NOMBILANGMO 26 - KITAB NU TUMPU ALLA LELE MA'IMAI'

Kopinduannyomo nombilang mian

¹ Noko lapas na balaa' aijo', Tumpu notataemo hi Musa ka' hi Eleazar, anak i Imam Harun,

² “Belemiu tionyo ahi' po'ule'mo mombilang aha mian nu Israel iwi-iwi' toto sa'angu' na auwan. To momo'ane iwi-iwi' anu umunnyo molabimo uampulu' na taun mokiita' anu timbalimo bau suludadu tionyo ahi' o bilangmo.”

^3-4 I Musa ka' i Eleazar nompojalanmo palentah aijo'. Aha nolagamo to momo'ane iwi-iwi' anu umunnyo molabimo uampulu' na taun mokiita' ka' nomoposihukmo na aha i hatanyo nu Moab, i santoa nu Kaunyo Yordan, koko kota Yerikho. Aiya na aha mian nu Israel anu nosabatmo lengkat mae i Mesir;

⁵ Lengkat mae hi tulunan nu aha bansa Ruben, anak tumpe i Yakub; aha sa'anakan mae i Henokh, i Palu,

⁶ i Hezron ka' i Karmi.

⁷ To momo'ane anu aha sa'anakan mae haha aijo' konjoo'nyo 43.730 na mian.

⁸ Anak i Palu aijo'mo i Eliab,

⁹ ka' to ana-anak i Eliab aijo'mo i Nemuel, i Datan tiba i Abiram. I Datan tiba i Abiram aijo' pinile'anmo nu mian, panyo aha nosa'angu'mo tiba anu nonsangaja'i i Korah da boli mohongo-hongo i Musa tiba i Harun ka' mule' boli mohongo-hongo Tumpu.

¹⁰ Lantas tano' nobiha'mo ka' nolonyomo aha sahingga aha i natemo tiba i Korah ka' anu monsangaja'i ia tempo'nyo apu nontoyo'imo 250 na to momo'ane. Han aijo' bau pompo'ingat hi aha bansa Israel.

¹¹ Panyo to ana-anak i Korah na madi' ahi pinatean.

¹² Tulunan mae nu aha bansa Simeon, aha sa'anakan mae i Nemuel, i Yamin, i Yakhin,

¹³ i Zerah ka' i Saul.

¹⁴ To momo'ane aha sa'anakan mae haha aijo' konjoo'nyo 22.200 na mian.

¹⁵ Tulunan mae nu aha bansa Gad: sa'anakan mae i Zefon, i Hagi, i Syuni,

^16-17 i Ozni, i Eri, i Arod ka' i Areli.

¹⁸ To momo'ane anu aha sa'anakan mae haha aijo' konjoo'nyo 40.500 na mian.

^19-21 Tulunan mae nu aha bansa Yehuda: Sa'anakan mae i Syela, i Peres, i Zerah, i Hezron ka' i Hamul. Anak i Yehuda ua'aha, atina'mo i Er tiba i Onan, anu sinilakamo i tano' nu Kana'an.

²² To momo'ane anu aha sa'anakan mae haha aijo' konjoo'nyo 76.500 na mian.

²³ Tulunan mae nu aha bansa Isakhar; sa'anakan mae i Tola, i Pua,

²⁴ i Yasub tiba i Simron.

²⁵ To momo'ane anu aha sa'anakan mae haha aijo' konjoo'nyo 64.300 na mian.

²⁶ Tulunan mae nu aha bansa Zebulon; sa'anakan mae i Sered, i Elon ka' i Yahleel.

²⁷ To momo'ane anu aha sa'anakan mae haha aijo' konjoo'nyo 60.500 namian.

²⁸ Tulunan mae nu aha bansa Yusuf anu ko anaknyo mo'ane ua'aha; sa'anakan mae i Manasye ka' sa'anakan mae i Efraim.

²⁹ Tulunan mae nu aha bansa Manasye; i Makhir, anak i Manasye, atina'mo na tuuma i Gilead; ka' aha sa'anakan haha aijo' atina'mo na lee' mae i Gilead:

³⁰ Aha sa'anakan mae i Lezer, i Helek,

³¹ i Asriel, i Sekhem,

³² i Semida ka' i Hefer.

³³ I Zelafehad, anak i Hefer madi' kino anak mo'ane, ola anak boune. Sanggo nu aha aijo'mo i Mahla ka' i Noa, i Hogla, i Milka ka' i Tirza.

³⁴ To momo'ana anu aha sa'anakan mae haha aijo' konjoo'nyo 52.700 na mian.

³⁵ Tulunan mae nu aha bansa Efraim; aha sa'anakan mae i Sutelah, i Bekher, ka' i Tahan.

³⁶ Aha sa'anakan mae i Eran aijo'mo na lee' mae i Sutelah.

³⁷ To momo ane anu aha sa'anakan mae haha aijo' konjoo'nyo 32.500 na mian. Aijo'mo na aha sa'anakan lee' mae i Yusuf.

³⁸ Tulunan mae nu aha bansa Benyamin; aha mae sa'anakan i Bela, i Asybel, i Ahiram,

³⁹ i Sefufam ka' i Hufam.

⁴⁰ Aha sa'anakan mae i Ared ka' i Naaman aijo'mo na lee' mae i Bela.

⁴¹ To momo'ane anu aha sa'anakan mae haha aijo' konjoo'nyo 45.600 na mian.

⁴² Tulunan mae nu aha bansa Dan; aha sa'anakan mae i Suham.

⁴³ To momo'ane anu aha sa'anakan mae haha aijo' konjoo'nyo 64.400 na mian.

⁴⁴ Tulunan mae nu aha bansa Asyer: aha sa'anakan i Yimna, i Yiswi ka' i Beria.

⁴⁵ Aha sa'anakan mae i Heber ka' i Malkiel aijo'mo na lee' mae i Beria.

⁴⁶ I Asyer kino anak boune samian sanggonyo i Serah.

⁴⁷ To momo'ane anu aha sa'anakan mae haha aijo' konjoo'nyo 53.400 na mian.

⁴⁸ Tulunan mae nu aha bansa Naftali; sa'anakan mae i Yahzeel, i Guni,

⁴⁹ i Yezer ka' i Syilem.

⁵⁰ To momo'ane anu aha sa'anakan mae haha aijo' konjoo'nyo 45.400 na mian.

⁵¹ Iwi-iwi' na to momo'ane nu aha Israel konjoo'nyo 601.730 na mian.

⁵² Tumpu notataemo hi Musa,

⁵³ “Bagiakon na tano' aijo' hi aha tulunan nu bansa Israel obatukakon i konjoo'nyo nu aha tulunan nu bansa.

^54-56 Obauakon onde na mombagi tano' aijo'. Kona hi tulunan nu bansa anu manjoo' nu bee'i bagi tionyo ahi' manjoo', ka' kona hi tulunan nu bansa anu madi' manjoo' baginyo ola ahi' sangkiding.”

⁵⁷ Tulunan nu bansa aha Lewi, aijo'mo aha sa'anakan mae i Gerson, i Kehat ka' i Merari.

⁵⁸ Anu ninsoop hi lee' nu aha aijo'mo aha sa'anakan mae i Libni, i Hebron, i Mahli, i Musi ka' i Korah. I Kehat aijo'mo na tuuma i Amram.

⁵⁹ I Amram no'osoa tiba i Yokhebed anak i Lewi. I Yokhebed aijo' i hampe i Mesir. I Amram ka' i Yokhebed kino anak mo'ane ua'aha: I Harun tiba i Musa ka' mule' samian na boune, i Miryam.

⁶⁰ I Harun kino anak mo'ane aha opat i Nadab, i Abihu, i Eleazar ka' i Itamar.

⁶¹ I Nadab ka' i Abihu sinilaka tempo'nyo aha nonsombahkonmo apu anu madi' kina'ima'an nu Tumpu Allah.

⁶² To momo'ane anu aha sa'anakan mae i Lewi anu umunnyo molabimo sambitu'on mokiita' konjoo'nyo 23.000 na mian. Aha dinaputanakon madi' pinogalum hi aha to mia-mian anu bubu' bansanyo, kalana aha madi' nohumpak tano' pusaka' i Israel.

⁶³ Aijo'mo na daputan anu binau i Musa tiba i Imam Eleazar mongkona aha tulunan mae nu bansa Israel tempo'nyo aha binilangmo i hatanyo nu Moab i santoa nu Kaunyo Yordan koko kota Yerikho.

⁶⁴ Aha to mia-mian anu naipuan mae dinaputanakonmo i Musa tiba i Harun kiijo' i padang bola Sinai, madi'mo daagi' ko samian na anu daagi' tutuu'.

⁶⁵ Pinoto'imo nu Tumpu tukoonyo aha iwi-iwi' tionyo ahi' silakamo i padang bola. Ka' memang aha sinilakamo iwi-iwi' me i Kaleb anak i Yefune tiba i Yosua anak i Nun, na anu daagi' tutuu'.