NOSABATMO 10 - KITAB NU TUMPU ALLA LELE MA'IMAI'

Balaa' kihi-kihi'

¹ Tumpu notatae hi Musa, “Lako' mamba mangadap hi tomundo. Aku nompotimbalimo ia ka' aha anu ko pangkatnyo pinanggagamo da Aku timbali mombau anu okabangangi aijo' hi aha,

² ka' da beleyum timbali monsisikakon hi lee' nu belemiu mosia na Aku nompahaikakonmo bansa Mesir nu anu okabangangi haha aijo'. Sahingga belemiu iwi-iwi' monsumbu'mo taalu' Akumo aiya na Tumpu.”

³ Lantas i Musa ka' i Harun nambamo nangadap hi tomundo ka' nompoto'i hi ia, “Tumpu, Tumpu Allah nu aha bansa Ibrani notataemo, 'Sampe toka hipian na kopinnyo na belento madi' mongka'oho' tulut hi beleng-Ku? Pobee'mo na mian anu pinalesayamo hi beleng-Ku mamba, da aha timbali monsombah Aku.

⁴ De belento sabole-bole madi' mompobee' saba' dodop Ku potokamo mae na kihi-kihi' i lipu' nu belemiu.

⁵ Kalana talalo manjoo' sahingga bawo nu tano' songko-songko saidi' mae me saja' kihi-kihi'. Iwi-iwi' na anu sinu'an, ka' to kau-kau' anu madi' ingidean nu ujan eis, nupaka ingkotije nu kihi-kihi' haha aijo'.

⁶ Laigan nu tomundo, to lai-laigan nu aha anu ko pangkatnyo ka' Laigan nu layat nupobuke'mo nu kihi-kihi'. Balaa' aiya lebe daka' molingkudui anu toho'mo ingoa'an nu mompolee' nu belemiu.' ” Lapas aijo' i Musa ninsusule'mo.

⁷ Singkapmo notatae na aha anu ko pangkatnyo hi tomundo, “Sampe toka hipian na kopinnyo na mian aijo' saja' mae momposusa' kita? Pobee'mo iwi-iwi' na mian nu Israel haha aijo' mamba monsombah Tumpu, Tumpu Allah nu aha. Toa lipu' to aiya na'idekmo!”

⁸ Sahingga i Musa ka' i Harun po'ule'mo i laga mangadap hi tomundo. Notataemo na i tomundo hi aha, “Belemiu timbalimo mamba da monsombah Tumpu Allah nu belemiu. Panyo ola ihe na anu itina' hi belemiu na mamba?”

⁹ Tinaaman i Musa, “Kami iwi-iwi' mau anu daagi' to oli-olitau mau anu motu'amo. Oboa mami iwi-iwi' na anak mami, iwi-iwi' na sapi', domba ka' mee' mami, kalana kami tionyo mombau sa'angu' na lamean daka' bau pompopodaka' Tumpu.”

¹⁰ Notataemo na i tomundo, “Madi' aku mompobee' belemiu momboa to bou-boune ka' to ana-anak nu belemiu! Anu opoita nu belemiu atina' pokakanamo belemiu monggagan da aku momoita hi Tumpu mombalakati belemiu. Sinumbu'kumo na belemiu taalu' ko tanga'an ma'idek.

¹¹ Madi'! Ola to momo'ane na timbali mamba monsombah Tumpu, de memang ola ahi' belemiu kahanda'mo mamba monsombah!” Tiba potatae aijo' i Musa ka' i Harun, salaku i laa'mo mompala'i laigan nu tomundo'.

¹² Lantas Tumpu notataemo hi Musa, “Tangkakon na lima nu beleyum mokiita' mompatui Mesir. Iwi-iwi' na kihi-kihi' tokaje mae mongkaan iwi-iwi' na anu sinu'an, anu daagi' tinontuha' noko lapas na ujan eis.”

¹³ I Musa nohangkatmo tokonnyo, ka' Tumpu nompotimbalimo mombun lengkat i kabete'an aijo'mo na nonsongkohi lipu' aijo' toka sansina-sinaa ka' sampahu-pahu. De subu-subumo mombun aijo' mompuhakonmo mae kihi-kihi' haha aijo'

¹⁴ anu talalomo hondo manjoo', sahingga me saja' kihi-kihi' i songko-songko na lipu'. Ma'isa toho' mian nontoa kihi-kihi' sumo aijo' na konjoo'nyo, ka' i lapas na aijo' madi'mo toho jinadi na anu sumo aijo'.

¹⁵ Songko-songko na tano' sinapnyomo nu kihi-kihi' me mo'i-mo'itom na otoa. Iwi-iwi' nukaan nu aha apaa na anu madi' pinoko idean nu ujan eis aijo', atina'mo bua' nu to kau-kau'. Songko-songko na tano' nu Mesir madi'mo ko anu molunou na tinontuha', na kau' iwi-iwi' kabai anu sinu'an.

¹⁶ I tomundo sampamo nolaga i Musa ka' i Harun lantas notataemo, “Aku binaladosa'mo hi Tumpu Allah nu belemiu ka' suele hi belemiu.

¹⁷ Ampuniakon mae na dosa'ku minsan uuka ka' do'akon mae hi Tumpu Allah nu belemiu, da po'ule' Nu ala na hukuman aiya hi belengku anu nonsilakaimo mae aiya.”

¹⁸ I Musa nompala'imo i tomundo ka' binalado'amo hi Tumpu.

¹⁹ Sahingga binali'anmo nu Tumpu na jalan nu mombun nu kinsoban anu makansang hondo. Kihi-kihi' haha aijo' pinuuhakonmo nu mombun ka' binoanyomo nokiijo' i Ambai Gelagah. Sa'angu' pe'e madi' ko anu tinontuha' i songko-songko na tano' nu Mesir.

²⁰ Panyo nompotimbalimo i tomundo pinanggaga, ka' ia madi'mo nompobee' mian nu Israel mamba.

Mesir tinuda'anmo nu balaa' pinikatmo

²¹ Tumpu notatae hi Musa, “Tangkakon na lima nu beleyum mokiita' da tano' nu Mesir nutuda'i mae nu balaa' pikat.”

²² I Musa nontangkakonmo limanyo nokiita', sahingga tinolun sinaa na tano' nu Mesir tinuda'anmo nu balaa' pikat.

²³ Mian nu Mesir madi'mo noko ala nontoa apa-apaa ka' tempo'nyo aitu madi'mo ko samian pe'e namba moyaya. Panyo i laigan nu aha mian Israel na tataap ahi' majingka.

²⁴ Lantas i tomundo nolagamo i Musa ka' notatae, “Belemiu timbalimo mamba monsombah Tumpu nu belemiu. To bou-boune ka' to ana-anak timbalimo mombatuki. Panyo sapi', domba ka' mee' nu belemiu madi' timbali oboa.”

²⁵ Tinaaman i Musa, “Desumo itina' belento Tuanku tionyo ahi' mombee'i mae kami potuu'on da osombahkon ka' koloban anu opotunu lantas osombahkonmo hi Tumpu, Tumpu Allah mami.

²⁶ Iwi-iwi' na potuu'on mami tionyo ahi' oboa mami; sa'angu' pe'e madi' opo una' mami. Potuu'on haha aijo' opile'i mami iya na anu osombahkon hi Tumpu Allah mami. Ikiijo'je mae ka' osumbu' potuu'on anu momosia na osombahkon mami.”

²⁷ Tumpu nompotimbali i tomundo pinangagamo sahingga ia madi'mo nongka'oho' bansa Israel mamba.

²⁸ Notatae na i tomundo hi Musa, “Lako'mo bolimo mae manintoa hi belengku! Aku madi'mo daagi' montoa beleyum! De daagi' ku toa na ohup nu beleyum, beleyum matemo!”

²⁹ “Susumo anu tinaloakonmo nu belento Tuanku,” notatae na i Musa, “Belento Tuanku memang madi'mo daagi' montoa aku.”