NOSABATMO 14 - KITAB NU TUMPU ALLA LELE MA'IMAI'

Notaapmo i Ambai Gelagah

¹ Lapas aijo' pinoto'imo nu Tumpu hi Musa,

² “Saimo na mian nu Israel da minsusule'mo ka' bakemahmo mompaha ahop kiijo' mae i kota Pi-Hahirot, olotnyo nu kota Migdol tiba Ambai Gelagah, koko kota Baal-Zefon.

³ Tomundo Mesir monsangka tantu koonyo aha mian Israel nololomo monsongkohi tano' aiya tinalasmo i padang bolaa.

⁴ Ku potimbalije na ia da panggaga sahingga ia mololoi'mo belemiu. Panyo Ku potoaje na kakuasa'an-Ku hi tomundo Mesir ka' hi suludadunyo, da nusumbu' nu aha taalu' Akumo na Tumpu.” Lantas binaumo nu aha mian Israel susumo anu pinalentahkonmo nu Tumpu hi aha.

⁵ Salatan i hongo nu tomundo Mesir taalu' bansa Israel nalaimo, ia ka' aha anu ko pangkatnyo nompele-pele'mo ka' notatae, “Apaamo na anu obaunto? Kadaka' pinojohoktomo na aha mian nu Israel aijo' namba sahingga kita madi'mo ko anu bau botuan?”

⁶ Lantas i tomundo nompotoukamo kaleta anu osake'i mahampate ka' to sulu-suludadunyo.

⁷ Ia nambamo tiba kaletanyo iwi-iwi', ka' mule' ano atu na kaleta anu otaha imani hondo, kinasake'an nu to kapa-kapala nu suludadunyo.

⁸ Memang Tumpu nompotimbalimo panggaga na i tomundo, sahingga i loloi'nyomo na aha mian nu Israel anu hau-haunyomo namba nompala'imo lipu' aijo', Tumpu na nonjagaimo aha.

⁹ Suludadu nu Mesir tiba ajahan iwi-iwi', kaleta tiba anu sinumake' nololoi'mo aha mian nu Israel, ka' nonsusuakon aha i pinombauan nu aha kemah i biwi nu ambai koko Pi-Hohirot.

¹⁰ Salatan mian nu Israel nontoamo i tomundo Mesir ka' to sulu-suludadunyo tinokamo mae, aha nabuhukmo hondo ka' noloboo'mo hi Tumpu nomoita tulung.

¹¹ Notataemo na aha hi Musa, “Pa' kiijo' mae i Mesir madi' ko polamunan sahingga beleyum nomboamo mae kami da mate i tampat aiya? Toa misa' mingahenmo ma'idek na palabuatan nu beleyum atina'!

¹² Uuka mae kiijo' i Mesir tinaloakonmo mami pinoto'i mami han anu sumo aiya tionyo jadi! Ginagakonmo mami da beleyum boli mompagala monsale'i kami, pakalaus bakasmo ahi' da kami saja'mo timbali botuan kiijo i Mesir. Sahanyo timbali botuan kiijo' mae ka' de mule' ola mate i padang bolaa aiya!”

¹³ Tinaaman i Musa, “Boli mabuhuk! Saba-sabanmo! Otoaje nu belemiu na kasalamatan anu nubee' nu Tumpu hi belemiu. Mian nu Mesir anu otoa nu belemiu uuka aiya, madi'mo daagi' otoa nu belemiu.

¹⁴ Tumpu na mahampate monjagai belemiu, ka' belemiu boli mombau apa-apaa.”

¹⁵ Tumpu notataemo hi Musa, “Kadaka' beleyum noloboo'mo mae nomoita tulung? Saimo na aha mian nu Israel da salaja-lajangnyo!

¹⁶ Hangkat na tokon nu beleyum ka' tangkakon mokiijo' i ambai. Da uee mobagimo ka' mian nu Israel timbalimo motulu i lananyo nu ambai anu noti-notiismo.

¹⁷ Mian nu Mesir Ku potimbalimo da panggaga sahingga aha salolo-loloi'nyomo mian nu Israel, sahingga Ku potoamo na kakuasa'an-Ku hi tomundo nu Mesir, suludadunyo, to kale-kaletanyo, tiba anu nonsake'i.

¹⁸ Sahingga nusumbu'je nu mian nu Mesir taalu' Aku, Tumpu.”

¹⁹ Lantas malaekat nu Tumpu Allah anu aita' momona i suludadu nu Israel, nolalinmo nokaiyong mae i mihi. Ka' nolalinmo suele na hohung nu kundom sahingga tinokamo

²⁰ i olot nu suludadu nu Mesir ka' suludadu nu Israel. Kundom aijo' pinikatmo, sahingga sinampahu ohu-ohua' na gombuan nu suludadu aijo' madi' noko ala nomapaha ohani.

²¹ Lantas tinangkakonmo i Musa na limanyo nokiijo' i ambai, sahingga Tumpu nompotimbalimo baleba' nu kabete'an anu makansang hondo so'mo nompuuhakon sahingga ambai nokekesmo. Sinampahu na pinuuhan nu baleba' aijo' sahingga ambai nongabali'mo, tinimbalimo katano'an.

²² Uee nobagimo ohua', ka' salatan mian nu Israel notulumo i ambai anu noti-notiismo, aha i lumajangmo i lananyo, ka' uee i sohipi' koanan ka' kowi sumomo mesen anu matangkas.

²³ Mian nu Mesir tiba ajahan iwi-iwi', kaleta ka' anu nonsake'i sabole-bolemo nontumput ka' nonsusuakon jalan nu mian Israel nokiijo' i totonga' nu ambai.

²⁴ Ohanimo maliana Tumpu nontoamo lengkat mae aita' i jingka nu apu ka' hohung nu kundom nokiijo' hi suludadu nu aha Mesir ka' nompokalangkabutmo.

²⁵ Pinotimbali-Nyomo na loda-loda nu kaleta nu aha na'idekmo sahingga aha madi'mo noko ala namba lau-laus. Mian nu Mesir notataemo, “Tumpu nahampatemo monjagai mian nu Israel mongewa kita. Imbo' pala'i na tampat aiya!”

²⁶ Tumpu notataemo hi Musa, “Tangkakon na lima nu beleyum mokiijo' i ambai da uee po'ule' minsusule', ka' molomosi mian nu Mesir, to kale-kaleta ka' anu monsake'i.”

²⁷ Lantas tinangkakonmo i Musa na limanyo nokiijo' i ambai ka' salatan nalianamo, uee nompo'ule'mo ninsusule' susumo anu uuka momona. Mian nu Mesir binala usahamo momposalamat butong nu aha, panyo Tumpu nolomosimo aha i uno nu ambai.

²⁸ Ambai tinolo ule'mo ka' nolomosimo to kale-kaleta, anu monsake'i ka' iwi-iwi' na suludadu nu Mesir anu nontu-nontumput mian nu Israel nokiijo' i totonga' nu ambai sahingga natemo iwi-iwi'.

²⁹ Panyo tempo'nyo aha mian nu Israel notulumo i lananyo nu ambai noti-notiismo, aha i lumajang uee sumomo mesen anu matangkas i kowi ka' koanan.

³⁰ Sinaa aijo' Tumpu nomposalamatmo bansa Israel tempo'nyo aha tinumbuhanmo nu aha mian Mesir, ka' aha nontoamo to bangke-bangke' nu aha mian Mesir singkapmo tinosasa i biwi nu bone'.

³¹ Salatan mian nu Israel nontoamo mosia na kodaka'nyo na kuasa nu Tumpu nohungku'imo mian nu Mesir, aha binangangmo hondo sahingga pinalesayamo hi Ia ka' hi Musa, posaihon-Nyo aijo'.