NOMBILANGMO 18 - KITAB NU TUMPU ALLA LELE MA'IMAI'

Pakalaja'an nu to ima-imam ka' aha mian nu Lewi

¹ Tumpu notataemo hi Harun, “Beleyum, to ana-anak nu beleyum tiba aha mian nu Lewi tionyo ahi montanggungi kasala'an apaa na anu timbali i Kemah-Ku, panyo ola beleyum tiba to ana-anak nu beleyum na tionyo ahi' montanggungi de sala' na pakalaja'an nu to ima-imam.

² To utu-utus nu beleyum tulunan nu bansa Lewi tionyo ahi' nu ala da bau pontulungi apaa na anu nu kalaja ka' apaa na anu nu kalaja nu to ana-anak nu beleyum.

³ Tulunan nu bansa Lewi tionyo ahi' mombau pakalaja'an nu aha apaa na anu opalentahkon nu belemiu ka' mombau pakalaja'an nu aha i Kemah-Ku, panyo aha madi' timbali mongohani mezbah kabai monsala' kanyang balang haha aijo' anu susi' i Salipi' anu Susi'. De aha molanggai atulan aijo', maumo aha kabai belemiu tionyo ahi' mate.

⁴ Aha tionyo ahi' mokalaja hingga-hinggat tiba belemiu ka' mombau pakalaja'an anu ko tuusanannyo tiba iwi-iwi' na pakalaja'an i Kemah-Ku, panyo anu madi' opalentahkon na okalaja, aijo' o tewa' na mokalaja hingga-hinggat tiba belemiu.

⁵ Ola beleyum, i Harun, tiba to ana-anak nu beleyum na tionyo ahi' mombau pakalaja'an i Salipi' anu Susi' ka' i mezbah, da madi' Ku tambuha'i na bansa Israel.

⁶ Totu-totu'unyo, Aku nompile'imo to utu-utus nu beleyum aha mian nu Lewi, te bansa Israel salaku anu obee' da montulungi beleyum. Aha tinantukanmo samata-mata mokalaja hi beleng-Ku, da mombau apaa na anu obau i Kemah-Ku.

⁷ Panyo ola beleyum tiba to ana-anak nu beleyum na timbali mombau pakalaja'an salaku imam, i pakalaja'an iwi-iwi' anu ko tuusanannyo tiba mezbah ka' apaa na anu kiijo' i Salipi' anu Susi' hondo. Aijo' na anu tionyo ahi' nu bau, kalana Aku nombee'imo belemiu pangkat salaku imam. Batu-batu mian anu madi' ko hak aijo' o hukum mate de mongohanimo balang haha aijo' anu susi' hondo aijo'.”

Anu bau bagi nu to ima-imam

⁸ Tumpu notataemo hi Harun, “O'inau'! Iwi-iwi' na anu sinombahkonmo samata-mata hi beleng-Ku anu madi' pinotunu belemiu na tumpunyo. Aijo'mo na bagi miu anu tinantukanmo sampe toka sidu-sidutu'. Aijo' Ku bee'mo hi belemiu ka' hi lee' nu belemiu.

⁹ Palasombahan-palasombahan anu talalo susi' hondo ka' anu madi' pinotunu i mezbah, aijo'mo na anu nu belemiu: Koloban kaanon, koloban pongampuni dosa' ka' koloban bau pombolosi kalugi'an. Iwi-iwi' aijo', palasombahan susi' anu baumo bagi nu belemiu ka' bagi nu to ana-anak nu belemiu.

¹⁰ Aijo' susi' hi belemiu, jadi tionyo ahi' okaan nu belemiu i tampat anu susi' suele. Ola to momo'ane na timbali mongkaan.

¹¹ Iwi-iwi' na palasombahan sangga'at anu samata-mata nusombahkon nu aha mian Israel hi beleng-Ku, belemiu na tumpunyo. Ku bee'mo hi belemiu tiba hi to ana-anak nu belemiu, anu to momo'ane ka' to bou-boune. Atulan aijo' opake sampe toka sidu-sidutu'. Batu-batu mian anu i auan nu belemiu anu madi' mahumimi' timbali mongkaan.

¹² Ku bee' hi belemiu iwi-iwi' na anu ma'ima' hondo apaa na hasinnyo nu ale' momona anu sinombahkonmo nu aha mian Israel hi beleng-Ku sataun toka sataun aijo'mo lanya' nu zaitun, anggur anu binaumo inumon ka' gandum.

¹³ Iwi-iwi' aijo' belemiumo na tumpunyo. Batu-batu mian anu i auan nu belemiu anu madi' mahumimi' timbali mongkaan.

¹⁴ Iwi-iwi' apaa na anu i tano' nu aha Israel anu samata-mata binee'mo hi beleng-Ku baumo bagi' nu belemiu.

¹⁵ Iwi-iwi' anu momona pinohampe nu manusia kabai anu inganakakon nu binatang anu sinombahkonmo nu aha mian Israel hi beleng-Ku baumo bagi nu belemiu. Panyo belemiu tionyo ahi' montobus to ana-anak nu belemiu anu tumpe ka' mule' anak nu binatang anu madi' timbali okaan.

¹⁶ To ana-anak tionyo ahi' otobus salatan umun nu aha sambitu'onmo. Olinyo anu tinantukanmo aijo' olima' na doi salaka, susumo olinyo anu biasa opake i Kemah-Ku.

¹⁷ Panyo sapi', domba ka' mee' anu momona pino anak madi' timbali otobus. Potuu'on aijo' samata-mata Aku na tumpunyo ka' tionyo ahi' okolobanakon. Dudu'akon na baso'nyo i mezbah ka' potunu na lompo'nyo salaku bau koloban. Hongihisnyo momposanangmo kinyonyoang-Ku.

¹⁸ Antoknyo baumo bagi nu belemiu, pokakana sumomo saha'annyo ka' pa'anyo koanan anu obee' ka' osombahkon hi beleng-Ku.

¹⁹ Sampe toka sidu-sidutu', iwi-iwi' na palasombahan anu samata-mata binoamo nu aha mian Israel hi beleng-Ku, Ku bee'mo hi beleyum ka' hi to ana-anak nu beleyum to momo'ane ka' to bou-boune. Atulan aijo' opake sampe toka sidu-sidutu' ka' baumo pompokododo palajanjian anu sabole-bole obaunto tiba lee' nu belemiu.”

²⁰ Tumpu po'ule mule notatae hi Harun, “Belemiu madi' mohumpak pombahagian apa-apaa. I lipu' anu jinanji'-Kumo aijo' madi' ko tano' anu timbali bau bagi nu belemiu. Aku, Tumpu, na baumo bagi nu belemiu.”

Bahagian nu aha mian nu Lewi

²¹ Tumpu notataemo hi Harun, “Iwi-iwi' na palasombahan nu aha mian Israel anu sampulu' na bahagian, sambahagian na Ku bee' hi aha mian nu Lewi. Aijo'mo na bau bagi nu aha kalana aha nokalajamo i Kemah-Ku.

²² Aha mian nu Israel sangga'at madi'mo daagi' timbali mongohani Kemah-Ku aijo' da aha boli baladosa' ka' mohumpak hukuman opatei na butong nu aha.

²³ Otampu'uni uuka aiya ola aha mian nu Lewi na timbali mongkalesang Kemah-Ku ka' anu montanggungi hondo pakalaja'an aijo'. Atulan aijo' opake suele hi lee' nu belemiu sampe toka sidu-sidutu'. Aha mian nu Lewi madi' ko pombagian apa-apaa i Israel,

²⁴ kalana pombagian nu aha binee'-Kumo iwi-iwi' na palasombahan, anu o ala sambahagian i sampulu' na bahagian anu sinombahkonmo samata-mata nu aha mian Israel hi beleng-Ku salaku anu binee'mo mae nu aha. Mokonyo aijo' mongkona aha mian nu Lewi, Aku notataemo tukoong-Ku aha madi'mo mohumpak bagi kiijo' i Israel.”

Aha mian nu Lewi monsombahkon sambahagian anu o ala i sampulu' na bahagian

²⁵ Tumpu nonsaimo i Musa

²⁶ da mompotokakon palentah aiya hi aha mian nu Lewi: De belemiu mongala hi mian nu Israel palasombahan sambagian anu o ala i sampulu' na bagian anu binee'mo nu Tumpu bau bagi nu belemiu, belemiu tionyo ahi' mombee' sambagian anu o ala i sampulu' na bagian aijo' ka' osombahkon nu belemiu samata-mata hi Tumpu.

²⁷ Palasombahan aijo' sumomo gandum anu sala'je pinadak na sinombahkon ka' anggur suele anu sala'je binau inumon.

²⁸ Kalana aijo' belemiu suele tionyo ahi' monsombahkon anu samata-mata obee' hi Tumpu sambagian anu o ala i apaa na anu sinombahkonmo nu aha mian Israel aijo'mo sambagian anu o ala i sampulu' na bagian. Palasombahan aijo' tionyo ahi' obee' nu belemiu hi Imam Harun.

²⁹ Bee' na bagian anu ma'ima' hondo anu i humpak nu belemiu i pombagian.

³⁰ De opoko bee'mo na bagian aijo', belemiu timbalimo mongala labinyo susumo samian na topo ale' suele mongalamo labinyo de ia noko boamo palasombahannyo.

³¹ Labinyo aijo' timbalimo okaan nu belemiu iyaya mae hingga-hinggat tiba belemiu sa'anakan, salaku tambonyo belemiu mokalaja i Kemah nu Tumpu.

³² Belemiu madi' mohumpak kasala'an de mongkaan, asan bahagiannyo anu ma'ima' hondo sinombahkonmo nu belemiu hi Tumpu. Boli mohumimi'i palasombahan anu susi' nu aha mian Israel kalana nusaduakon nu mongkaanmo palasombahan aijo' padahan ma'isa mombee' palasombahan anu ma'ima' hondo anu samata-mata obee' hi Tumpu. De olanggaimo nu belemiu na palentah aijo', belemiu matemo.