NOSABATMO 20 - KITAB NU TUMPU ALLA LELE MA'IMAI'

Sampulu' na Palentah

¹ Lantas Tumpu Allah notataemo, ka' sumo uuka na potatae-Nyo,

² “Akumo na Tumpu Allah nu belemiu anu nomboamo mae belemiu nosabat lengkat i Mesir tampat nu belemiu binotuanan.

³ Boli monsombah to pilo-pilogot sangga'at, ola Aku na osombah.

⁴ Boli belemiu mombau patong anu sumo apa-apaa aita' i langit, i dunia kabai i uno nu uee i aluk nu dunia.

⁵ Boli monsombah patong anu sumo aijo' kalana Akumo na Tumpu Allah nu belemiu, ka' Aku madi' mongka'oho' opokakanakon tiba maumo pa' apaa. To mia-mian anu mongka'ideki Aku, Ku hukum toka-toka i lee' ko totolu'nyo ka' ko opatnyo.

⁶ Panyo Ku potoa na kalibosan-Ku hi mada-madala na lee' nu to mia-mian anu mongkanonongi Aku ka' tulu-tulutan hi Palentah-ngKu.

⁷ Boli ola bau kasanggoan na sanggong-Ku, kalana Aku, Tumpu Allah nu belemiu, mohukum mau mule' pa' ihe na anu mombia-biangakon sanggong-Ku.

⁸ Lame'akon na sinaa nu Sabat ka' o adati na sinaa aijo' salaku sinaa anu susi'.

⁹ Belemiu Ku bee'i anom sinaa na mokalaja,

¹⁰ panyo sinaa anu ko ipitunnyo aijo'mo na sinaa pilawean anu obee' hi beleng-Ku. I sinaa aijo' madi' ko samian pe'e na timbali mokalaja, mau belemiu mau pe'e to ana-anak nu belemiu, to posa-posaihon nu belemiu, potuu'on nu belemiu, kabai mian anu i salipu'an mae anu jojoong i lipu' nu belemiu.

¹¹ I uno nu tempo' anu anom sinaa Aku, Tumpu, nompotimbalimo tano', langit, ambai ka' iwi-iwi' na anu jojoong i unonyo, panyo i sinaa ko iptunnyo Aku nilawemo. Mokonyo aijo' Aku, Tumpu, nombalakatimo sinaa nu Sabat ka' ingalang-Kumo bau baging-Ku.

¹² O adati na tuuma ka' tina nu belemiu da belemiu mohumpak ka'ima'an ka' mantan nu umun i lipu' anu Ku bee' hi belemiu.

¹³ Boli mompatei.

¹⁴ Boli masala'.

¹⁵ Boli montomang.

¹⁶ Boli timbali sakisi anu madi' totu'u hi mian sangga'at.

¹⁷ Boli mongkamilui anu nu mian sangga'at: laigannyo, bengekele'nyo, to posa-posaihonnyo, potuu'onnyo, keledainyo, kabai mau mule' pa' apaa na anunyo.”

Mian nu Israel nabuhukmo

¹⁸ Salatan to mia-mian nohongomo gohung ka' onyi' nu tolompet, tiba mule' nontoamo kilat ka' bungkutnyo anu nintibukmo, aha i lakatnyomo ka' nabuhukmo ka' tinuminjomo aijo' mae jo'o-jo'on.

¹⁹ Aha notataemo hi Musa, “Beleyumo na motatae mae hi kami, kami mohongoje; panyo boli Tumpu Allah na motatae mae hi kami dumo kami mate.”

²⁰ Tinaaman i Musa, “Boli mabuhuk. Tumpu Allah toka mae ola monsobai belemiu da belemiu tataap montuluti Ia, ka' madi' baladosa'.”

²¹ Panyo mian haha aijo' tataap satinjonyo aijo' mae jo'o-jo'on ka' ola i Musa na nongohanimo kundom anu pini-pinikatmo i tampat anu kinatokanmo nu Tumpu Allah.

Atulan mongkona mezbah

²² Tumpu nompalentahmo i Musa da otaloakon hi aha bansa Israel, “Belemiu nontoamo mosia na Aku Tumpu, notataemo hi belemiu lengkat mae i langit.

²³ Boli belemiu mombau to pato-patong salaka kabai mosoni' da osombah nu belemiu bau pombolosi Aku.

²⁴ Baui na Aku sa'angu' na mezbah te tano' na obau lantas sombahkonmo ikiijo' domba ka' sapi' nu belemiu bau koloban anu otunui ka' koloban bau pompodame. Maumo pa'ia mae na tampat anu Ku tantukan hi belemiu salaku tampat ponsomban Aku, Aku tionyo mae toka ka' mombalakati belemiu.

²⁵ De belemiu mombauimo Aku sa'angu' na mezbah batu na obau, boli mombau batu na opa'at kalana de belemiu mompake pa'at bau pombiha' batu', mezbah aijo' madi'mo timbali opake bau ponsomban Aku.

²⁶ Boli mombau mezbah anu matangkas sahingga o ojanije na moliba', da boli otoa na bagian nu butong nu belemiu anu madi' pantas otoa.”