NOMBILANGMO 29 - KITAB NU TUMPU ALLA LELE MA'IMAI'

Anu osombahkon i Lamean Taun Bu'ou

¹ Itanggan sa'angu' bitu'on kopopitu'nyo belemiu tionyo ahi' sihukmo da monsombahmo Aku, ka' madi'mo timbali mokalaja anu maboat. Isinaa aijo' tionyo ahi' tolompet iwi-iwi' opo'onyi'mo.

² Sombahkonmo hi Tumpu koloban anu opotunu aijo'mo sa'angu' na sapi lakinyo anu daagi bata'nyo, sa'angu' na domba lakinyo, ka' popitu na anak nu domba lakinyo anu umunnyo sataunmo, bubuu' anu madi' ko panyakitnyo. Hongohisnyo nu koloban aijo' momposanangmo kinyonyoa nu Tumpu.

³ Sombahkon suele na koloban kaanon anu tionyo ahi' obau aijo'mo labu ogalo'i nu lanya' zaitun: totolu' na kilogram anu opogampa de sa'angu' na sapi lakinyo, ohua' na kilogram anu opogampa de sa'angu na domba lakinyo,

⁴ ka' sa'angu' na kilogram anu opogampa de sa'angu' na anak nu domba.

⁵ Sombahkonmo suele sa'angu' na mee' lakinyo bau koloban pengampuni dosa'. Tiba jalan anu sumo aijo' belemiu mombaumo atulannyo pongampuni dosa' nu mian.

⁶ Koloban haha aijo' salaku bau pontuangi koloban anu opotunu anu osombahkon hingga-hinggat tiba koloban kaanon i tanggan sa'angu', sambitu'on toka sambitu'on, ka' mule' salaku bau pontuangi koloban anu opotunu sansina-sinaa anu osombahkon hingga-hinggat tiba koloban kaanon ka' koloban anggur. Hongohisnyo nu koloban anu opotunu aijo' momposanangmo kinyonyoa nu Tumpu.

Anu osombahkon i Sinaa Pongampunianmo Dosa'

⁷ Itanggan sampulu' bitu'on kopopitu'nyo belemiu tionyo ahi' sihukmo da monsombahmo Aku. Isinaa aijo' belemiu tionyo ahi' bapuasa'mo ka' madi'mo timbali mokalaja.

⁸ Sombahkonmo hi Tumpu koloban anu opotunu aijo'mo sa'angu' na sapi lakinyo anu daagi bata'nyo, sa'angu' na domba lakinyo, ka' popitu' na anak nu domba lakinyo bubuu' anu madi' ko panyakitnyo. Hongohisnyo nu koloban aijo' momposanangmo kinyonyoa nu Tumpu.

⁹ Sombahkonmo na koloban kaanon anu tionyo ahi' obau aijo'mo labu ogalo'i lanya' nu zaitun: totolu' na kilogram anu opogampa de sa'angu' na sapi lakinyo, ohua' na kilogram anu opogampa de sa'angu' na domba lakinyo,

¹⁰ ka' sa'angu' na kilogram anu opogampa de sa'angu' na anak nu domba.

¹¹ Sombahkonmo suele sa'angu' na mee' lakinyo da bau pongampuni dosa' nu mian, jadi misa ola koloban pongampuni dosa' ka' koloban anu opotunu sansina-sinaa tiba koloban kaanon ka' koloban anggur na anu osombahkon i sinaa aijo'.

Anu osombahkon i Lamean mombau Tahop anu o atopi nu Hon nu kau'

¹² I tanggan sampulu' ka' olima' bitu'on kopopitu'nyo belemiu tionyo ahi' sihukmo da monsombahmo Aku, ka' madi'mo timbali mokalaja maboat. Pitunsinaa na kopinnyo belemiu tionyo ahi' mombau lamean bau pongadati Tumpu.

¹³ I sinaa anu momonanyo sombahkonmo hi Tumpu koloban anu opotunu aijo'mo sampulu' ka' totolu'na sapi' lakinyo anu daagi bata'nyo, ohua' na domba lakinyo anu daagi bata'nyo, ka' sampulu' ka' opat na anak nu domba lakinyo anu umunnyo sataunmo, bubuu' anu madi' kopanyakitnyo. Hongohisnyo nu koloban aijo' momposanangmo kinyonyoa nu Tumpu.

¹⁴ Sombahkon suele na koloban kaanon anu tionyo ahi' obau aijo'mo labu anu ogalo'i nu lanya' zaitun: totolu' na kilogram anu opogampa de sa'angu' na sapi' lakinyo, ohua' na kilogram anu opogampa de sa'angu' na domba lakinyo,

¹⁵ ka' sa'angu' na kilogram anu opogampa de sa'angu' na anak nu domba. Hingga-hinggat tiba koloban kaanon aijo' tionyo ahi osombahkon suele na koloban anggur pa'sangkuka na opalalui.

¹⁶ Ka' sangga'at mule'na anu osombahkon suele, sa'angu' na mee' lakinyo bau koloban pongampuni dosa'. Koloban aijo' salaku bau pontuangi koloban anu opotunu sansina-sinaa tiba koloban kaanon ka' koloban anggur.

¹⁷ I sinaa ko ohua'nyomo sombahkonmo sampulu' ka' ohua' na sapi' lakinyo anu daagi bata'nyo, ohua' na domba lakinyo, ka' sampulu' ka' opat na anak nu domba lakinyo anu umunnyo sataunmo, bubuu' anu madi' kopanyakitnyo.

^18-19 Sombahkon hingga-hinggat tiba aijo' iwi-iwi' na koloban sangga'at susumo anu pinalaluanmo isinaa momonanyo.

²⁰ I sinaa ko itolunnyomo sombahkonmo sampulu' ka' sa'angu' na sapi' lakinyo anu daagi bata'nyo, ohua' na domba lakinyo ka' sampulu' ka' opat na anak nu domba lakinyo anu umunnyo sataunmo, bubuu' anu madi' kopanyakitnyo.

^21-22 Sombahkonmo hingga-hinggat tiba aijo' iwi-iwi' na koloban sangga'at susumo anu pinalaluanmo i sinaa momonanyo.

²³ I sinaa ko ipatonnyo osombahkonmo sampulu' na sapi lakinyo anu daagi bata'nyo, ohua' na domba lakinyo ka' sampulu' ka' opat na anak nu domba lakinyo anu umunnyo sataunmo, bubuu' anu madi' kopanyakitnyo.

^24-25 Hingga-hinggat tiba aijo' sombahkonmo suele iwi-iwi' na koloban sangga'at susumo anu pinalaluanmo i sinaa momonanyo.

²⁶ I sinaa ko ilimannyo sombahkonmo osio' na sapi' lakinyo anu daagi bata'nyo, ohua' na domba lakinyo, ka' sampulu' ka' opat na anak nu domba lakinyo anu umunnyo sataunmo, bubuu' anu madi' kopanyakitnyo.

^27-28 Hingga-hinggat tiba aijo', sombahkonmo suele iwi-iwi' na koloban sangga'at susumo anu pinalaluanmo i sinaa momonanyo.

²⁹ I sinaa ko inomonnyo sombahkonmo ualu' na sapi' lakinyo anu daagi' bata'nyo, ohua' na domba lakinyo, sampulu' ka opat na anak nu domba lakinyo anu umunnyo sataunmo, bubuu' anu madi' kopanyakitnyo.

^30-31 Hingga-hinggat tiba aijo' sombahkonmo suele iwi-iwi' na koloban sangga'at susumo anu pinalaluanmo i sinaa momonanyo.

³² I sinaa ko ipitunnyo sombahkonmo popitu' na sapi' lakinyo anu daagi bata'nyo, ohua' na domba lakinyo, sampulu' ka' opat na anak nu domba lakinyo anu umunnyo sataunmo, bubuu' anu madi' kopanyakitnyo.

^33-34 Hingga-hinggat tiba aijo' sombahkon mo suele iwi-iwi' na koloban sangga'at susumo anu pinalaluanmo i sinaa anu momonanyo.

³⁵ I sinaa ko ialunnyo belemiu tionyo ahi' sihukmo da monsombah Aku ka' madi'mo timbali mokalaja maboat.

³⁶ Sombahkonmo hi Tumpu koloban anu opotunu aijo'mo sa'angu' na sapi' lakinyo anu daagi bata'nyo, sa'angu' na domba lakinyo ka' popitu' na anak nu domba lakinyo anu umunnyo sataunmo, bubuu' anu madi' kopanyakitnyo. Hongohisnyo nu koloban aijo' momposanangmo kinyonyoa nu Tumpu.

^37-38 Hingga-hinggat tiba aijo' sombahkonmo suele iwi-iwi' na koloban sangga'at susumo anu pinalaluanmo i sinaa momonanyo.

³⁹ Aijo'mo na to atu-atulan nu koloban anu opotunu, koloban kaanon, koloban anggur, tiba koloban pompodame anu tionyo ahi' osombahkon nu belemiu hi Tumpu iuno nu lamean nu belemiu haha aijo' anu tinantukanmo. Koloban haha aijo' salaku bau pontuangi iwi-iwi' na koloban anu osombahkon nu belemiu bau pombayali apaa na anu jinanji'mo kabai koloban kasanangan nu kinyonyoa.

⁴⁰ I Musa nompotokamo hi bansa Israel iwi-iwi' apaa na anu pinalentahkonmo nu Tumpu hi ia.