NOMBILANGMO 35 - KITAB NU TUMPU ALLA LELE MA'IMAI'

Kota-kota anu obee' hi aha mian nu Lewi

¹ I hatanyo nu Moab, i sohipi'nyo nu Kaunyo Yordan, koko kota Yerikho, Tumpu notataemo hi Musa,

² “Potokakon hi bansa Israel tukoong-Ku tano' pusaka' anu nuhumpakje nu aha aijo', to pia-piangkuka na kota'nyo ka' anu ko hemputnyo ewa, tionyo ahi' nubee' nu aha hi mian nu Lewi da aha timbali jojoong ikiijo'.

³ Kota haha aijo' ahamo mian nu Lewi na tumpunyo da baumo tampat kajojoongan nu aha. Hemput anu ewa aijo' baumo polaya'an potuu'on ka' iwi-iwi' na binatang nu aha.

⁴ Hemput anu ewa aijo' ko ewanyo 450 na meten, aijo' toka-toka iyaya mae na tampat, binobotan lengkat pe'e mae i pagan mesen titikub kota.

⁵ Jadi, da'erah nu aha mian Lewi ko ewanyo sulapa' opat, ukulannyo 900 na meten sansulapa', ka' kota'nyo kiijo' i totonga'nyo.

⁶ Hi aha mian nu Lewi tionyo ahi' obee' nu belemiu anom na kota bau palaian nu to mia-mian anu madi' nontotonggolakon nompateimo mian sangga'at. Ka' sangga'at mule' hi aha mian nu Lewi aijo' tionyo ahi' obee'i suele patompulu' ka' ohua' na kota sangga'at,

⁷ tiba hemputnyo anu ewa. Jadi iwi-iwi'mo patompulu' ka' ualu' na kota anu bau bagi nu aha mian nu Lewi.

⁸ Konjoo'nyo nu kota-kota nu aha Lewi anu hi posi-posi da'erah nu aha tulunan Israel tionyo ahi' otantukan iyamo na konjoo'nyo nu kota ka' ko daka'nyo nu da'erah aijo'.”

Kota-kota bau palaian

⁹ Tumpu notaapmo i Musa

¹⁰ da mompotoka hi bansa Israel potatae aiya, “De belemiu moko motaapmo i Kaunyo nu Yordan ka' minsoopmo i lipu' nu Kana'an,

¹¹ belemiu tionyo ahi' montantukanmo kota-kota bau palaian da to mia-mian anu madi' nontotonggolakon nompateimo mian sangga'at, timbali mopalai mokiijo'.

¹² I kota haha aijo' madi'mo opoposia nu to utu-utusnyo nu mian anu pinateannyomo anu mongka'oho' mombalosakon ideknyo. Kalana mian anu otuuk nompateimo mian sangga'at madi'mo timbali opatei de palakalanyo ma'isa o ulus hi mian kopian nu mian da'isan.

¹³ Otantukan anom na kota bau palaian,

¹⁴ totolu' i sasu kabete'an Kaunyo nu Yordan ka' totolu' mule' i tano' nu Kana'an.

¹⁵ Ano-anom na kota aijo' bau palaian nu belemiu mian nu Israel ka' mian anu lengkat mae i salipu'an anu jojoong madi' pin kabai anu jojoong sampe toka sidu-sidutu' atina' hi belemiu. Maumo pa' ihe na nompateimo mian sangga'at madi' tinotonggolakon timbali mompalaihakon butongnyo i sala'sa'angu' na kota aijo'.

^16-18 Panyo de ihe na mian ko toongonnyo besak kabai batu kabai kau' na pinompateinyo mian sangga'at, mian aijo' nyata' memang topo patei; ia mohumpakmo kasala'an ka' tionyo ahi' hukumannyo opatei.

¹⁹ To utu-utusnyo anu ohani mae hi anu pinateanmo aijo' timbali suele mompokona hukuman mate aijo'. De ia na mongkabot anu nompatei aijo', ia timbali mompatei.

²⁰ De ihe na mian mongka'ideki mian sangga'at, lantas pinobahangkangnyomo ka' pinateannyo na ia kabai binunu'nyo nu apa-apaa,

²¹ kabai jinagunnyo, mian aijo' nyata' memang topo patei; ia mohumpakmo kasala'an ka' tionyo ahi' hukumannyo opatei. To utu-utusnyo anu ohani mae hi anu pinateanmo aijo' timbali mompokona hukuman mate aijo'. De ia mongkabot anu nompatei aijo', ia timbali mompatei.

²² Panyo ihe na monsumbu' daagi' ko mian, madi' nontotonggolakon nonsala' pateimo mian sangga'at anu madi' nuka'ideki, pa' nompobahangkang mian aijo' kabai nombunu' nu pa' apaa.

²³ Kabai ihe na monsumbu' daagi' ko mian madi' nontoa nolumbu'akonmo sa'angu' na batu sahingga mian sangga'at anu kinonanyo sinilakamo padahan misa' anu mompaha idek tiba ia, ka' ia mule' madi' ko kahanda' mompatei mian aijo.

²⁴ To pala-palakala anu susumo aijo', mian na tionyo ahi' bagombu momputusi mian anu nompateimo aijo', ka' mian anu kahanda' mombalosakon tomate anu pinateanmo aijo'.

^25-28 Kaputusan nu mian anu binagombumo aijo' na mompobebas mian anu nompateimo madi' tinotonggolakon aijo', da utus nu mian anu pinateanmo aijo' bolimo do kahanda' mombalosakon. Mian aijo' tionyo ahi' po'ule' osule'akon mamba i kota tampat nompalaihakon butongnyo. Ia tionyo ahi' jojoongmo ikiijo' sangkutnyo mian anu tempo'nyo aitu tinimbali Imam Daka' silakamo; lapasje aijo' ia timbalije minsusule i kampung kajojoongannyo. Panyo de ia mompala'imo kota pinompalaihakonannyo butongnyo lantas nu kabotmo ka' nu pateimo nu to utu-utus nu mian anu pinateannyomo, saba' aha nombalosakon aijo' madi' o lekeng nompateimo.

²⁹ Atulan haha aijo' opojalan kona hi belemiu ka' hi to le-lee' nu belemiu maumo pa' iyaya mae na kajojoongan nu belemiu.

³⁰ Palakala mompatei, mian anu osangka nompateimo timbali otantukan sinala'mo ka' hukumannyo opatei de palabuatan aijo' timbali opototu'u na ua'aha na mian sakisi kabai molabi. Samian na sakisi ma'isa sukup na mompototu'u pa' anu sinangkanyo aijo' totu'umo.

³¹ Samian na topo patei hukumannyo tionyo ahi' opatei. Ia madi' timbali montobus hukuman aijo' nu doi.

³² De ihe na mian mopalai i sala' sa'angu' na kota palaian, boli mompobee' ia mombayan nu doi da opobee'mo minsusule' i laigannyo de ma'isa pe'e Imam Daka' silaka.

³³ De belemiu mombau sumo aijo' belemiu mohumimi'imo tano' kajojoongan nu belemi. Han mompatei aijo' mohumimi'imo lipu'. Jadi madi' ko jalan sangga'at na mompobelesi lipu' aijo' de misa' jalan mombubut nyawa nu anu nompateimo.

³⁴ Boli mohumimi'i tano' anu ojojoongi nu belemiu, kalana Akumo na Tumpu, ka' Aku jojoongmo atina' hi belemiu bansa Israel.”