NOSABATMO 22 - KITAB NU TUMPU ALLA LELE MA'IMAI'

Atulan de mombolosi kalugi'an

¹ “Ihe na mombuling sa'angu' na sapi' kabai domba, lantas kinolotnyomo kabai pinobaluknyomo, sa'angu' na sapi' tionyo obolosi nu olima' na sapi' ka' sa'angu' na domba obolosi nu opat na domba.

^2-4 Ia tionyo mombolosi anu binulingnyo. De madi' ko anu daagi' hi ia apa-apaa, iamo na opobaluk susumo botuan bau pombolosi anu binulingnyomo. De anu binulingnyo aijo' sapi', keledai kabai domba, ka' daagi' i humpak hi mian aijo' daagi' tumuu', ia tionyo mombolosi de sa'angu' na potuu'on obolosi ohua' na potuu'on. De samian na anu mombuling pihi o hakop i uno nu sa'angu' na laigan lantas ia pinateanmo, mian anu nompatei aijo' madi' ko sala'nyo. Panyo de han aijo' binau sina-sinaa, mian anu nompateimo sala'.

⁵ Ihe na anu nompolapas potuu'onnyo mongotot i ale'nyo kabai i ale' nu anggurnyo, lantas binatang mamba mongkaan hasin nu ale' nu mian sangga'at, saba' tumpunyo nu binatang aijo' tionyo ahi' mombayan pombolosi kalugi'an nu hasin anu ma'ima' i ale' kabai i ale' nu posi anggurnyo.

⁶ Ihe na nomposuun apu i posi ale'nyo lantas apu aijo' molele i ale' nu mian sangga'at, ka' mompapuimo gandum anu tinumuu'mo kabai timpa nu gandum anu sala'je pinadak, saba' mian anu nomposunmo apu aijo' tionyo ahi' mombayan pombolosi kalugi'an.

⁷ De daagi' ko mian anu mompahakona lantas mompo'una' apa-apaa sumo doi kabai balang anu ko angga'nyo. Panyo lapas aijo' anu pino'una' aijo' binulinganmo. De anu nombuling o humpakmo, ia tionyo ahi' mombayan pinduan lipat.

⁸ Panyo de anu mombuling madi' o humpak, mian anu pinompo'una'an aijo' tionyo ahi' oboa i tampat ponsomban, ka' ikiijo' ia tionyo ahi' basumpa' ka' montaloakon tukoonyo ia madi' nombuling balang anu pino'una' hi ia.

⁹ De pahantuda'an mongkona halata', pa' sapi', keledai, domba, pakean kabai maumo pa' apaa na anu nolapus lantas po'ule' i humpak, to mia-mian anu mangaku ia na tumpunyo tionyo ahi' oboa i tampat ponsomban. Mian anu nupoto'i nu Tumpu Allah salaku mian anu ko sala'nyo tionyo ahi' mombayan pinduan lipat hi tumpunyo.

¹⁰ De samian anu mompotuu' keledai, sapi', domba kabai potuu'on sangga'at anu nu sangalunyo. Mamanga mae potuu'on aijo' natemo, binelaon kabai ingagoan nu mian padahan madi' ko anu nonsakisi.

¹¹ Han anu sumo aijo' ia tionyo ahi' mamba i tampat ponsomban ka' basumpa' i sanggo nu Tumpu ka' montaloakon tukoonyo ia madi' nombuling potuu'on anu pinoki potuu'mo hi aha. De memang ia madi' nombuling, tumpunyo tionyo ahi' mombayan pombolosi kalugi'an aijo' ka' mian anu nompotuu'mo madi'mo timbali mombayan pombolosi kalugi'an.

¹² De potuu'on aijo' binuling nu mian sangga'at, saba' mian anu nompotuu'mo tionyo ahi' mombayan pombolosi kalugi'an hi tumpunyo.

¹³ De potuu'on aijo' kinaan nu sangko binatangnyo, anu nompotuu' tionyo ahi' mompotoa bukunyo anu tinontuha' bau sa'angu' na bukuti' hi tumpunyo, madi'mo pilenje ia mombayan binatangnyo bau pombolosi kalugi'an.

¹⁴ De ihe-he na mian nonsabon sa'angu' na potuu'on lantas potuu'on aijo' belaon kabai mate tempo'nyo aijo' tumpunyo madi' ko anu i tampat aijo', anu nonsabon tionyo ahi' mombayan pombolosi kalugi'an.

¹⁵ Panyo de tempo'nyo aitu daagi' ko tumpunyo ikiijo' anu nonsabon madi' pilenje mombayan pombolosi kalugi'an. De potuu'on aijo' bau pongalapan tambo, kalugi'annyo baumo pombolosi tambonyo.”

Atulan mongkona kalakuan anu ma'ima' ka' monsombah

¹⁶ “Ihe na lewa' monsale'i samian na langkoyang anu ma'isa toho' no'osoa ka' ma'isa nodohoi da male' hingga-hinggat tiba ia, tionyo ahi' mombayan sompa'nyo ka' mongosoai ia.

¹⁷ Panyo de tuumanyo nu boune aijo' madi' mompobee' mo'ane aijo' mo'osoa tiba anaknyo, mo'ane aijo' tionyo ahi' mombayan hi tuumanyo aijo' doi konjoo'nyo sumo sompa' nu samian na langkoyang anu ma'isa toho' no'osoa.

¹⁸ Ihe-he na boune anu mompokonai hame tionyo opatei.

¹⁹ Mian anu masala' hi binatang tionyo ahi' opatei.

²⁰ Ihe na monsombahkon koloban hi to pilo-pilogot sangga'at anu misa' hi beleng-Ku, Tumpu, tionyo ahi' obee'i hukuman opatei.

²¹ Boli monsusa'i kabai obau madi' adin na mian anu i salipu'an mae; o inau' ahi' na belemiu naipuan mae suele mian anu i salipu'an kiijo' mae i Mesir.

²² Boli monsusa'i taha-tahahumo anu balu kabai anak anu unon.

²³ De belemiu mongkabisa'i aha, Aku, Tumpu mohongomo aha de aha momoitamo mae tulung hi beleng-Ku.

²⁴ Pusamo na Aku ka' Ku pateimo na belemiu i uno nu pahampatean, sahingga to bengke-bengkele' nu belemiu balumo, ka' to ana-anak nu belemiu unonmo.

²⁵ De belemiu momposabon doi hi mian kasiasi atina' hi bansang-Ku boli obau sumo anu montage samaya'nyo ka' tionyo ko bunganyo.

²⁶ De komiu mongala juba' anu nu mian sangga'at salaku bau ponggadei samaya'nyo, juba' aijo' tionyo ahi' osule'akon nu belemiu ma'isa pe'e sinaa makakinsap,

²⁷ kalana olamo aijo' na hudenyo nu pusok da mamut na butongnyo. De madi'mo osule'akon hi ia te daagi' apaa na nu pusok bau pinsabutnyo de ia hoyotmo? De ia momoita mae tulung hi beleng-Ku, saba' Ku bee'mo apaa na anu i hongong-Kumo kalana Aku mongkalibosimo.

²⁸ Boli monsumpa'akon Tumpu Allah ka' boli montotobi'akon to pola-polaya' bansa nu belemiu.

²⁹ Toka i tempo'nyo anu tinantukanmo, sombahkonmo hi beleng-Ku na bua' nu gandum nu belemiu, sambahagian, ueenyo nu anggur nu belemiu, lanya' nu zaitun nu belemiu. Bee' mae hi beleng-Ku na to ana-anak tumpe mo'ane nu belemiu

³⁰ ka' suele sapi' ka' domba lakinyo anu momona inganakakon. Pobee' pe'e na binatang haha aijo' mojajalan tiba tinanyo pitun sinaa na kopinnyo lantas bee'mo mae hi beleng-Ku i sinaa ko ialunnyomo.

³¹ Belemiu mian anu pinalesayamo hi beleng-Ku, kalana aijo' mau mule' binatang apaa na anu nu sa'u nu sangko binatangnyo, madi' timbali okaan nu belemiu na antoknyo; bee'mo na aijo' hi to dede-dedeng.”