NOMBILANGMO 16 - KITAB NU TUMPU ALLA LELE MA'IMAI'

Noto idekmo na i Korah, i Datan ka' i Abiram

^1-2 I Korah anak i Yizhar aha mae sa'anakan i Kehat, tulunan nu aha bansa Lewi, noto idekmo hi Musa. Ia sinangaja'anmo nu aha totolu' na mian aha mae tulunan nu bansa Ruben, aijo'mo i Datan, ka' i Abiram to ana-anak i Eliab, ka' i On anak i Pelet, ka' aha 250 na mian polaya' anu talasanggo, anu pinile'anmo nu mian da'isan.

³ Aha hingga-hinggat nambamo nangadap hi Musa ka' hi Harun ka notatae, “Sukupmo aijo', Musa! Iwi-iwi' na aha mian Israel samata-mata baumo kapalaluan nu Tumpu, ka' Tumpu daagi'mo aiya hi kita iwi-iwi'. Panyo kadaka' beleyum monsangkamo butong nu beleyum lebe ko angga'nyo molingkudui mian anu pinalesayamo hi Tumpu?”

⁴ Nohongo aijo' i Musa tinolodadupumo i tano' ka' binalado'amo hi Tumpu.

⁵ Lantas ia notataemo hi Korah ka' anu monsangaja'imo ia, “Dodop daagi' subu Tumpu mompotoamo hi kita ihe na anu jinadimo anu-Nyo ka' ihe na anu samata-mata mombau kapalaluan-Nyo. Mian anu pinile'an-Nyomo atina' na anu nupobee' mongohani Ia.

^6-7 Dodop daagi' subu beleyum ka' aha anu nonsangaja'imo beleyum tionyo ahi' mongala tampat nu apu, o isi nu oba ka' kamangian, ka' oboa i mezbah. Otoantoje pa' ihe na aiya hi kita anu pinile'anmo nu Tumpu. Sukupmo aijo', o aha mian nu Lewi!”

⁸ I Musa notatae mule' hi Korah, “Potombihing mae belemiu mian nu aha Lewi!

⁹ Pa' otutugi nu belemiu aiya han ise' ugaat Tumpu Allah nu aha mian Israel nompile'imo belemiu atina' hi aha mian Israel da belemiu timbali mongohani Ia, ka' mokalaja i Kemah-Nyo, tiba mule' mokalaja mombau kapalaluan nu aha mian Israel ka' mombau apaa na anu palalu hi aha!

¹⁰ Beleyum Korah, ka' iwi-iwi' na aha mian nu Lewi i hangkatmo nu Tumpu na sanggo nu belemiu ka' uuka belemiu mongkahanda'i mule' mompoita da suele timbali Imam!

¹¹ De beleyum tiba anu monsangaja'i beleyum mososonmo hi Harun, sumo-sumomo belemiu panggagamo hi Tumpu!”

¹² Lantas i Musa noki lagamo mae i Datan ka' i Abiram, panyo aha notatae, “Kami madi' mongka'oho' mamba moitina'.

¹³ Ma'isa sanang na beleyum nomboamo mae kami nosabat lengkat i tano' nu Mesir anu molumba' aijo' ka' mompatei kami i padang bolaa aiya? Sabole-bole mule' beleyum mompalentah kami?

¹⁴ Sabenannyo beleyum madi' nomboa mae kami i tano' anu ma'omuk kabai mombee'i kami bau pongale'an, ka' ale' nu anggur da timbalimo pusaka' mami! Uuka aiya beleyum mongakalimo kami! Madi', kami madi' mongka'oho' toka moitina'.”

¹⁵ I Musa notambuha'mo hondo ka' notataemo hi Tumpu, “Tumpu, boli mongala palasombahan nu aha. Madi' toho' aku mompolugi' mau pe'e samian anu aijo' hi aha; ka' sa'angu' pe'e na keledai ma'isa toho' ingalangku aijo' hi aha.”

^16-17 Lantas notataemo na i Musa hi Korah, “Toka mae dodop i Kemah nu Tumpu hingga-hinggat tiba aha 250 na anu monsangaja'i beleyum. I Harun suele toka kiijo' mae. Belemiu tionyo ahi' momboa mae tampat nu apu toto samian. Isii mae nu kamangian i unonyo, lantas osombahkonmo hi Tumpu.”

¹⁸ Jadi toto samian mongalamo mae tampat nu apu, ka' ingisiannyomo nu oba ka' kamangian, lantas tinuminjomo i sabatan nu Kemah nu Tumpu tiba i Musa ka' i Harun.

¹⁹ Lapas aijo' i Korah nomposihukmo iwi-iwi' na mian, ka' aha tinuminjo nompaha ahop tiba i Musa ka' i Harun i sabatan nu Kemah nu Tumpu. Monti-montiik iwi-iwi' na mian nontoamo jingka nu Tumpu anu talalo hondo majingka.

²⁰ Lantas Tumpu notataemo hi Musa ka' hi Harun,

²¹ “Pala'i na mian haha aijo'; Ku pateimo na aha uuka aiya.”

²² Panyo i Musa ka' i Harun tinolodadupu nonsombah ka' notatae, “O Tumpu Allah, Belentomo na anu nombee'i mae kantumuu'an hi iwi-iwi' na anu tumuu'. De ola samian na anu baladosa', pa' Belento montambuha'imo mian iwi-iwi'?”

²³ Tumpu notataemo hi Musa,

²⁴ “Sai na mian haha aijo' da mompala'i kemah i Korah, i Datan, ka' i Abiram.”

²⁵ Lantas i Musa sinangaluanmo nu to pola-polaya' nu aha Israel, nambamo nokiijo' i tampat i Datan ka' i Abiram.

²⁶ I Musa notataemo hi aha mian nu Israel, “Pala'i na kemah nu mian anu toto ide-idek haha aiya ka' boli mongkanyang mau mule' pa' apaa na anu nu aha. De belemiu madi' mohongo-hongo, belemiu saidi' mae opatei hingga-hinggat tiba aha kalana dosa-dosa' nu aha.”

²⁷ Lantas aha mian Israel haha aijo' nompala'imo kemah i Korah, i Datan, ka' i Abiram. I Datan ka' i Abiram nosabatmo ka' tinuminjomo i sabatan nu kemah nu aha toto samian tiba anak ka' bengkele' nu aha.

²⁸ Lantas i Musa notataemo; “Tiba jalan anu sumo aija' osumbu'je nu belemiu taalu' Tumpu na nonsai mae aku da iwi-iwi' aiya obau ka' taalu' aijo' misa' ola posi pongka'oho'ku.

²⁹ De mian haha aijo' silaka susumo mian biasa silaka, madi' ko hukuman apa-apaa lengkat mae hi Tumpu Allah, aijo' na bau pontandaian Tumpu madi' nonsai mae aku.

³⁰ Panyo de Tumpu mombau apa-apaa anu ma'isa toho' i hongo nu belemiu sumo uukamo na kopinnyo, ka' de tano' mobiha' molonyomo aha tiba iwi-iwi' apaa na anu nu aha, sahingga aha manabu'mo mau daagi' tutuu' i uno nu dunia nu mian anu sinilakamo atina'je ka' osumbu' nu belemiu taalu' mian haha aijo' pinanggagamo hi Tumpu.”

³¹ Salatan i Musa noko potataemo, tano' anu kinatinjoan nu tengke nu aha nobiha'mo,

³² ka' nolonyomo aha tiba to ana-anak nu aha, tiba iwi-iwi' na anu nonsangaja'imo i Korah tiba iwi-iwi' na halata' nu aha.

³³ Sahingga nanabu'mo na aha titu-tituu' i uno nu dunia nu mian anu sinilakamo tiba iwi-iwi' apaa na anu nu aha. Tano' anu nobiha'mo aijo' po'ule'mo tinatutup ka' aha i madi'anmo, i lonyomo nu tano'.

³⁴ Iwi-iwi' na aha mian Israel anu tinoka ikiijo' nopalaimo salatan nohongo aha tinumando'mo “popopadeka'! Dumo kita nulonyom nu tano'!”

³⁵ Lantas Tumpu nompotokamo mae apu anu nontoyo'imo aha 250 na mian, anu nonsombahkonmo kamangian aijo'.

Tampat nu apu

³⁶ Lantas Tumpu notataemo hi Musa,

^37-38 “Pokau na i Eleazar anak i Imam Harun mohangkati tampat nu apu haha aijo', tuha'nyo anu notoyo'mo haha aijo', ka' kakambuhakon na abu'nyo i tampat sangga'at, kalana tampat nu apu aijo' susi'. Balang haha aijo' palasombahan nu mian haha aijo' anu i hukumo nate, kalana dosa' nu aha. Balang haha aijo' susi' kalana sinombahkonmo hi ahop nu Tumpu, kalana aijo' tionyo ahi' otutukmo opaha ponipis da bau polapisi mezbah sasu sambiha'nyo. Han aijo' da bau pompo'ingat bansa Israel.”

³⁹ Sahingga i Imam Eleazar nongalamo tampat nu apu haha aijo', ka' noki tutukmo hi mian pinaha ponipis da bau polapisi mezbah sasu sambiha'nyo.

⁴⁰ Aijo' baumo pompo'ingat bansa Israel saba' de misa' lee' i Harun madi' timbali ko samian pe'e toka i mezbah da mompapu kamangian ka' osombahkon hi Tumpu. Mian anu molanggai atulan aijo' opateimo susumo i Korah tiba anu monsangaja'imo ia. Iwi-iwi' aijo' binaumo susumo anu pinalentahkonmo nu Tumpu hi Musa ka' pinoto'inyomo hi Eleazar.

I Harun nomposalamatmo aha bansa Israel

⁴¹ Dodododopnyo iwi-iwi' na aha mian Israel lewa'mo pinusa hi Musa tiba hi Harun. Aha notatae, “Belemiu nompateimo mian anu pinalesayamo hi Tumpu.”

⁴² Hau-haunyo aha aijo' sinihukmo nonggagakonmo i Musa tiba i Harun, aha nontoamo nokiijo' i Kemah nu Tumpu, ka' nontoamo Kemah aijo' sinaputmo nu kundom, lantas nontoamo jingka salaku tanda Tumpu tinokamo.

⁴³ I Musa tiba i Harun nokiijo'mo i ahop nu Kemah nu Tumpu.

⁴⁴ Lantas notataemo na Tumpu hi Musa,

⁴⁵ “Lako' pala'i na mian haha atina'. Ku silakaimo na aha i tampat atina'!” Ua-ua'aha aijo' tinolodadupumo ka' nonsombah

⁴⁶ lantas i Musa notataemo hi Harun, “Ala na tampat nu apu nu beleyum ka' isimo nu oba nu apu anu o ala aijo' i mezbah ka' opo'una'i kamangian. Boa lia-lia' aijo' hi aha mian ka' baumo na atulannyo da bau pongampuni dosa' nu aha. Lia-lia'! Tumpu talalomo hondo pinusa, ka' panyakit anu molele nontampu'unimo.”

⁴⁷ I Harun nombaumo apaa na anu pinoto'imo i Musa. Ia nopadeka'mo nokiijo' hi aha mian anu sinihukmo ka' nontampu'unimo kinona nu panyakit anu molele. Sahingga i Harun nonguna'imo kamangian aijo' i oba nu apu ka' nombaumo atulannyo da bau pongampuni dosa' nu aha mian.

⁴⁸ Panyakit anu molele aijo' binelentimo panyo i Harun daagi' aijo' hi aha mian anu daagi' tumuu' ka' anu sinilakamo.

⁴⁹ Anu sinilakamo tempo'nyo aitu 14.700 na mian, sambiha'nyo na aha anu sinilaka kalana noto idekmo tiba i Korah.

⁵⁰ Salatan panyakit anu molele aijo' binelentimo, i Harun ninsusule'mo hi Musa i sabatan nu Kemah nu Tumpu.