NOMBILANGMO 36 - KITAB NU TUMPU ALLA LELE MA'IMAI'

Pembahagian halata' nu to bou-boune de mo'osoamo

¹ To tutuuma i sa'angu' na auan nu aha hi aha sa'anakan mae i Gilead anak i Makhir, aijo'mo makumpu i Manasye, anak i Yusuf nambamo nangadap hi Musa ka' hi to pola-polaya' sangga'at.

² Aha notatae, “Tumpu nompokaumo mombagiakon tano' aijo' hi aha mian Israel o buangakon onde. Ia mule' nompokaumo belemiu mombee' mae tano' pusaka' nu utus mami i Zelafehad hi to ana-anaknyo anu toto bou-boune.

³ Panyo palalu ahi' o inau' saba' de aha aijo' mo'osoamo tiba to momo'ane tulunan nu bansa sangga'at tano' nu aha aijo' nu alamo nu tulunan nu bansa aijo'. Tiba jalan anu sumo aijo' tantu tano' anu tinantukanmo salaku da'erah mami maga'amo.

⁴ Toka i Taun ponsule'akonanmo, salatan tokamo na tempo'nyo iwi-iwi' na halata' anu pinobalukmo, osule'akonmo hi tumpunyo anu momona, tano' nu anak i Zelafehad anu toto bou-boune aijo', timbalimo ahi' anu nu to langka-langkai' nu aha sahingga tulunan nu bansa mami madi'mo ko tano' aijo'.”

⁵ Lantas pinotokamo i Musa hi bansa Israel na palentah aiya anu lengkat mae hi Tumpu, “Apaa na anu tinaloakonmo nu to mia-mian lee' mae i Yusuf aijo' memang totu'u,

⁶ kalana aijo' Tumpu notataemo tukoo-Nyo to ana-anak i Zelafehad anu toto bou-boune timbalimo mo'osoa mau mule' pa' ihe anu nuka'ima'i nu aha, asan bubuu' mae tulunan nu bansa nu aha.

⁷ Tano' pusaka' nu aha mian Israel toto samian tionyo ahi' saja' otatusakon hi tulunan nu bansanyo.

⁸ Toto samian na boune anu minsoop tulunan nu bansa Israel anu ko tano' pusaka'nyo, tionyo ahi' mo'osoa tiba aha bubuu' mae tulunan nu bansa aijo' suele. Tiba jalan anu sumo aijo' toto samian na aha mian Israel saja' ahi' montoongi tano' pusaka' nu mompolee' nu aha,

⁹ sahingga tano' pusaka' aijo' madi' molali-lalin lengkat hi sa'angu' na tulunan nu bansa mamba hi sa'angu' mule' na tulunan nu bansa sangga'at. Batu-batu tulunan nu bansa Israel sabole-bole ahi' montoongi posi tano pusaka'nyo.”

^10-11 Jadi susumo koo-Nyo nu palentah nu Tumpu hi Musa, aha olima' na anak i Zelafehad anu toto bou-boune aijo', aijo'mo i Mahla, i Tirza, i Hogla, i Milka, ka' i Noa no'osoamo tiba to mia-mian anu daagi' mae poto'utusan nu tuumanyo.

¹² Aha no'osoamo tiba to mia-mian aha mae sa'anakan tulunan nu bansa Manasye, anak i Yusuf, Tiba jalan anu sumo aijo' tano' pusaka' nu aha tataap ahi' anu nu tulunan nu bansa mae nu tuuma nu aha.

¹³ Aijo'mo na to atu-atulan anu pinotataapmo ka' binee'mo nu Tumpu hi bansa Israel anu pinoto'imo i Musa, tempo'nyo bansa Israel kiijo' i hatanyo nu Moab i sohipi' nu Kaunyo Yordan, koko kota Yerikho.