NOMBILANGMO 31 - KITAB NU TUMPU ALLA LELE MA'IMAI'

Mahampate mombalosakonmo mian nu Midian

¹ Tumpu notataemo hi Musa,

² “Balosakonmo na mian nu Midian kalana aha nombaumo apa-apaa hi bansa Israel. Lapas aijo' beleyum silakamo.”

³ Jadi i Musa notataemo hi bansa Israel, “Potoukamo kalana mahampatemo; belemiu tionyo ahi' montumbuhimo aha mian nu Midian kalana Tumpu mohukumo aha.

⁴ Batu-batu aha tulunan mae nu bansa Israel tionyo ahi' opotouka nu belemiu samadala na suludadu anu mamba mahampate.”

⁵ Sahingga pinile'anmo samadala na mian anu ingala hi aha batu-batu tulunan nu aha bansa Israel, iwi-iwi' konjoo'nyo sampulu' ka' ohua' na madala na mian anu mamba mahampate.

⁶ I Musa nompalentahmo aha mamba mahampate hingga-hinggat tiba i Pinehas anak i Imam Eleazar. I Pinehas nomboa to bala-balang anu susi' ka' tolompet bau pohongoan tanda.

⁷ Susumo anu pinalentahkonmo nu Tumpu hi Musa, aha mian nu Israel nontumbuhimo aha mian nu Midian ka' nompateimo iwi-iwi' na to momo'ane,

⁸ tibamo tomundo nu aha Midian aha olima', aijo'mo i Ewi, i Rekem, i Zur, i Hur ka' i Reba. I Bileam, anak i Beor, suele pinateanmo.

⁹ Aha mian nu Israel nohakopmo ka' nomboamo to bou-boune ka' to ana-anak nu Midian, ka' nompahuhuakonmo iwi-iwi' na binatang ka' potuu'on, ka' kakaya'an nu aha iwi-iwi'.

¹⁰ To kota-kota ka' to kemah-kemah nu aha suele pinapuanmo.

¹¹ Lapas aijo' aha mian nu Israel nongalamo iwi-iwi' apaa na anu pinahuhuakonmo tiba anu i hakop ka' binatang,

¹² lantas binoamo hi Musa ka' hi Imam Eleazar ka' hi iwi-iwi' mian nu Israel. Tempo'nyo aitu aha hau-haunyo binakemahmo i hatanyo nu Moab, i sohipi' nu kaunyo nu Yordan koko kota Yerikho.

Suludadu nu Israel ninsusule'mo

¹³ Sahingga i Musa, i Imam Eleazar ka' iwi-iwi' to pola-polaya' sangga'at nu aha mian Israel nosabatmo mae i kemah ka' nolabotmo suludadu nu aha Israel.

¹⁴ I Musa nontambuha'imo to sulu-suludadu anu matangkas na pangkatnyo ka' to kapa-kapala nu gombuan nu Suludadu ka' Suludadu anu sala'je mae ninsusule' namba nahampate.

¹⁵ Ia notatae hi aha, “Kadaka' belemiu daagi' nompotumuu' boune haha aijo' iwi-iwi'?

¹⁶ Te misa' bounemo haha aijo' na nontulutimo pokinde' i Bileam, sahingga nonsale'imo aha mian nu Israel kiijo' i Peor da boli mohongo-hongo Tumpu? Ka' aijo'mo na nonsaduakon sahingga aha mian anu pinalesayamo hi Tumpu tinuda'anmo nu balaa'!

¹⁷ Jadi uuka aiya pateimo toto samian na anak mo'ane ka' toto samian na boune anu toho'mo noduhus tiba mo'ane.

¹⁸ Panyo to bou-boune iwi-iwi' anu ma'isa toho' noduhus tiba mo'ane timbali o'osoai nu belemiu.

¹⁹ Ka' belemiu iwi-iwi' anu nompateimo mian kabai nongkanyangmo anu sinilakamo tionyo ahi' jojoongmo i sambiha' nu kemah pitun sinaa na kopinnyo. I sinaa ko itolunnyo ka' ko ipitunnyo belemiu ka' iwi-iwi' na to bou-boune anu i hakopmo ka' binoamo mae nu belemiu aijo' tionyo ahi' mombau atulannyo pomposusi' butong.

²⁰ Toto sa'angu' na hude ka' kilit maumo pa' binaumo apaa, bulu nu mee' kabai kau', tionyo ahi' suele oposusi'.”

²¹ Lapas aijo' i Imam Eleazar notataemo hi to mia-mian anu sala'je mae ninsusule' namba nahampate aijo', “Aiya na to pale-palentah anu binee'mo nu Tumpu hi Musa.

^22-23 Iwi-iwi' apaa anu madi' nukaan nu apu, sumo mosoni', salaka, tambaga, besak, timah mopute' ka' timah mo'itom, tionyo ahi' oposusi' aijo'mo opapui nu apu. Lapas mule' balang haha aijo' tionyo ahi' oposusi' suele nu uee anu opake mombau atulannyo momposusi' da madi'mo mahumimi'. Iwi-iwi' na balang sangga'at anu madi' nukaan nu apu tionyo ahi' oposusi' nu uee anu opake mombau atulannyo momposusi'.

²⁴ I sinaa ko ipitunnyo belemiu tionyo ahi' mombaso'imo baju' nu belemiu atina'je ka' belemiu madi'mo mahumimi' ka' timbalimo minsoop i kemah.”

Nombagimo balang anu pinahuhuakon mae

²⁵ Tumpu notataemo hi Musa,

²⁶ “Beleyum ka' i Imam Eleazar hingga-hinggat tiba to pola-polaya' sangga'at nu aha mian Israel tionyo ahi' mombilangmo iwi-iwi' na anu pinahuhuakon mae, tibamo mian anu i hakop ka' binoamo mae ka' binatang.

²⁷ Anu pinahuhuakon mae aijo' tionyo ahi' obagi nu belemiu ohua' bubu' pokakana na konjoo'nyo; sambagian bau bagi nu to Sulu-suludadu anu nambamo nahampate ka' sambagian mule' labinyo baumo bagi nu mian sangga'at.

²⁸ Anu obee' samata-mata hi beleng-Ku, Tumpu, aijo' hi aha to sulu-suludadu na tionyo ahi' pongalapan, de lima atu sambagian na o ala – maumo to mia-mian anu i hakop ka' binoamo mae, mau mule' sapi', keledai, domba ka' mee'.

²⁹ Bee'mo na aijo' hi Imam Eleazar salaku anu osombahkon samata-mata hi beleng-Ku, Tumpu.

³⁰ Aijo' bagian anu binee'mo hi aha mian Israel, tionyo ahi' nu ala de limampulu' sambagian na o ala, maumo to mia-mian anu i hakop ka' binoamo mae, mau mule' sapi', keledai, domba ka' mee'. Bee'mo na aijo' iwi-iwi' hi aha mian nu Lewi anu mongkalesang Kemah-Ku.”

³¹ I Musa ka' i Imam Eleazar nombaumo susumo anu pinalentahkonmo nu Tumpu.

^32-35 Madi'mo o bilang na anu ingalamo nu aha to sulu-suludadu salaku baumo bagi nu aha, anu pinahuhuakon mae aijo' konjoo'nyo; 675.000 na domba ka' mee', 72.000 na sapi', 61.000 na keledai ka' 32.000 na to lalangkoyang anu ma'isa toho' noduhus tiba mo'ane.

^36-40 Anu konjoo'nyo sumo aijo' binee'mo hi to sulu-suludadu mintonga' na bagian, ka' nombagi sumo uuka: 337.500 na domba ka' mee', ka' anu konjoo'nyo 675 aijo' na obee' samata-mata bau bagi nu Tumpu; 36.000 na sapi', 72 anu samata-mata obee' hi Tumpu; 30.500 na keledai, 61 anu obee' samata-mata bau bagi nu Tumpu; 16.000 na to lalangkoyang anu ma'isa toho' noduhus ka' mo'ane, 32 na mian anu obee' samata-mata bau bagi nu Tumpu.

⁴¹ Lantas i Musa nompotalimamo hi Imam Eleazar anu samata-mata obee hi Tumpu aijo', salaku anu osombahkon hi Tumpu susumo anu pinalentahkonmo nu Tumpu.

^42-46 Bagi anu obee' hi mian da'isan pokakana na konjoo'nyo tiba bagi nu to sulu-suludadu: 337.500 na keledai, ka' 36.000 na langkoyang anu ma'isa toho' noduhus ka' mo'ane.

⁴⁷ Susumo anu pinalentahkonmo nu Tumpu, i Musa nongalamo sa'angu' de limampulu' na mian i hakop mae ka' binatang, lantas binee'nyomo hi aha mian nu Lewi anu mokalaja i Kemah nu Tumpu.

⁴⁸ Lapas aijo' to sulu-suludadu anu matangkas na pangkatnyo anu nomboamo suludadu nu aha Israel namba nahampate, nangadapmo hi Musa,

⁴⁹ ka' nompoto'imo, “Tuan, kami nombilangmo to Sulu-suludadu anu opalentah mami. Konjoo'nyo madi' naga'a, madi' ko samian pe'e na anu silaka.

⁵⁰ Kalana aijo' kami nomboamo mae to mai-mainan mosoni', galang nu lima, paladung, sinsing, anting-anting ka' olo' anu ingalamo mae nu aha toto samian. Iwi-iwi' aijo' obee'mo mami hi Tumpu salaku anu osombahkonmo mami, da Ia saja' monjagai mae kami.”

⁵¹ Lantas i Musa ka' i Imam Eleazar nongalamo mosoni' aijo', iwi-iwi' aijo' mainan.

⁵² Anu sinombahkonmo nu to sulu-suludadu haha aijo' koboatnyo mongohanimo ua'atu na kilogram.

⁵³ Panyo to sulu-suludadu haha aijo' toto samian nosi alamo anu pinahuhuakon mae nu aha aijo'.

⁵⁴ Sahingga i Musa ka' i Imam Eleazar nomboamo mosoni haha aijo' i Kemah nu Tumpu da Tumpu manjagai mae bansa Israel.