NOMBILANGMO 27 - KITAB NU TUMPU ALLA LELE MA'IMAI'

To ana-anak i Zelafehad

¹ I Zelafehad ko anak boune aha olima', aijo'mo i Mahla, i Noa, i Hogla, i Milka ka' i Tirza. Tuumanyo i Zelafehad aijo'mo i Hefer, tuumanyo i Hefer aijo'mo i Gilead. Tuumanyo i Gilead aijo'mo i Makhir, tuumanyo i Makhir aijo'mo i Manasye ka' tuumanyo i Manasye aijo'mo i Yusuf.

² Aha olima' na anak i Zelafehad aijo' nambamo nangadap hi Musa, ka' hi Imam Eleazar, tiba hi to pola-polaya' ka' iwi-iwi' mian anu hau-haunyo sinihukmo koko sabatan nu Kemah nu Tumpu. Aha notatae,

³ “Tuuma mami sinilakamo i padang bola ka' ia madi' kino anak mo'ane. Ia misa' sangalu i Korah anu noto-noto idekmo hi Tumpu. Tuuma mami aijo' sinilaka kalana posi dosa'nyo.

⁴ Panyo kadaka' madi'mo ko sanggonyo hi bansa Israel ugaat kalana ia madi' ko lee' anak mo'ane? Bee'i mae na kami tano' pusaka' hingga-hinggat tiba to utu-utus nu tuuma mami.”

⁵ Lantas i Musa nompotokamo palakala nu aha aijo' hi Tumpu,

⁶ ka' Tumpu notataemo hi Musa,

⁷ “Apaa na anu tinaloakonmo nu to ana-anak i Zelafehad aijo' memang konanyomo. Jadi bee'i na aha tano' pusaka' tiba to utu-utus nu tuuma nu aha. Halata' i Zelafehad aijo' tionyo ahi' obee'akon hi to ana-anaknyo anu to bou-boune.

⁸ Poto'i hi bansa Israel tukoong-Ku de samian na mo'ane sinilakamo ka' ia madi' kino anak mo'ane,

⁹ saba' tano' pusaka'nyo tionyo ahi' obee' hi anaknyo boune, tano' pusaka'nyo aijo' obee' hi to utu-utusnyo mo'ane.

¹⁰ De ia madi' ko to utu-utusnyo mo'ane tano' aijo' obee' hi mo'ane utus nu tuumanyo.

¹¹ De ia madi' ko Utus mo'ane ka' madi' mule' ko mo'ane utus nu tuumanyo, tano'nyo aijo' timbali nu ala nu to sanga-sangalunyo anu mompahakona hondo tiba aha sa'anakan mae.” Atulan aijo' tionyo ahi' otuluti hondo-hondo nu aha mian Israel salaku atulan anu pinoto'imo i Musa ka' aijo' nolengkat mae hi Tumpu.

I Yosua pinile'anmo bau pombolosi i Musa

¹² Tumpu notataemo hi Musa, “Pindakomo i Bungkutnyo nu Abarim, ka' ikiita' mae tanggalakonmo na lipu' anu Ku bee'mo hi aha mian nu Israel.

¹³ De nupoko tanggalakonmo, beleyum silakamo susumo utus tu'a nu beleyum i Harun,

¹⁴ kalana i padang bola Zin belemiu ohu-ohua' madi'mo nohongo palentang-Ku. Tempo'nyo kiijo' i Meriba iwi-iwi' na mian nososonmo hi beleng-Ku, belemiu madi'mo mongka'oho' mompotoa kakuasa'an-Ku i ahop nu aha kalana uee aijo'.” (Han aijo' jinadi i mata nu uee Meriba kiijo' mae i Kades, i padang bola Zin.)

¹⁵ Lantas i Musa binalado'amo,

¹⁶ “O Tumpu Allah, anu mombee'i mae kantumuu'an hi iwi-iwi' na anu tumuu', ku kakase, potiju'akon mae samian na anu moko ala molaya' bansa aiya;

¹⁷ samian anu moko ala timbali bau talenga' de aha mahampate. Boli opojohok na mian nu belento aiya sumomo sanggombu na domba anu madi'mo ko polaya'nyo.”

¹⁸ Notataemo na Tumpu hi Musa, “Laga mae na i Yosua, anak i Nun. Ia mian anu pande, potiik na lima nu beleyum aita' i buan nu ubaknyo.

¹⁹ Pokau na ia tuminjo i ahop hi Imam Eleazar ka' hi iwi-iwi' na mian. Hi ahop nu aha iwi-iwi' tionyo ahi' nu poto'i taalu' i Yosuamo na timbali bau pombolosi beleyum.

²⁰ Bee'mo hi ia na kakuasa'an nu beleyum sambahagian da mian nu aha Israel montulutimo ahi' ia.

²¹ I Yosua tionyo ahi' mompoita pokinde' hi Imam Eleazar, ka' i Eleazar tionyo ahi' mompokilawa hi beleng-Ku mosia na pongka'oho'-Ku monggunakon Urim ka' Tumim. Tiba jalan anu sumo aijo', na i Eleazar mompotiju' i Yosua ka' hi iwi-iwi' na bansa Israel ka' iwi-iwi' mule' na han anu nu ahopi nu aha.”

²² I Musa nombaumo susumo anu pinalentahkonmo nu Tumpu hi ia. Ia nompokaumo i Yosua da tuminjo i ahop hi Imam Eleazar ka' hi iwi-iwi' na mian.

²³ Lantas pinotiiknyomo na limanyo aita' i buan nu ubak i Yosua ka' nompoto'imo tukoonyo i Yosuamo na bau pombolosi ia, susumo anu pinalentahkonmo nu Tumpu hi ia.