taalu' anu ahi' o adati.

⁴¹ Popusok na baju' aijo' hi Harun utus nu beleyum ka' to ana-anaknyo. Pipi'i nu lanya' nu zaitun na aha, tiba jalan anu sumo aijo' aha obalakatimo ka' samata-matamo mombau anu Ku palentahkon salaku Imam.

⁴² Lantas baui na aha saluan kodo' hude lenan na oka'ut, ko mantannyo lengkat i lampeokan mokaiyong toka i pa'a da bau pongkukubi butong anu madi' pantas otoa.

⁴³ Saluan aijo' tionyo ahi' saja' opusok nu aha de aha minsoopmo i Kemah-Ku kabai mongohanimo mezbah monsombahmo mae salaku imam i Salipi' Susi', da aha madi' silaka kalana kantoanmo na butong nu aha anu madi' pantas otoa. Atulan aijo' saja' nupake i Harun ka' hi to lelee'nyo.”