NOSABATMO 15 - KITAB NU TUMPU ALLA LELE MA'IMAI'

Nyanyian i Musa

¹ Lantas i Musa ka' to mia-mian Israel nonyanyimo, nyanyian aiya bau pompuji' Tumpu, “Aku kahanda'mo manyanyi mompuji' Tumpu kalana Ia nohungku'imo ka' binilahimo. Iwi-iwi' na ajahan ka' anu monsake'i ingalin-Nyomo i uno nu ambai.

² Tumpu anu mahoson nontinjohimo mae aku; Iamo na anu nomposalamatmo mae aku. Iamo na Tumpungku, aku kahanda'mo mompuji' Ia, Tumpu Allah anu nusombah nu mompolee'ku, ku popodaka' na Ia.

³ Tumpu aijo'mo na anu madi' opoko ala o hungku'i ka' anu baani, Tumpu, aijo'mo na sanggo-Nyo.

⁴ Suludadu nu aha Mesir ka' iwi-iwi' na kaletanyo ingalin-Nyomo i uno nu ambai. To kapa-kapala nu suludadu anu baani hondo nolomosmo i Ambai Gelagah.

⁵ Aha i lonyomo nu ambai anu maleeng, ka' sumomo batu nanabu' nokaiyong i lananyo.

⁶ O Tumpu, kahosonan nu Belento talalo hondo okabangangi, binaumo nu Belento na anu monsampobali' nosungke-sungkehetmo.

⁷ Tiba katalasanggoan nu Belento anu daka' hondo Belento nohopu'imo iwi-iwi' na anu nongewamo Belento Pusa nu Belento talalomo hondo kino juhu-juhut susumo apu ka' nompapuimo aha susumo hat.

⁸ Ambai pinuuhanmo nu Belento, uee ningkalulunmo tinimbalimo natangkas, tinuminjomo hodi-hodi' susumo pagan mesen, sahingga lana nu ambai timbalimo otului.

⁹ Notatae na sampobali', ‘Aha ku loloi'mo ka' ku hakopmo, kineatku na bajakku ka' pinateankumo na aha. Lantas iwi-iwi' na halata' nu aha ingagoankumo binagi-bagingkumo ka pinakengkumo sampe na osa.’

¹⁰ Panyo ola minsan na Tumpu tolo husa mompotokamo sinaa anu mompolugi'. Aha tinatanomo susumo timah anu maboat i uno nu bokon anu daka' hondo.

¹¹ Iya na Tumpu Allah sangga'at anu moko ala mohungku'i Belento, o Tumpu Anu Talasanggo hondo ka' anu susi'? Ihe na moko ala mombau anu okabangangi ka' mombau palabuatan anu daka' susumo Tumpu?

¹² Belento nontangkakonmo lima nu Belento koanan sahingga nohopu'mo na sampobali' i lonyomo nu tano'.

¹³ I laya'mo nu belento na bansa anu pinosalamatmo nu Belento aiya, kalana Belento totu-totu'u montoongi janji' nu Belento. Tiba kahosonan anu daka' hondo, aha jinagaanmo nu Belento ka' i laya'mo nu Belento, i tano' nu Belento anu susi'.

^14-15 To bansa-bansa nohongomo ka' i lakatnyomo; mian nu Filistin ka' to pola-polaya' nu Edom ginago'mo. Mian nu Moab anu toto babaani i lakatnyomo, mian nu Kana'an kinulangmo na kinyonyoanyo.

¹⁶ Aha talalomo hondo nabuhuk nonsakisi'i kabaanian nu Tumpu. Tempo'nyo mian anupinalesayamo hi Belento notulumo, sampobali' madi' noko ala nongampang; i lau-lausmo na bansa anu pinobebasmo nu Belento.

¹⁷ Lantas Israel binoamo nu Belento namba i tampat anu pinile'anmo nu Belento da bau kajojoongan nu belento. Aha jinojoongmo i bungkutnyo nu Belento anu susi', i laigan anu pinosi potinjo nu Belento.

¹⁸ Belentomo na Tumpu, Tomundo, anu mompalentah sampe toka sidu-sidutu'.”

Nyanyian i Miryam

¹⁹ Salatan aha mian nu Israel notaapmo i ambai, aha i lumajangmo i lananyo anu notismo. Panyo salatan to kale-kaleta nu aha Mesir tiba ajahan ka' anu sinumake' nokiijo'mo i ambai, Tumpu po'ule'mo nompotimbali ueenyo no ili sahingga aha nolomosmo.

²⁰ Lantas i Miryam samian na nabi boune, utus tu'a i Harun, nongalamo gandangnyo ka' iwi-iwi' na boune suele nohapa'imo gandangnyo nu aha ka' nonsaleleimo.

²¹ I Miryam nonyanyi imo aha, “Panyanyimo bau pompuji' Tumpu kalana Ia nohungku'imo ka' binilahimo. Iwi-iwi' na ajahan ka' anu monsake'i ingalinnyomo nokaiyong i ambai.”

Uee mapakat

²² Lapas aijo' i Musa nomboamo bansa Israel lengkat mae i Ambai Gelagah nambamo i padang bola Syur. Tolun sinaamo na kinopinnyo na aha notulu padang bola madi' hondo nohumpak uee.

²³ Lantas aha tinokamo i tampat anu osanggohi Mara, panyo uee ikiijo' mapakat hondo, sahingga madi' timbali o inum. Kalana aijo' tampat aijo' sinanggohanmo Mara, alati'nyo mapakat.

²⁴ Sahingga mian haha aijo' nososonmo hi Musa ka' nompokilawa, “Apaa na o inumto?”

²⁵ I Musa binala do'amo totu-totu'u hi Tumpu, lantas pinotiju'mo nu Tumpu sangkolong na kau' hi ia. Kau' aijo' i lumbu'akonmo i Musa nokiijo' i uee, lantas uee aijo' natawasmo, sahingga timbalimo o inum. I tampat aijo' Tumpu nombee'imo atulan-atulan hi aha ka' ikiijo'mo suele na Ia nonsobai aha.

²⁶ Tumpu nompoto'imo, “Tuluti na Aku totu-totu'u, ka' obau apaa na anu koong-Ku ma'ima', obau na aijo', tuluti iwi-iwi' na palentah-ngKu. De aijo' obau nu belemiu, belemiu madi' Ku hukum nu to panya-panyakit anu Ku pokona hi mian nu Mesir. Akumo na Tumpu anu nompo'alinmo belemiu.”

²⁷ Lapas aijo' aha tinokamo i tampat sanggonyo Elim. Ikiijo' daagi' ko mata nu uee sampulu' ka' ohua', ka' kau' korma pitumpulu' na pu'unnyo. Aha nombaumo kemah koko uee aijo'.