NOSABATMO 16 - KITAB NU TUMPU ALLA LELE MA'IMAI'

Manna ka' tomonsi' pipidoi

¹ Lantas iwi-iwi' na mian nu Israel nambamo lengkat mae i Elim, ka' tinokamo i tanggal sampulu'mo ka' olima' bitu'on ko ohua'nyo salatan aha nompala'imo mae Mesir, aha tinokamo i padang bola Sin, olotnyo nu Elim ka' Bungkutnyo nu Sinai.

² I padang bola aijo' aha iwi-iwi' nososonmo hi Musa ka' hi Harun.

³ Aha notataemo, “Sahanyo kami pinateanmo nu Tumpu i Mesir. Ikiijo' mae kami daagi' moko ala sumuhang mongkaan ponoha' ka' roti sampe mobosu. Panyo belemiu nomboamo mae kami no'uuka da kami iwi-iwi' matemo nu ohop.”

⁴ Tumpu notataemo hi Musa, “Uuka aiya Ku tau'akonmo mae na anu okaan manjoo' hondo sumo ujan bau bagi miu iwi-iwi'. Sansina-sinaa belemiu tionyo ahi' molimu' anu okaan aijo' saimbanggan anu okaan sansinaa. Tiba jalan anu sumo aijo' Aku monguji'mo mian anu pinalesayamo hi beleng-Ku da Ku sumbu' pa' aha mohongo-hongo to pale-palentah-ng-Ku kabai madi'.

⁵ I sinaa ko anomnyo aha tionyo ahi' molimu' anu okaan aijo' pinduan lipat na konjoo'nyo.”

⁶ Lantas notataemo na i Musa ka' i Harun hi mian nu Israel iwi-iwi', “Mamalom uuka aiya osumbu'mo nu belemiu taalu' Tumpu na nomboa mae belemiu nosabat lengkat mae i Mesir.

⁷ Dodop daagi' subu belemiu montoamo jingka salaku tanda Tumpu tokamo. I hongomo nu Tumpu na belemiu saja'mo motambuha' hi Ia; memang, hi Tumpu kalana kami aiya ola mombau apaa na anu pinalentahkon-Nyomo.

⁸ Tumpu nombee'imo belemiu ponoha' de mamalomo ka' roti daagi' subu sampe belemiu mobosu, kalana Tumpu nohongomo belemiu saja'mo motambuha' hi Ia. Sabenannyo de belemiu saja'mo motambuha' hi kami, belemiu sumomo saja'mo motambuha' hi Tumpu.”

⁹ Lapas aijo' i Musa notataemo hi Harun, “Pokau mae na aha iwi-iwi' toka mae mangadap hi Tumpu, kalana i hongo-Nyomo na aha nososon.”

¹⁰ Hau-haunyo i Harun notataemo hi aha iwi-iwi', aha nontoamo nokiijo' i padang bola ka' monti-montiik jingka nu Tumpu kinantoaanmo i uno nu kundom.

¹¹ Tumpu notataemo hi Musa,

¹² “I hongong-Ku mo na mian nu Israel nososon. Poto'i hi aha de mamalomo aha mongkaanmo ponoha' ka' de daagi' subu aha mongkaanmo roti sampe mobosu. Sahingga nusumbu'je nu aha taalu' Akumo na Tumpu, Tumpu Allah nu aha.”

¹³ Salatan mamalomo tinokamo na tomonsi' pipidoi manjoo' hondo sahingga nonsongkohimo iwi-iwi' na tampat pinombauan kemah, ka' salatan daagi' subu tinudunmo na ondu' aijo' duhu-duhuk pinombauan kemah.

¹⁴ Salatan ondu' aijo' notiismo, kinantoaanmo aijo' i padang bola balang anu monipis sumo sonuku nu ikan ka' monipis hondo sumo ondu' anu tinobengmo.

¹⁵ Salatan tinoamo nu aha mian Israel, aha madi' monsumbu' pa' apaa na aijo'. Sahinga aha nompaha poki-pokilawamo samian ka' samian, “Apaa na aijo'?” Lantas i Musa notataemo hi aha, “Aijo'mo na anu okaan anu nubee' nu Tumpu hi belemiu.

¹⁶ Tumpu nompalentahmo da toto samian molimu' konjoo'nyo asanmo pa' sangkuka na anu opalalui, aijo'mo toto sangauan mohumpak ola ohua' na liter samian.”

¹⁷ Mian nu Israel nombaumo sumo aijo'; panyo daagi' ko anu nolimu' nolabimo ohua' na liter samian, ka' daagi' ko anu madi' sinukup.

¹⁸ Salatan tinakanmo nu aha atina'je ka' sinumbu' saba' mian anu nolimu' manjoo' madi' nolabi, ka' anu nolimu' sangkiding, madi' naga'a. Toto samian nolimu' konjoo'nyo saimbanggan anu opalalui.

¹⁹ I Musa notataemo hi aha, “Mau mule' pa' ihe boli mompo una' anu okaan aijo' toka dodop mau ola sangkiding.”

²⁰ Panyo tinoa pia-piangkuka na mian aijo' hi aha madi' mompajuli potatae i Musa. Aha sabole-bole ahi' nompo una' anu okaan aijo' sambagian. Dodododopnyo anu okaan aijo' ingiasonmo ka' nawa'imo; sahingga i Musa notambuha'mo hi aha.

²¹ Toka subu aha molimu' anu okaan aijo' konjoo'nyo saimbanggan anu opalalui nu aha, ka' de sinaa masingitmo, kaanon anu tinontuha' i tano' aijo' tontihismo.

²² I sinaa ko inomonnyomo aha nolimu'mo anu okaan aijo' konjoo'nyo pinduan lipat, aijo'mo opat na liter kona hi samian. Iwi-iwi' na to pola-polaya' nu aha tinokamo ka' nompoto'imo han aijo' hi Musa.

²³ I Musa notataemo hi aha, “Aiya na palentah nu Tumpu: Dodop samata-mata sinaa pilaweanmo, sinaa nu Sabat, sinaa anu osombahkonmo hi Tumpu. Apaa na anu kahanda' otunui nu belemiu sinaa aiya, tunuimo, ka' apaa na anu kahanda' o unjang nu belemiu, unjangmo. Labinyo nu anu opalalui sinaa aiya, posi po iwi'mo ka' po una' bau kapalaluan dodop.”

²⁴ Jadi labinyo nu anu okaan aijo' nu po una'mo nu aha bau kapalaluan dodop susumo anu pinalentahkonmo i Musa; anu okaan aijo' madi' mawa'i ka' madi' iason.

²⁵ I Musa notataemo, “Aiyamo na anu okaan nu belemiu sinaa aiya, kalana sinaa aiya sinaamo nu Sabat, sinaa pilawean bau pongadati Tumpu, ka' belemiu madi'mo mongkabot anu okaan aijo' mau pe'e ola sangkiding i sambiha' nu pinombauan kemah.

²⁶ Anom sinaa na kopinnyo belemiu tionyo ahi' molimu' anu okaan, panyo sinaa ko ipitunnyo sinaamo bau pilawean, ka' madi'mo ko anu okaan tudun i sinaa aijo'.”

²⁷ I sinaa ko ipitunnyo to pia-piangkuka mian nu Israel ka'oho' molimu' anu okaan, panyo aha madi' nongkabot apa-apaa.

²⁸ Lantas Tumpu notataemo hi Musa, “Sampe toka hipian na belemiu madi' mongka'oho' mohongo-hongo iwi-iwi' na palentah-ng-Ku?

²⁹ O inau' Aku nombee'imo belemiu sansinaa na milawe. Mokonyo aijo' sinaa ko inomonnyo binee'an-Kumo anu okaan saimbanggan kapalaluan uansinaa. I sinaa ko ipitunnyo toto samian tionyo ahi' jojoongmo i laigan, ka' madi'mo timbali mosabat.”

³⁰ Mokonyo aijo' sinaa ko ipitunnyo, aha madi'mo mokalaja.

³¹ Kaanon aijo' sinanggohan nu mian Israel Manna. Balu-balunyo sumo batu nu bua' nu hemput anu to ise-ise' buhitnyo mopute' ka' nyamitnyo sumo kukis anu binau ginalo'an nu juu'.

³² I Musa notataemo, “Tumpu nompokaumo kita mongala kila-kila ohua' na liter na manna da opo una' hi lee'to, da nutoa nu aha na kaanon anu binee' nu Tumpu hi kita i padang bola, tempo'nyo kita binoa-Nyomo mae nosabat lengkat i Mesir.”

³³ I Musa notataemo hi Harun, “Ala na sa'angu' na kuhon, isi kila-kila ohua' na liter na manna ka' potimpas i ahop nu Tumpu ka' po una' da nutoa nu lee'to.”

³⁴ Lantas i Harun nompotimpasmo kuhon aijo' i ahop nu Peti' Palajanjian da opo una' susumo koonyo nu palentah nu Tumpu hi Musa.

³⁵ Manna aijo' binaumo kaanon nu aha mian Israel kopinnyo pinatompulu' na taun, i lambakonnyo tinoka i Kana'an, tampat anu kinajojoonganmo nu aha. (

³⁶ Pontakalan balang anu mokuut, anu biasa nupake nu mian tempo'nyo aitu isinyouampulu' na liter.)