NOMBILANGMO 22 - KITAB NU TUMPU ALLA LELE MA'IMAI'

Tomundo nu aha Moab nolagamo i Bileam

¹ Bansa Israel po'ule'mo namba ka' nombaumo kemah i hatanyo nu Moab, i da'erah santoa nu Kaunyo Yordan, koko kota Yerikho.

^2-3 Salatan tomundo nu Moab, sanggonyo i Balak, anak i Zipor, nohongomo mosia na bansa Israel nompokalamo aha mian nu Amori, ka' mule' bansa Israel aijo' manjoo' hondo, nabuhukmo na ia tiba iwi-iwi' na layatnyo.

⁴ Lantas mian nu Moab notataemo hi to pola-polaya'nyo nu aha mian Midian, “Madi'mo daagi' pin sampobali' haha aijo' mongkajoko'imo mae iwi-iwi' apaa na anu aiya hi kita susumo sapi' mongkajoko'imo hemput padang.” Sahingga i Tomundo Balak

⁵ nonsaimo bobotokon da molaga i Bileam, anak i Beor, anu jojoong i kota Petor koko Kaunyo nu Efrat i da'erah Amau. Aha sinai da mompotoka hi Bileam potuunon aiya lengkat mae hi Balak, “Da osumbu', daagi' ko sa'angu' na bansa anu lengkat mae i Mesir; mian haha kiijo' sinongkomo iyaya mae ka' montanga'imo montumbuhi mae da'erah mami.

⁶ Aha na lebe mahoson molingkudui kami. Jadi, sampamo toka mae! Okutuki na aha da ku pokala. Da ugaat timbali opoko ala o hungku'i mami na aha ka' molaa' aha mompala'i lipu' aiya. Kalana ku palesaya hondo mian anu obalakatimo nu belento mohumpakmo balakat, ka' mian anu okutukimo nu belento mohumpakmo kutuk.”

⁷ Sahingga nambamo na to pola-polaya nu aha mian Moab ka' Midian aijo' nomboa pontamboi hi Bileam da mongka'oho' na ia mongkutuki aha mian nu Israel. Salatan tinokamo hi Bileam pinotokamo nu aha na potuunon i Tomundo Balak.

⁸ Koonyo i Bileam hi aha, “Male'mo pe'e i aiya. Dodop ku posumbu'je hi belemiu apaa na koonyo nu Tumpu hi belengku.” Jadi to pola-polaya' nu aha Moab aijo' jinojoongmo i tampat i Bileam.

⁹ Lantas Tumpu Allah tinokamo hi Bileam ka' nompokilawa, “Ihe na mian haha aijo' anu jinojoongmo i tampat nu beleyum, Bileam?”

¹⁰ Tinaaman i Bileam, “Aha anu sinai mae i Tomundo Balak lengkat mae i Moab mompolele

¹¹ tukoonyo sa'angu' na bansa anu tinokamo lengkat mae i Mesir, sinongkomo iyayay mae. I Tomundo Balak nompokaumo mae aku da mongkutuki bansa aijo' da nu hungku'i na aha, da ia moko ala mompahampateakon ka' mola' aha.”

¹² Tumpu Allah notataemo hi Bileam, “Boli mamba tiba mian haha aijo' ka' boli mongkutuki bansa aijo', kalana aha binalakatan-Kumo.”

¹³ Dodododopnyo i Bileam notataemo hi aha to mia-mian anu sinai mae i Balak aijo'. “Pinsusule'mo, Tumpu madi' mompobee' aku mamba tiba belemiu.”

¹⁴ Sahingga aha ninsusule'mo hi Balak ka' nompolelemo hi ia tukoonyo nu aha i Bileam madi' mongka'oho' toka mae tiba aha.

¹⁵ Lantas i Balak nonsaimo mule' lebe manjoo' na to mia-mian anu lebe matangkas na pangkatnyo molingkudui anu momona.

¹⁶ Aha nompotokamo potuunon aiya hi Bileam lengkat mae hi Balak, “Ku poita sabole-bole: tokamo mae, ka' boli mae baahan.

¹⁷ Ku tamboije manjo-manjoo', ka' mombau maumo pa' apaa na nutaloakon nu belento. Tokamo mae, ka' kutukiakon na bansa aijo' da ku hungku'i na aha.”

¹⁸ Panyo tinaaman i Bileam, “Maumo iwi-iwi' na salaka ka' mosoni anu kiijo' i laigan nu Tomundo Balak na pombayan aku, aku madi' timbali molanggai palentah nu Tumpu, Tumpu Allah anu ku sombah Maumo ola hahan anu ise' madi' timbali ku bau.

¹⁹ Panyo lebe ma'ima' belemiu male' pe'e i aiya, susumo anu binaumo nu mian anu momona mae sinai. Aku daagi' po'ule' kahanda' monsumbu' pa' daagi' ko anu nupoto'i mae nu Tumpu hi belengku.”

²⁰ Pihi-pihi aijo' Tumpu Allah tinokamo hi Bileam ka' notatae, “Mian haha aijo' toke mae mompoita beleyum da mamba tiba aha. Jadi posadiamo ka' lako'mo, panyo ola anu Ku palentahkon hi beleyum na obau.”

²¹ Dodododopnyo i Bileam nompokonamo kasuhangannyo i keledainyo lantas nombatukmo to pola-polaya' nu Moab haha aijo'.

I Bileam tiba keledainyo

²² Panyo salatan i Bileam nambamo, Tumpu Allah pinusamo. Hau-haunyo i Bileam sake-sake' i keledainyo, sinangaluan nu posaihonnyo ua'aha, malaekat nu Tumpu tinuminjomo i totonga' nu jalan kahanda' mongampang ia.

²³ Nontoa malaekat tinuminjomo ikiijo' ka' bajaknyo kineatnyomo, keledai aijo' noselemo madi'mo nontulu jalan ka' nokiijo'mo i ale'. I Bileam nondokemo keledai aijo' ka' po'ule' nomboa nokiijo' i jalan.

²⁴ Lapas aijo' malaekat nu Tumpu tinuminjomo sasu jalan anu soki i olotnyo, nu ohua' na ale' nu anggur anu ko tambulan nu batu poti-potimbiha'.

²⁵ Salatan keledai aijo' nontoamo malaekat nu Tumpu, ia nambamo i sohipi'nyo sahingga tengke i Bileam ingipidonmo nu batu aijo'. I Bileam po'ule' mule' nondoke keledai aijo'.

²⁶ Lantas malaekat nu Tumpu nolalinmo, ka' tinuminjo mule' i tampat anu lebe soki mule' sahingga madi'mo kino jalan anu otulu i kowi kabai i koanan.

²⁷ Nontoa malaekat nu Tumpu, keledai aijo' natibahangkangmo. I Bileam pinusamo ka' dinokenyomo nu tokonnyo na keledai aijo'.

²⁸ Lantas kinuasanmo nu Tumpu na keledai aijo sahingga noko alamo notatae. Koonyo nu binatang aijo' hi Bileam, “Apaa na anu binaungkumo hi belento Tuan, sahingga belento Tuan nondokemo aku pinintolun?”

²⁹ Tinaaman i Bileam, “Oko mombia-biangakonmo aku! De aku ko bajak, memang oko ku pateimo!”

³⁰ Tinaaman nu keledai aijo', “Te misa' aku aiya keledai nu belento Tuan anu pininmo saja' osake'i nu belento Tuan? Pa' toho' aku pinanggaga hi belento Tuan?” “Madi',” tinaaman i Bileam.

³¹ Lantas Tumpu nombaumo i Bileam da timbali montoa malaekat nu Tumpu tinjo-tinjo ikiijo' ka' bajaknyo kineatmo. Nalia-lia' na i Bileam dinumaladupu i tano' ka' nonsombah.

³² Pinokilawa nu malaekat nu Tumpu, “Kadaka' dinokemo nu beleyum na keledai nu beleyum sampe pinintolun? Aku toka da mongampang beleyum kalana de o ala i pikilan-Ku, madi' ma'ima' de beleyum mamba.

³³ Salatan keledai nu beleyum nontoamo Aku, ia namba i sohipi' nu jalan pinintolun. De madi', tantu beleyum pinateankumo, panyo keledai aijo' Ku potumuu'.”

³⁴ Tinaaman i Bileam, “Aku binaladosa'mo. Madi' sinumbu'ku taalu' belento Tuan tinuminjomo itotonga' nu jalan kahanda' mongampang aku. Panyo uuka aiya, de o ala i pikilan nu belento Tuan, madi' ma'ima' de aku molausakon lajangku aiya, aku minsusule'mo.”

³⁵ Panyo malaekat nu Tumpu notatae, “Batukimo mae na aku tiba mian haha aijo'. Panyo beleyum ola timbali montaloakon apaa na anu Ku poki taloakon.” Sahingga i Bileam nolausakonmo lajangnyo tiba aha mian anu sinai mae i Balak aijo'.

I Balak nolabotmo i Bileam

³⁶ Salatan i Balak nohongomo taalu' i Bileam tinokamo mae, ia nambamo nolabot i Bileam i kota Moab.

³⁷ Koonyo i Balak hi ia, “Kadaka' beleyum madi' tinoka mae salatan uuka mae i lagangku momona? Pa' kooyum aku madi' moko ala mombayan pontamboi beleyum?”

³⁸ Tinaaman i Bileam, “Jadi, uuka aiya aku tinokamo mae. Panyo aku madi' ko hak montaloakon apa-apaa, boli mompiakon apaa na anu nupokauhakon nu Tumpu Allah, aijo' na ku taloakon.”

³⁹ Sahingga nambamo na i Bileam tiba i Balak nokiijo' i kota Huzot.

⁴⁰ Kiijo' mae i Balak nongkolobanakonmo tino sangku-sangkuka na sapi' tiba domba. Sambahagian na antoknyo nu binatang aijo' binee'nyomo hi Bileam ka' hi to pola-polaya' anu namba mae hingga-hinggat tiba ia.

Momonanyo i Bileam nompoto'i apaa na anu jadi aiya mae i ahop

⁴¹ Dodododopnyo i Balak nomboamo i Bileam nindako i bungkutnyo nu Bamot Baal. Kiita' mae i Bileam nontanggalakonmo sambahagian na bansa Israel.