NOMBILANGMO 12 - KITAB NU TUMPU ALLA LELE MA'IMAI'

I Miryam i hukumo

¹ I Musa nongalamo samian na boune mian nu Kus binaunyomo bengkele'nyo, ka' han aijo' binaumo sabab i Miryam ka' i Harun da nompisala'imo i Musa.

² Aha notatae, “Te ola hi Musa na potataean mae nu Tumpu? Te misa' mau hi kita suele Ia timbali motatae?” Tumpu nohongomo apaa na anu tinaloakonmo nu aha.

³ I Musa mian anu madi' kobubuun, nu lingkudui na mian iwi-iwi' anu tutuu' i dunia aiya.

⁴ Mamanga ahi' Tumpu notataemo hi Musa, hi Harun ka' hi Miryam, “Belemiu totototolu' mamba pe'e mae i Kemah-Ku.” Lantas aha nambamo nokiijo',

⁵ lantas Tumpu nintatau'mo mae i uno nu kundom. Tumpu tinuminjomo i sabatan nu Kemah-Nyo ka' nolagamo i Harun tiba i Miryam. Ua-ua'aha aijo' nongohanimo,

⁶ lantas Tumpu notataemo, “Potombihing mae na potataeng-Ku aiya! De daagi' ko anu aiya hi belemiu samian na nabi, Ku potoamo na butong-Ku hi ia da saja' otoa, ka' basisik tiba ia i uno nu ipion.

⁷ Panyo madi' sumo posaihon-Ku i Musa. Olamo aijo' ia na mian anu tulu-tulutan madi' sumo mian sangga'at anu pinalesayamo hi beleng-Ku.

⁸ Ka' Aku motatae tiba ia mompaha ahop, ka' anu sahondo-hondonyo, madi' mongande-andeakon. Ka' mule' ohup-Ku tinoanyomo! Kadaka' belemiu baani mompisala'i i Musa, posaihon-Ku aijo'?”

⁹ Tumpu pinusamo hondo hi aha ohua', ka' Ia inambamo.

¹⁰ Salatan kundom aijo' nompala'imo Kemah nu Tumpu, tinoa na i Miryam kinonamo nu panyakit kilit anu monsilakai; kilitnyo nopute'mo susumo kapas. Salatan siniloi i Harun na i Miryam ka' nontoamo taalu' ia kinonamo nu panyakit kilit aijo',

¹¹ notataemo na ia hi Musa, “Tulungi mae, o Tuanku, boli opojohok na kami sakisamo kalana dosa' anu binaumo mami i uno nu kaponga'an mami.

¹² Boli ola opojohok na ia susumo anak anu sala'je i hampe ka' balomo sinilaka ka' mule' butongnyo moho-moho'mo nabusik.”

¹³ Sahingga i Musa notataemo hi Tumpu, “O Tumpu, ku poita, po'alinakon na ia!”

¹⁴ Tinaaman nu Tumpu, “De bisuannyo ohupnyo tinupe'an nu tuumanyo, te misa' kopinnyo pitun sinaa na ia tionyo ahi' mongoa'i ambang? Lalin pe'e na ia boli jojoong i kemah kopinnyo pitun sinaa, ka' lapas aijo' timbalije ia minsusule' mae.”

¹⁵ Lantas i Miryam sinabatakonmo lengkat i kemah kopinnyo pitun sinaa, ka' bansa aijo' madi' nolalin lengkat ikiijo' sampe i Miryam pinobe'mo minsusule' i kemah.

¹⁶ Lapas aijo' aha nompala'imo Hazaret ka' nompotinjomo kemah i padang bola Paran.