NOSABATMO 25 - KITAB NU TUMPU ALLA LELE MA'IMAI'

Anu osombahkon i Kemah nu Tumpu

¹ Tumpu notatae hi Musa,

² “Pokau na aha mian nu Israel momboa anu osombahkon hi beleng-Ku. Ihe na anu tolotuka' na kinyonyoanyo, tionyo ahi' momboa anu osombahkon

³ sumo: mosoni', salaka, ka' tambaga;

⁴ hude lenan anu ma'ima' hondo, hude laken anu mobilu', hude mingkamumu' ka' momea', hude bulu nu mee' na binau,

⁵ kilit nu domba lakinyo anu binuhitanmo momea', kilit anu ma'ima' hondo, kau' akasia,

⁶ lanya' pongisi sulu, lampa-lampa ponggalo'i lanya' anu opake i adat nu agama da ponggalo'i dupa opapui da manohong.

⁷ Ngangahan nu batu mainan anu opokona i baju', anu nupusok nu Imam Daka' i saha'an.

⁸ Pokau na bansa aijo' mombau sa'angu' na kemah ponsomban Aku, da Aku jojoong hi aha.

⁹ Kemah ka' posadiaonnyo tionyo ahi' nubau nu aha, susumo anu pinoto'imo ka' Ku potiju'je hi beleyum.”

Peti' Palajanjian

¹⁰ “Pombau sa'angu' na Peti' kau' akasia ko mantannyo 110 sentimeten, ko bolanyo ka' ko tangkasnyo bubuu' 66 sentimeten.

¹¹ Unonnyo ka' sambiha'nyo olapisi nu mosoni' anu madi' ko galo'nyo. Ka' bingkainyo mosoni' na obau.

¹² Kau' anu bau polembanan obaui opat na pasinsingnyo mosoni' na obau, ka' opokait i tengkenyo opa-opat, poti-potimbiha' opokonai toto ohua' na pasinsingnyo.

¹³ Obau suele na polembanan kau' akasia na obau ka' olapisi nu mosoni',

¹⁴ lantas posoopmo na kau' polembanan aijo' i pasinsingnyo poti-potimbiha' i peti' aijo'.

¹⁵ Kau' bau polembanan aijo' tataap sosoop madi' toho' o alinakon i pasinsingnyo aijo'.

¹⁶ Lantas i uno nu peti' aijo' na pompo'isian nu beleyum ohua' na batu anu ko tulisannyo palentah anu Ku bee'je hi beleyum.

¹⁷ Obau na pongkolobi peti' aijo' mosoni' na obau anu madi' ko galo'nyo ko mantannyo 110 sentimeten ka' ko bolanyo 66 sentimeten.

¹⁸ Tutuk na mosoni' obau ohua' sumo malaekat anu ko polipik-Nyo.

¹⁹ I puusnyo-puusnyo nu pongkolobi peti' aijo' opo'una'i sa'angu'. Ohu-ohua' na anu sumo malaekat anu ko polipiknyo aijo' tionyo ahi' obau ka' madi' timbali o alinakon aijo' i pongkolobinyo nu peti' aijo',

²⁰ ka' obau mompaha ahop polipiknyo mongkukubi peti' aijo'.

²¹ Po'isi na batu ohu-ohua' i uno nu peti' aijo', ka' okulubi.

²² I tampat aijo' na kasingkabotan-Ku tiba beleyum, ka' aita' mae i kolopnyo i olot nu ohua' na anu sumo malaekat aijo', beleyum Ku bee'ije to atu-atulan-Ku da opake hi bansa Israel.”

Meja' bau pompotimpasan roti anu osombahkon

²³ “Obau sa'angu' na meja' kau' akasia na obau ko mantannyo 88 sentimeten, ka' ko bolanyo 44 sentimeten, ka' ko tangkasnyo 66 sentimeten.

²⁴ Olapisi nu mosoni' anu madi' ko galo'nyo ka' pokonai bingkainyo mosoni' titikub.

²⁵ Obau na duhu-duhuk nu meja' ko bolanyo 7,5 sentimeten ka' olotnyo titikub aijo' opokonai mosoni'.

²⁶ Obau opat na pasinsingnyo mosoni' na obau ka' pokona i pasu'nyo opa-opat ka' i tengkenyo koko sohipi'nyo.

²⁷ Pasinsingnyo aijo' pomposoopan kau' anu bau polembanan da meja' aijo' timbali o hangkat hingga-hinggat.

²⁸ Kau' polembanan aijo' tionyo ahi' kau' akasia na obau ka' olapisi nu mosoni'.

²⁹ Obau na to lea-lean ka' to sangki-sangkin, to sele-selekan ka' to mangko-mangko' da pongisian anggur anu osombahkon. Iwi-iwi' na posadiaonnyo nu meja' aijo' tionyo ahi' mosoni' na obau anu madi' ko galo'nyo.

³⁰ Ka' meja' aijo' tionyo ahi' opo'una' i ahop nu Peti' Palajanjian, ka' i meja' aijo' tionyo ahi' saja' oposadia na roti anu osombahkon.”

Tengke nu sulu'

³¹ “Obau na tengke nu sulu' mosoni' na obau anu madi' ko galo'nyo. Pompokokoan ka' pontoongian tionyo ahi' mosoni' na otutuk; pomboti-botikinyo, tibamo bunganyo anu ma'isa timboka ka' kayakupnyo tionyo ahi' obau sa'a-sa'angu'mo madi' tongga'at tiba kasuhangannyo tiba pontoongiannyo.

³² Aijo' i pontoongian tionyo ahi' obau' anom na panga'nyo, totolu' na panga'nyo i kowi ka' mule' i koanannyo.

³³ Toto sa'angu' na panga'nyo tionyo ahi' obotiki bau pombunga-bungai totolu' na bunga sumo badam anu ma'isa tinimboka ka' kayakupnyo.

³⁴ I pontoongian tionyo ahi' obaui pombunga-bungai opat na bunga sumo badam tiba bunga ka' kayakubnyo.

³⁵ I aluknyo nu to panga-panga'nyo aijo' tionyo ahi' obaui bunganyo anu ma'isa timboka.

³⁶ Songko-songko na tengke nu sulu' aijo' tibamo to bunga-bunganyo anu ma'isa tinimboka ka' to panga-panga'nyo tionyo ahi' sa'angu' na kolongan nu mosoni' na otutuk ka' madi' ko galo'nyo.

³⁷ Obau popitu' na sulu' i tengke nu sulu' aijo' ka' tutungi ma'i-ma'ima' sahingga jingkanyo majo'on.

³⁸ Obau na bau pombelesi' sumbu nu sulu' ka' mangko'nyo suele mosoni' na obau anu madi' ko galo'nyo.

³⁹ Tolumpulu' ka' olima' na kilogram na mosoni' anu madi' ko galo'nyo na obau tengke nu sulu' aijo tibamo posadiaonnyo.

⁴⁰ Obala'ingati da tengke nu sulu' aijo' obau susumo sonto' anu pinotiju'-Kumo hi beleyum aita' i bawo nu bungkutnyo aiya.”