NOMBILANGMO 8 - KITAB NU TUMPU ALLA LELE MA'IMAI'

Mosia na mompokoko sulu'

¹ Tumpu notataemo hi Musa,

² “Poto'i hi Harun de ia montutungimo popitu' na sulu' i tengkenyo nu sulu' aijo', ia tionyo ahi' montutungi ma'i-ma'ima' sahingga timbali monjingkai sasu ahop nu tengkenyo aijo'.”

³ I Harun nombaumo apaa na anu pinalentahkonmo nu Tumpu. Ia montutungi sulu' haha aijo' mo'ahop i sasu ahop nu tengkenyo nu sulu'.

⁴ Tampat nu sulu' haha aijo' toka-toka mokiita', ka' pinombunga-bungainyo mosoni' na tinutuk susumo sonto' anu pinalentahkonmo nu Tumpu hi Musa.

Aha mian nu Lewi i hangkatmo

^5-6 Tumpu notataemo hi Musa, “Posi po'iwi' na aha mian nu Lewi boli opogalum tiba aha mian nu Israel sangga'at ka' bau na atulannyo momposusi' aha,

⁷ sumo uuka na mombau: Paha pipi' na aha nu uee anu bau pomposusi' ka' pokau na aha mongkis songko-songko na butong ka' mombaso'i butong nu aha. Tiba jalan sumo aijo' aha belesi'mo.

⁸ Lantas pokau na aha mongala sa'angu' na sapi' lakinyo anu daagi' bata'nyo tiba koloban kaanon labu ginalo'an lanya' na obau. Lantas beleyum tionyo ahi' mongala sa'angu na sapi' lakinyo sangga'at bau koloban pongampuni dosa'.

⁹ Lapas aijo' posihukmo iwi-iwi' na aha mian nu Israel ka' pokau na aha mian nu Lewi tuminjo i ahop nu Kemah-Ku.

¹⁰ Mian tionyo ahi' mompotiik lima nu aha i ubak nu aha mian nu Lewi haha aijo'.

¹¹ Lantas i Harun tionyo ahi' monsombahkonmo aha mian nu Lewi haha aijo' salaku palasombahan nu aha mian Israel hi beleng-Ku, da aha timbali mombau mosia na monsombah Aku.

¹² Lantas aha mian nu Lewi tionyo ahi' mompotiik lima nu aha i ubak nu sapi' lakinyo ohua-ohua' aijo'; sa'angu' tionyo ahi' osombahkon bau koloban pongampuni dosa', ka' sa'angu' mule' bau koloban anu opotunu. Tiba atulannyo anu sumo aijo' aha mian nu Lewi pinosusi'mo.

¹³ Posi po'iwi'mo na aha mian nu Lewi bau samata-mata kapalaluan-Ku ka' pokaumo na aha mombau apaa na nupalentahkon i Harun tiba to ana-anaknyo.

¹⁴ Tiba atulannyo anu sumo aijo' belemiu mongga'atakonmo mian nu Lewi haha aijo' tiba aha mian nu Israel sangga'at da Akumo na tumpunyo.

¹⁵ De beleyum moko baumo atulannyo mombee' mae aha mian nu Lewi haha aijo', aha ko hakmo mokalaja i Kemah-Ku.

¹⁶ Aku mompotimbalimo aha bau pombolosi iwi-iwi' na anak mo'ane tumpe hi aha Israel; jadi aha samata-mata anung-Ku'mo.

¹⁷ Tempo'nyo Aku nompateimo iwi-iwi' na anak anu tumpenyo kiijo' mae i Mesir, anak tumpe mo'ane toto sangauwan hi aha Israel ka' batu-batu binatang anu pino anak momona pinotimbaling-Kumo samata-mata Akumo na tumpunyo.

¹⁸ Uuka aiya salaku pombolosi iwi-iwi' na anak tumpe hi aha Israel, Ku alamo na aha mian nu Lewi,

¹⁹ ka' mian nu Lewi haha aijo' Ku bee'mo hi Harun ka' hi to ana-anaknyo da timbali mokalaja hi aha mian nu Israel i Kemah-Ku. Ka' suele da aha momoita da Ku ampuni na bansa Israel da bansa aijo' madi' nukona nu balaa' de aha toka mae talalo ohani i tampat anu susi' aijo'.”

²⁰ Kalana aijo' i Musa, i Harun ka' iwi-iwi' na aha mian nu Israel nonsombahkonmo mian nu Lewi hi Tumpu, susumo anu pinalentahkonmo nu Tumpu hi Musa.

²¹ Mian nu Lewi haha aijo' nombaumo atulannyo momposusi' butong ka' nombaso'imo baju' nu aha, lantas i Harun nonsombahkonmo aha salaku anu obee'mo samata-mata hi Tumpu. Ia nombaumo suele atulannyo momposusi' kona hi aha.

²² Aha mian nu Israel nombaumo iwi-iwi' apaa na anu pinalentahkonmo nu Tumpu hi Musa kona hi aha mian nu Lewi. Sahingga aha mian nu Lewi nohumpakmo hak da mokalaja i Kemah nu Tumpu, ka' polaya' nu aha i Harun tiba to ana-anaknyo.

²³ Tumpu notataemo hi Musa,

²⁴ “Batu-batu mian nu aha Lewi anu ko umunmo molabimo uampulu' ka' olima' na taun mokiita' tionyo ahi' mokalaja i Kemah-Ku.

²⁵ Ka' de umun nu aha limampulu'mo na taun, ia opobebasmo madi'mo opokalaja.

²⁶ Lapas aijo' ia daagi' timbali montulungi aha mian nu Lewi sangga'at anu daagi' ko pakalaja'an i Kemah-Ku, panyo ia madi'mo daagi' obee'i pakalaja'an anu tataap. Sumo aijo' na jalannyo mongatun pakalaja'an hi aha mian nu Lewi.”