NOSABATMO 17 - KITAB NU TUMPU ALLA LELE MA'IMAI'

Uee nosabat mae i batu daka'

¹ Lapas aijo' iwi-iwi' na aha mian nu Israel nompala'imo padang bola Sin ka' nolali-lalinmo lengkat i sa'angu' na tampat mamba i tampat sangga'at susumo anu pinalentahkonmo nu Tumpu. Daagi' kino sinaa sa'angu' aha nombaumo kemah i Rafidim, panyo ikiijo' madi' kino ueenyo anu o inum.

² Lantas aha nososonmo hi Musa ka' notatae, “Bee'i mae na kami uee anu o inum.” Tinaaman i Musa, “Kadaka' komiu nososonmo ka' monsobaimo Tumpu?”

³ Panyo mian haha aijo' talalomo hondo negot sahingga aha saja'mo nososon hi Musa. Koonyo nu aha, “Kadaka' binoamo mae nu beleyum na kami nosabat lengkat mae i Mesir? Sahingga kami, to ana-anak mami ka' potuu'on mami i natemo nu megot?”

⁴ Lantas i Musa notataemo hi Tumpu, ia notatae, “Apaa na anu tionyo ku bau hi mian haha aiya? Pitoa, aha mongka'oho'mo mompobunu'i mae nu batu.”

⁵ Notataemo na Tumpu hi Musa, “Laga mae to pia-piangkuka na polaya' ka' lumajangmo hingga-hinggat tiba aha aijo', belemiu na mamba momona. Boa suele na tokon anu pinake nu beleyum ponsapahi Kaunyo nu Nil.

⁶ Aku tuminjoje i ahop nu beleyum aita' i batu anu daka' i Bungkutnyo nu Sinai. Sapahi na batu aijo' da uee mosabat sahingga to mia-mian timbalimo monginum.” I Musa nombaumo sumo aijo' sinakisian nu to pola-polaya' nu aha mian Israel.

⁷ Tampat aijo' sinanggohanmo Masa kalana i tampat aijo' aha mian nu Israel nonsobaimo Tumpu tempo'nyo aha nompokilawa, “Pa' Tumpu monsangalui mae kita kabai madi'?” Tampat aijo' sinanggohanmo suele Meriba kalana i tampat aijo' aha mian nu Israel nososonmo.

Nahampatemo tiba aha mian nu Amelek

⁸ Lapas aijo' mian nu Amelek tinokamo nolambanimo mae da mahampatemo tiba aha mian nu Israel i Rafidim.

⁹ Notataemo na i Musa hi Yosua, “Pile'i to pia-piangkuka na mian anu timbali mahampate tiba mian nu Amelek. Dodop aku tuminjoje aita' i puge'nyo montoongi tokon anu pinokau nu Tumpu Allah oboa.”

¹⁰ I Yosua nombaumo apaa na anu pinokaumo i Musa hi ia. Ia nambamo nahampate tiba aha mian nu Amelek, panyo i Musa, i Harun ka' i Hur, nindakomo nokiita' sampe tinokamo aita' mae i puge'nyo.

¹¹ De i Musa daagi' montangkakon limanyo, mian nu Israel untung na mahampate. Panyo de i Musa montauhakonmo limanyo, mian nu Amelek untungmo na mahampate.

¹² Salatan i Musa kinainmo, i Harun ka' i Hur, nongalamo sa'angu' na batu da kasuhangan i Musa. I Harun ka' i Hur, tinuminjomo sasu kewe' ka' koanan i Musa da monsakan limanyo da saja' tangka-tangka' sampe sinaa makakinsapmo.

¹³ Ahennyo aha mian nu Amelek pinatundu'mo i Yosua.

¹⁴ Notataemo na Tumpu hi Musa, “Tulis na ka'untungan aiya nahampate, da saja' o inau'. Poto'i hi Yosua taalu' Aku nompateimo mian nu Amelek.”

¹⁵ Lantas i Musa nompotinjomo sa'angu na mezbah ka' sinanggohannyomo “Tumpu aijo'mo na nompo untung aku Nahampate.”

¹⁶ Notataemo na i Musa, “Toongi hoso-hoson na Tumpu anu nompo untung kita i pahampatean! Tumpu nahampatemo nongewa mian nu Amelek sampe toka sidu-sidutu'!”