NOMBILANGMO 24 - KITAB NU TUMPU ALLA LELE MA'IMAI'

¹ Uuka aiya sinumbu'mo i Bileam taalu' pongka'oho' nu Tumpu Allah da ia mombalakati bansa Israel. Kalana aijo' ia madi'mo lewa' mamba molio tanda susumo anu binaumo u'uka mae momona. I Bileam nontanggalakonmo sasu nokiijo' i padang bolaa,

² ka' nontoamo bansa Israel anu hau-haunyo nombaumo kemah toto sanggombu na tulunan nu bansanyo. Lantas Roh nu Tumpu Allah nongkuasaimo i Bileam,

³ ka' ia nompoto'imo apaa na anu i hongonyomo. “Aiyamo na potuunon i Bileam, anak i Beor, potatae nu samian anu nontoamo

⁴ anu nohongomo potatae nu Tumpu Allah ka' nontoamo Anu Daka' hondo na kuasanyo nanintoa hi ia ka' tinombahangkangmo panyo matanyo jila-jila.

⁵ Palias na ko ima'nyo na to kema-kemah nu belemiu o Yakub, ka' to tampa-tampat kajojoongan nu belemiu, o Israel!

⁶ Sumomo bangka'nyo anu ewa ka' bolaa, kabai ale' nu bunga-bunga i sohipi' nu kaunyo; sumomo kau' gaharu anu sinu'an nu Tumpu, kabai kau' aras i sohipi' nu kaunyo.

⁷ Aha nohumpakmo ujan nolabi-labi, anu sinu'an nohumpakmo uee manjoo'. Tomundo'nyo mompaka daka'mo na kakuasa'annyo, molingkuduimo i Agag, ka' kapalentahannyo saidi' mae opopodaka'mo.

⁸ Tumpu Allah anu nomboamo mae aha nosabat lengkat i Mesir, sumomo sapi' anu ma'ela' Ia nahantandukmo kalana monjagai kita. Iwi-iwi' na bansa anu monsampobali' saidi' mae mingkot na ilonyom-Nyo, iwi-iwi' na buku nu aha i hutean-Nyo ka' iwi-iwi' na pana' nu aha pinahapato'akon-Nyo.

⁹ Bansa aijo' sumomo singa lakinyo ka' singa behenyo, anu natidahapamo ka' nati lukutmo. Ihe na baani moliko ia? O amalakon da mian anu mombalakati beleyum obalakati, ka' mian anu mongkutuki beleyum okutuki.”

¹⁰ Pinusamo na i Balak ka' nontangkakonmo pajagunnyo ka' notataemo hi Bileam, “Beleyum i lagangkumo mae da mongkutuki iwi-iwi' na anu monsampobali' mae aku, panyo aha ola mule' ahi' binalakatan nu beleyum sampe pinintolun.

¹¹ Uuka aiya beleyum lako'mo pinsusule'mo i laigan nu beleyum! Aku nonjanji'mo da otamboije na beleyum panyo Tumpu madi' nompobee' beleyum mohumpak tambo aijo'.”

¹² Tinaaman i Bileam, “Te misa' pinoto'ingkumo hi to mia-mian anu sinai mae nu belento Tuanku, tukoongku

¹³ mau mule' belento Tuanku mombee'i mae aku salaka iwi-iwi' ka' mosoni' anu daagi' i laigan nu belento Tuanku, aku madi' timbali molanggai palentah nu Tumpu ka' mombau apaa na anu nuka'ima'i nu kinyonyoangku? Aku ola timbali montaloakon apaa na anu nu pokauhakon nu Tumpu ku taloakon.”

Potatae anu pupuusnyomo tinaloakonnyomo

¹⁴ Notatae na i Bileam hi Balak, “Uuka aiya aku minsusule'mo i bansangku. Panyo ma'isa pe'e aku mamba ku poto'imo hi belento Tuanku apaa na anu saidi' mae nubau nu bansa Israel hi bansa nu belento Tuanku i sinaa anu aiya mae o ahopi.”

¹⁵ Lantas i Bileam nontaloakonmo potatae sumo uuka, “Aiya na potuunon i Bileam, anak i Beor; potatae nu samian anu nontoamo

¹⁶ anu nohongomo potatae nu Tumpu Allah, ka' timbali monsumbu' Anu Matangkas hondo na Kuasanyo; lantas nontoamo Anu Daka' hondo na Kuasanyo nanintoa hi ia, ka' tinombahangkangmo panyo matanyo jila-jila.

¹⁷ Tinoangkumo na ia panyo misa' uuka aiya; tinanggalakonkumo na ia panyo aku aiya mae majo'on. Samian na tomundo lengkat mae hi aha Israel, saidi' mae toka sumo mandala' anu manjingka hondo. To pola-polaya' nu Moab saidi' mae Nu pateimo bansa Set saidi' mae Nu hopu'imo.

¹⁸ Tano' nu aha Edom saidi' mae nupalentahmo nu anu monsampobali' ia, panyo Israel mombaumo hahan anu okabuhuk.

¹⁹ Lengkat mae hi Yakub saidi' mae lubatmo na samian anu montoongi kakuasa'an, anu mompatei iwi-iwi' na sampobali'nyo.”

²⁰ Noko lapas na nontoa aijo' i Bileam nontoamo aha mian nu Amalek. Sahingga ia nontaloakonmo potatae sumo uuka, “Iwi-iwi' na bansa i dunia aiya, Amalekmo na anu talalo daka' na kuasanyo. Panyo bansa aijo' i mihinyo mae, mingkotmo sampe toka sidu-sidutu'.”

²¹ Han anu nanintoa aijo', tinoamo i Bileam na lee' mae i Kain lantas nontaloakonmo potatae sumo uuka, “Tampat kajojoongan nu beleyum memang mahoson hondo, sumomo petaa aita' i bungkutnyo nu batu.

²² Panyo belemiu mian nu Keni, saidi' mae opateimo, madi'mo daagi' pin na Asyur momboamo belemiu salaku anu i hakop.”

²³ Lapas aijo' i Bileam nompoto'imo mule' potatae sumo uuka, “Silakamo! Ihe na anu daagi' tumuu', de nubaumo nu Tumpu Allah na han aijo'?

²⁴ Panyo lengkat mae i Siprus tokaje mae na sa'angu' na kapan anu mompahampateakon, aha mompatundu'mo Asyur ka' Heber, lapas aijo' suele kapan anu mompahampateakon aijo' tompumo ka' mohopu'mo na miannyo.”

²⁵ Lantas i Bileam nogogau'mo kahanda' minsusule'mo i tampat kajojoongannyo, ka' i Balak suele i nambamo.