NOSABATMO 1 - KITAB NU TUMPU ALLA LELE MA'IMAI'

To mia-mian nu Israel pinosansalamo kiijo' mae i Mesir

¹ I Yakub suele anu sinanggohanmo i Israel, nambamo i Mesir tiba to ana-anaknyo ka' auwan nu aha toto samian. To ana-anaknyo i Yakub aijo'mo:

² I Ruben, i Simeon, i Lewi,

³ i Yehuda, i Isakhar, i Zebulon,

⁴ i Benyamin, i Dan, i Naftali, i Gad, i Asyer.

⁵ Lee' i Yakub aijo' iwi-iwi' konjoo'nyo aha pitumpulu' na mian. I Yusuf imoonamo kiijo' mae i Mesir.

⁶ Tino pia-pia mangamo ahi' na kinopinnyo mamanga ahi' i Yusuf ka' to Utu-utusnyo sinilakamo, sumo aitu mule' suele na to mia-mian sampo tutuu'nyo.

⁷ Panyo lee' nu aha, aijo'mo to mia-mian Israel, nomolee'mo manjoo' hondo, ka' konjoo'nyo nu aha nompaka pintuangmo manjoo' hondo, sahingga nanjoo'mo hondo na aha i lipu' nu Mesir.

⁸ Lapas aijo' samian na tomundo anu sala'je i hangkat madi' monsumbu' i Yusuf, nontampu'unimo nompalentah i Mesir.

⁹ Ia notatae hi layatnyo, “To mia-mian nu Israel haha aijo' mohungku'imo mae kita kalana talalo manjoo' ka' lebe mahoson molingkuduimo mae kita.

¹⁰ De bisuannyo jadi na pahampatean, tantu aha mosa'angu'mo tiba anu monsampobali' mae kita lantas mongewamo mae kita, lantas nupala'imo nu aha na lipu' aiya. Tionyo ahi' kita molio jalan da aha bolimo ko pintu-pintuangnyo”.

¹¹ Sahingga to mia-mian nu Mesir nohangkatmo anu mompalentah bansa Israel da molio jalan monsusa'i kantumuu'an nu aha, obee'i kalaja ka' opakisa mokalaja totu-totu'u. Aha pinakisamo nu tomundo Mesir da mombau to kota-kota Pitom ka' Raamses da bau puso nu ponguna'an balang.

¹² Panyo lebe osansala nu aha to mia-mian nu Mesir, lebe mompaka pintuang na mian nu Israel, ka' nosongkohimo na aha lipu' aijo', sahingga mian nu Mesir nabuhukmo hi aha.

¹³ Lantas lebemo pinosansala na mian nu Israel,

¹⁴ ka' kantumuu'an nu aha sinusa'mo hondo. Madi'mo ko kalibosan, na nompakisa aha mokalaja totu-totu'u mombau apa-apaa bangunan ka' iyaya mae na ale' nu aha Mesir.

¹⁵ Lapas aijo' i tomundo Mesir nombee'imo palentah hi Sifra ka' hi Pua, ua'aha na boune anu montulungi mompohampe anak hi to bou-boune nu Ibrani.

¹⁶ Pinoto'i tomundo Mesir, “De belemiu montulungimo boune nu Ibrani mohampeakonmo anak, o'inau' na uuka: De anak anu hampe mae aijo' mo'ane, patei na ia! De anak anu hampe mae aijo' boune yo bakas da ia tumuu'.”

¹⁷ Panyo ua-ua'aha na boune aijo' anu montulungi mompohampe, mabuhuk hi Tumpu Allah. Aha madi' montuluti palentah nu Tomundo ka' pinobakasmo nu aha na bungamea' mo'ane da tumuu'.

¹⁸ Sahingga i lagamo nu tomundo ua-ua'aha na boune haha aijo' anu montulungi mompohampe anak ka' pinokilawanyo, “Kadaka' pinobakasmo miu na to ana-anak mo'ane haha aijo' tinumuu'?”

¹⁹ Tinaaman nu aha, “To bou-boune nu Ibrani madi' sumo to bou-boune nu Mesir. Aha dengke hondo na mohampeakon. Mau ma'isa pe'e toka na anu montulungi mompohampe anak, anaknyo hampemo”.

^20-21 Sahingga Tumpu Allah nombalakatimo to bou-boune anu montulungi mompohampe anak, ka' nombee'imo lee' hi aha, kalana aha mongadati Tumpu Allah. Ka' mian nu Israel mule' nompaka panjoo'mo ka' to hoso-hoson.

²² Lantas i tomundo nombee'imo palentah sumo uuka hi iwii-iwi' na layatnyo; “Batu-batu anak mo'ane nu mian Ibrani anu sala'je hampe tionyo o alin i Kaunyo Nil, panyo iwi-iwi' na anak boune timbali opotumuu'.”